ވައިގެމަގުން އަބޫދާބީން ރާއްޖެ އައި ފަސިންޖަރެއްގެ ހަށިގަނޑުގެ އެތެރޭގައި ފޮރުވައިގެން ރާއްޖެ އެތެރެކުރަން އުޅުނު ރަން ކަސްޓަމްސުން އަތުލައިގެންފިއެވެ.

މޯލްޑިވްސް ކަސްޓަމްސް ސަރވިސްއިން، ބުނީ ވިޒްއެއަރ ފްލައިޓް ނަންބަރު W57105ން 2023 މާރިޗު 17 ވަނަ ދުވަހު ރާއްޖެއައި ފަސިންޖަރަކާމެދު ޝައްކުކުރެވޭ ކަންތައްތަކެއް ހުރުމުން އެ މީހާގެ ހަށިގަނޑު އިތުރަށް ބަލައި ފާސްކުރުމަށްޓަކައި ބޮޑީ ސްކޭންކުރިއިރު ހަށިގަނޑުގެ ތެރޭގައި އެއްޗެއް ރައްކާކޮށްފައި ހުރިކަން ފާހަގަކުރެވުނު ކަމަށެވެ. މި ތަކެއްޗާ ބެހޭގޮތުން މި ފަސިންޖަރާ ސުވާލުކުރުމުން، އޭނާގެ ހަށިގަނޑުގައި ރަން ހުރި ކަމަށް އެއްބަސްވި ކަމަށްވެސް ބުންޏެވެ.

އޭނާގެ ހަށިގަނޑުން ނެގި ރަނުގެ ބަރުދަނުގައި ޕެކިންއާއެކު ޖުމްލަ 361 ގްރާމް ހުރިކަމަށާއި، މި މައްސަލާގައި އަތުލައިގެންފައިވަނީ އިންޑިއާއަށް ނިސްބަތްވާ، އުމުރުން 43 އަހަރުގެ ފިރިހެނެއްކަމަށް ކަސްޓަމްސުން ބުނެއެވެ.

މި މައްސަލަ ދަނީ އިތުރަށް ތަހުގީގުކުރަމުންނެވެ.