ކުރިއަށް އޮތް ރިޔާސީ އިންތިޚާބުގައި ވޯޓު ފޮށި ބަހައްޓައިދިނުމަށް އެދި 50 ރިސޯޓުކުން ހުށަޙަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ އިންތިޚާބަށް ތައްޔާރުވުމުގެ ވަރަށް ގިނަ މަސައްކަތްތައް ކުރަމުންދާ ކަމަށެވެ. އެގޮތުން ޓޫރިޒަމް މިނިސްޓްރީއާ މަޝްވަރާ ކުރެވި މަސައްކަތް ތަކެއް ކުރެވިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ ވޯޓު ފޮށި ބަހައްޓާނެ ރިސޯޓުތައް ކަނޑައެޅުމުގައި މަޝްވަރާ ކުރެވިފައިވާ ކަމަށެވެ.

ހަސަން ޒަކަރިއްޔާ ވިދާޅުވީ މިހާތަނަށް އައިރު 50 ރިސޯޓުން ވޯޓު ފޮށި ބަހައްޓަން ބޭނުންވެގެން ކޮމިޝަނަށް ހުށަހަޅާފައިވާ ކަމަށެވެ. އިންތިހާބުގައި ރިސޯޓުތަކުގައި ވޯޓު ފޮށި ބަހައްޓާނީ މަދުވެގެން 50 މީހުން ވޯޓުލާން ރަޖިސްޓްރީ ކޮށްފައިވާ ރިސޯޓުތަކުގައި ކަމަށާއި، ރީ-ރަޖިސްޓްރީއަށް ހުޅުވާލާނެ ކަމަށެވެ.

ޚާއްސަ ސަރވޭއެއްގެ މަސައްކަތް ކުރަމުންދާކަން ފާހަގަކުރައްވައި ހަސަން ޒަކަރިއްޔާ ވިދާޅުވީ އާއްމުކޮށް ވޯޓު ފޮށިތައް ބަހައްޓާ މަރުކަޒުތަކުގެ ހާލަތު ވަރަށް ރަނގަޅަށް ބަލާނެ ކަމަށެވެ. އެއީ އެންމެ އެކަށީގެންވާ ތަންތަންތޯ ބަލައި ޔަގީން ކުރާނެ ކަމަށް އޭނާ ވިދާޅުވިއެވެ.

އީސީން ބުނީ ރިސޯޓެއްގައި ވޯޓު ފޮށި ބެހެއްޓޭނީ އެ މާހައުލަކީ ވޯޓު ފޮށި ބެހެއްޓުމަށް ރައްކާތެރި ތަނަކަށްވާނަމަ އެވެ. މަރޗް މަހުގެ ތެރޭގައި 5600ށް ވުރެ ގިނަ އޮފިޝަލުން ހޯދުމަށް އިއުލާން ކޮށްފައިވާއިރު، މި ފަހަރުގެ އިންތިޚާބަށް 8،000 އޮފިޝަލުން ބޭނުންވާނެ ކަމަށް އީސީގެ ރައީސް ފުއާދު ތައުފީޤު ކުރިން ވިދާޅުވެފައިވެއެވެ.

ރިޔާސީ އިންތިޚާބު ބޭއްވުމަށް ނިންމާފައި ވަނީ ސެޕްޓެމްބަރު މަހުގެ ނުވަ ވަނަ ދުވަހުއެވެ. ދެވަނަ ބުރެއް ބާއްވަން ޖެހިއްޖެ ނަމަ ސެޕްޓެމްބަރު މަހުގެ 30 ގައި ބޭއްވުމަށް ވަނީ ނިންމާފައެވެ.