ތޯމަސް ޓުޗެލްގެ އިރުޝާދުގެ ދަށުން ބަޔާން މިއުނިކުން ކުޅުނު ފުރަތަމަ މެޗުގެ ނަތީޖާއާމެދު އުފާ ކުރާ ކަމަށާއި ނަމަވެސް ރަނގަޅު ކުރަން ޖެހޭ ކަންކަން އެބަހުރި ކަމަށް އޭނާ ބުނެފި އެވެ.

ޓުޗެލް މިހެން ބުނީ ބޮރޫޝިއާ ޑޯޓްމަންޑުގެ މައްޗަށް 4-2 އިން ކުރި ހޯދައި، އަލުން ޖަރުމަނު ލީގުގެ އެއް ވަނަ މަގާމަށް ޖެހިލުމަށްފަހު ވާހަކަ ދައްކަމުންނެވެ. އޭނާ ބުނީ މިއީ ކުރިއަށް ދިޔުމަށް އެޅުނު ވަރަށް ރަނގަޅު ފިޔަވަޅެއް ކަމަށާއި، އަލުން އެއް ވަނައިގައި ބަޔާނަށް އޮވެވުނީތީ ވެސް އުފާވާ ކަމަށެވެ. ނަމަވެސް ކުރިއަށް އޮތް ތަނުގައި ވެސް އެއް ފެންވަރެއްގައި ކުޅުން ހިފަހައްޓައިގެން ނޫނީ އެއް ވަނަ ދިފާއު ނުކުރެވޭނެ ކަމަށެވެ. އޭނާ ބުނީ އަދިވެސް ބަޔާންގައި ރަނގަޅު ކުރަން ޖެހޭ ކަންކަން އެބަހުރި ކަމަށާއި، ވަޒީފާއާ ހަވާލުވީ ގިނަ ގޮންޖެހުންތައް ކުރިމަތިވާނެކަން ވެސް އެނގިހުރެ ކަމަށެވެ. އަދި ބަޔާންގެ ކޯޗުކަމާ ހަވާލުވުމަށް ނިންމި ނިންމުމުގެ ފަހަތުގައި ވަނީ އެކަމަށް އޭނާ އެދިގެންހުރި މިންވަރާއި، އެކަމުގެ ފޯރި އޭނާގެ ކިބައިގައި ހުރުމުން ކަމަށެވެ. މީގެ އިތުރުން ހުރިހާ ތައްޓެއް ކާމިޔާބު ކުރުމަށް މަސައްކަތް ކުރުމަކީ ވެސް އޭނާ ބޭނުންވާ ގޮތް ކަމަށެވެ. ހަމައެއާއެކު ޓީމާ އެކު ގާތް ރަނގަޅު ގުޅުމެއް އުފައްދަން ބޭނުންވާ ކަމަށް ވެސް އޭނާ ބުންޏެވެ.

ޓުޗެލް ބުނީ މެޗު ފަށައިގެން ޑޯޓްމަންޑުން ފެނުނީ ވަރަށް އިތުބާރާއެކު ކުޅުނު މަންޒަރު ކަމަށާއި، އެވަގުތުގައި ބަޔާނަށް ކޮންމެވެސް ވަރަކަށް ގޯސްތަކެއް ހެދުނު ކަމަށެވެ. ނަމަވެސް ފުރަތަމަ ލަނޑާއެކު ބަޔާނަށް އިތުބާރު ލިބުނު ކަމަށާއި، ޓީމުގެ ކުޅުން އެހިސާބުން ބަދަލުވި ކަމަށެވެ. އަދި އެއަށްފަހު ބަޔާނުން ލިބުނު ފުރުސަތުތަކުގައި އެޓޭކު ކުރި ކަމަށާއި، މެޗުގެ ކޮންޓްރޯލް ނަގައިގެން ކުޅުނު ކަމަށެވެ. އޭގެ ނަތީޖާއެއްގެ ގޮތުން މެޗުގެ ވަރަށް ކުރީ ކޮޅު ތިން ލަނޑުގެ ލީޑެއް ލިބުނުކަން އޭނާ ވަނީ ފާހަގަކޮށްފަ އެވެ. ޓުޗެލް ބުނީ ތިން ލަނޑުގެ ލީޑެއް ލިބުމާއެކު އޭނާ ހީއްކުރީ މެޗު ވަރަށް ފަސޭހަ ވާނެ ކަމަށެވެ. ނަމަވެސް އޭގެ ފަހުން ވެސް ބަޔާނަށް ބޯޅަ ލިބި، ކުޅުންތެރިންނަށް ބޯޅައާއެކު ކުދި ކުދި ގޯސްތަކެއް ހެދުނު ކަމަށެވެ. އޭނާ ބުނީ އެ މެޗުގެ ކުރިން ލިބުނީ އެންމެ ފަރިތަކުރުމެއް ކަމަށާއި، އެހެންކަމުން ބަދަލުތަކާއެކު ކުޅެން މަސައްކަތްކުރާއިރު އެކަންކަން ދިމާވާނެ ކަމަށެވެ. އޭނާ ފާހަގަ ކުރި ގޮތުގައި ކުރިއަށް އޮތް ތަނުގައި ބަޔާން އިން ނުކުންނަނީ ހެދޭ ގޯސްތައް ރަނގަޅުކޮށްގެންނެވެ.

ބަޔާނަށް ދެން އޮންނަނީ މިމަހުގެ ހަތަރު ވަނަ ދުވަހު ޑީއެފްބީ ޕޯކަލްގެ ކުއާޓާ ފައިނަލްގައި ފްރެއިބާގްއާ ދެކޮޅަށް ކުޅޭ މެޗެވެ. އޭގެ ފަހުން ލީގުގައި މި މަހުގެ އަށް ވަނަ ދުވަހު ނުކުންނާނީ ވެސް އެ ޓީމާ ދެކޮޅަށެވެ. މިމަހުގެ 12 ވަނަ ދުވަހު ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ނުކުންނާނީ މެންޗެސްޓަރ ސިޓީއާ ދެކޮޅަށެވެ.