މާލޭގެ މިސްކިތްތަކުގައި ސީސީޓީވީ ކެމެރާ ހަރުކޮށްދޭނެ ބަޔަކު ހޯދަނީ
މިއީ މާލޭ ސިޓީ ކައުންސިލްގެ ފަރާތުން، މާލޭގެ މިސްކިތްތައް މަރާމާތުކޮށް އާބާތުރަ ފިލުވުމުގެ މަޝްރޫއުގެ ދަށުން ކުރިޔަށްގެންދާ ކަމެއް
މާލޭގެ މިސްކިތެއް
މާލޭގެ މިސްކިތްތަކުގައި ސީސީޓީވީ ކެމެރާ ހަރުކޮށްދޭނެ ބަޔަކު ހޯދުމަށް މާލެ ސިޓީ ކައުންސިލުން އިއުލާންކޮށްފިއެވެ.
މާލޭ ސިޓީ ކައުންސިލްގެ ފަރާތުން، މާލޭގެ މިސްކިތްތައް މަރާމާތުކޮށް އާބާތުރަ ފިލުވުމުގެ މަޝްރޫއުގެ ދަށުން، މާލޭގެ މިސްކިތްތަކުގައި ސީސީޓީވީ ކެމެރާ ހަރުކުރުމަށް ބޭނުންވާތީ، މިމަސައްކަތް ކުރުމަށް ބީލަން ހުށަހެޅުމުގެ ފުރުޞަތު ހުޅުވާލާކަމަށް ސިޓީ ކައުންސިލުން ވަނީ ބުނެފައެވެ. މިކަމަށް ޝައުގުވެރިވާ ފަރާތްތަކުން މިމަހުގެ 17 ވަނަ ދުވަހު 9 ޖަހާއިރު ބީލަން ރަޖިސްޓްރީކުރުމުގެ ފުރުސަތު ވަނީ ހުޅުވާލާފައެވެ. ބީލަން ހުޅުވުމަށް އޮންނަ ބައްދަލުވުމުގައި ބައިވެރިވެވޭނީ ކަނޑައެޅިފައިވާ ވަގުތުގައި ބީލަމަށް ރެޖިސްޓްރީ ވުމަށް އެދި ފޯމް ހުށަހަޅައި ބީލަމުގައި ރެޖިސްޓްރީ ވެފައިވާ ފަރާތްތަކަށެވެ.
ބީލަމަށް އަގު ހުށަހެޅުން އޮންނާނީ މިމަހުގެ 23 ވަނަ ދުވަހުގެ 9 ޖަހާއިރުކަމަށް ސިޓީ ކައުންސިލުން ބުނެއެވެ.
މާލޭގެ ހުރިހާ މިސްކިތްތަކެއްގައި ސީސީޓީވީ ކެމެރާ ހަރުކުރުމަށް އިއުލާންކޮށްފައިވާއިރު މިފަހަކަށް އައިސް މިސްކިތްތަކަށް ކުރަންޖެހޭ އިޚުތިރާމް ކުޑަވާ ގޮތަށް މިސްކިތްތަކުގައި ބައެއް މީހުންގެ އަމަލުތައް ބަހައްޓަމުން އަންނަ ކަމުގެ ޝަކުވާ ބޮޑުވެ އެކަމުގެ ކަންބޮޑުވުން އާންމުން ފާޅުކުރަމުންދަނިކޮށެވެ. އެގޮތުން މިސްކިތްތަކުގައި މަސްތުވާތަކެތި ބޭނުންކުރުމާއި މިސްކިތުން ވައްކަންކުރުން ފަދަ ޝަކުވާތައް އަންނަނީ ކުރަމުންނެވެ.
