އަމިއްލަ ދަނޑުގައި އެސްޓަން ވިލާ އަތުން ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި އަމިއްލަ ދަނޑުގައި އެސްޓަން ވިލާއާ ދެކޮޅަށް ކުޅުނު މެޗުން ޗެލްސީ ބަލިވެއްޖެ އެވެ.

ޗެލްސީގެ ސްޓޭމްފޯޑް ބްރިޖުގައި ހޮނިހިރު ދުވަހުގެ ރޭ ކުޅުނު މެޗުން އެސްޓަން ވިލާ މޮޅުވީ 2-0 އިންނެވެ. މެޗުގައި އެސްޓަން ވިލާ އިން ލީޑު ނަގާފައި ވަނީ 18 ވަނަ މިނެޓުގަ އެވެ. މެޗުގައި ޗެލްސީން ހަމަލާ އުފައްދައި ލީޑު ނެގުމަށް މަސައްކަތް ކުރަމުން ދަނިކޮށް، އެސްޓަން ވިލާ އަށް ލީޑު ނަގައިދިނީ އިންގްލެންޑުގެ ފޯވާޑް އޮލީ ވޮޓްކިންސް އެވެ. އެ ޓީމުގެ ދެ ވަނަ ލަނޑު ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން މެޗުގެ 56 ވަނަ މިނެޓުގައި ޖެކޮބް ރަމްސީ ތަނަވަސްކޮށްދިން ފުރުސަތެއްގައި އެސްޓަން ވިލާގެ ދެ ވަނަ ލަނޑު ޖެހީ ޖޯން މެކްގިން އެވެ. މެޗުގައި ޗެލްސީން ވަނީ އެސްޓަން ވިލާގެ ގޯލަށް އަމާޒުކޮށް އަށް ހަމަލާއެއް ފޮނުވާލައިފަ އެވެ. ޗެލްސީން ބޯޅަ ހިފަހައްޓައިގެން ރަނގަޅަށް ކުޅުނު ނަމަވެސް އެ ޓީމަށް މައްސަލަ ދިމާވީ ލިބުނު ފުރުސަތުތައް ނިންމާ ނުލެވުމުންނެވެ. މި މެޗުގައި ޗެލްސީގެ ކޯޗު ގްރަހަމް ޕޮޓާ ވަނީ އެ ޓީމަށް ކުޅެމުން އަންނަ ފްރާންސްގެ މިޑްފީލްޑަރު އެންގޯލޯ ކާންޓޭ އަށް ވެސް ފުރުސަތު ދީފަ އެވެ. އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާ ދުރުގައި ހުރި ކާންޓޭ އަނިޔާ އިން ރަނގަޅުވެ އެއީ ކުޅުނު ރަސްމީ ފުރަތަމަ މެޗެވެ.

ލީގުގައި މި ސީޒަންގައި ޗެލްސީގެ ފަރާތުން އަންނަނީ ދަށް ކުޅުމެއް ފެންނަމުންނެވެ. އެގޮތުން މިހާތަނަށް ލީގުގައި އެ ޓީމުން 28 މެޗު ކުޅުނުއިރު، އޭގެ ތެރެއިން މޮޅުވެފައި ވަނީ ދިހަ މެޗުންނެވެ. އަށް މެޗު އެއްވަރުވެގެން ނިމިފައިވާއިރު، 10 މެޗަކުން ވަނީ ބަލިވެފަ އެވެ. 38 ޕޮއިންޓާއެކު ޗެލްސީ އޮތީ ވެސް 11 ވަނައިގަ އެވެ.