ނ. މަނަދޫގެ ގެއެއްގެ ތެރެއިން ޒަޚަމްތަކަކާއެކު މަރުވެފައި އޮއްވައި ފެނުނު ނައީމާ މޫސާގެ ހަށިގަނޑު ވަޅުލައިފިއެވެ.
ނައީމާގެ ހަށިގަނޑު ވަޅުލާފައިވަނީ ނ. މަނަދޫގައެވެ. ނައީމާ ވަޅުލާފައިވަނީ ހޮނިހިރު ދުވަހުގެ ހަވީރު 5:20ގައެވެ.
ނައީމާގެ ޚަބަރެއް ނުވާތާ ދެ ދުވަސް ވެގެން ފުލުހުންނަށް ރިޕޯޓްކުރީ އޭޕްރީލް މަހުގެ 7 ވަނަ ދުވަހުއެވެ. އެ ރިޕޯޓާ ގުޅިގެން ފުލުހުން އޭނާ ދިރިއުޅޭ ގެއަށް ގޮސް އެ ގެއަށް ވަނީ، އޭނާ ދިރިއުޅުނު ގޭގެ ކޮޓަރީގެ ދޮރު ވައްޓާލައިގެން ކަމަށްވެސް ފުލުހުން ބުނެއެވެ. ފުލުހުން އެތަނަށް ވަތްއިރު އެ އަންހެން މީހާ އޮތީ ބިންމަތީގައި ކަމަށާއި، އޭނާ އޮތީ މަރުވެފައި ކަމަށް ފުލުހުން ބުނެއެވެ.
މި މައްސަލައިގެ ތަހުގީގަށް ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ޓީމެއް މަނަދޫގައި ހަރަކާތްތެރިވަމުންދާ ކަމަށް ފުލުހުން މައުލޫމާތު ދެއެވެ.
އެ އަންހެން މީހާގެ ހަށިގަނޑުގައި ޒަހަމްތައް ހުރި ކަމަށް ބައެއް މީޑިއާތަކުން ރިޕޯޓްކޮށްފައި ވީނަމަވެސް ކަމާބެހޭ ފަރާތަކުން އެކަން އަދި ކަށަވަރުކޮށްދީފައެއް ނުވެއެވެ. އެކަމާ ގުޅިގެން އިތުރަށް ބަލަންޖެހޭ ކަންކަން ބަލަމުންދާކަަމަށް ފުލުހުން ވަނީ ބުނެފައެވެ.
