ހުކުރު މިސްކިތުގެ ހާލަތު ބަލައި، އަމަލީ މަސައްކަތްކުރުމަށް، މިމަހުގެތެރޭގައި އިންޑިޔާގެ ޓީމެއް އަންނާނެ: ޠާރިޤް
މުޅި މިސްކިތުގެ ކަރަންޓް ވަޔަރިންގ އެއްކޮށް ބަދަލުކުރުމުގެ ވިސްނުން މިނިސްޓްރީން ގެންގުޅޭ
މާލޭ ހުކުރު މިސްކިތުގައި ހިނގި އަލިފާނުގެ ހާދިސާ
ހުކުރު މިސްކިތް މިހާރު ހުރި ހާލަތު ބަލައި، އެތަން މަރާމާތުކުރުމުގެ މަސައްކަތް ކުރުމަށް މިމަހުގެތެރޭގައި އިންޑިޔާގެ ޚާއްސަ ޓީމެއް ރާއްޖެ އަންނާނެކަަމަށް ހެރިޓޭޖް މިނިސްޓްރީގެ ސްޓޭޓް މިނިސްޓަރ މުޙައްމަދު ޠާރިޤް ވިދާޅުވެއްޖެއެވެ.
ދާދިފަހުން ހުކުރު މިސްކިތުގައި ހިނގައިދިޔަ އަލިފާނުގެ ހާދިސާއާ ގުޅިގެން، މިސްކިތުގައި ހުރި ލަކުޑީގެ ބައިތަކަށް ވަނީ ވަރަށް ބޮޑަށް ގެއްލުންލިބިފައެވެ. ރާއްޖެޓީވީގެ "ފަލަސުރުޚީ" ޕްރޮގްރާމްގައި މިހާދިސާއާ ގުޅޭގޮތުން ކުރެވުނު ސުވާލަށް ޖަވާބު ދެއްވަމުން ޠާރިޤް ވިދާޅުވީ، އަލިފާނުގެ ހާދިސާގައި މިސްކިތަށް ލިބިފައިވަނީ ވަރަށް ބޮޑު ގެއްލުމެއްކަމަށެވެ. ތާރީޚީ ސަގާފީ ތަރިކައަކަށް ކުޑަ ގެއްލުމެއް ލިބުނަސް އިޔާދަނުކުރެވޭ ގެއްލުމަކަށް ވާނަމަ އެކަމެއް ވާނީ ވަރަށް ބޮޑު ގެއްލުމަކަށްކަމަށް ޠާރިޤް ވިދާޅުވިއެވެ. މިސްކިތުގައި އަލިފާނުގެ ހާދިސާ ހިނގާފައިވަނީ ކަރަންޓް ޝޯޓެއްގެ ސަބަބުންނެވެ.
ޠާރިޤް ވިދާޅުވީ، މިސްކިތުގެ ކަރަންޓް ވަޔަރިންގގެ ކަންކަން މިވަގުތަށް އެހުރީ އެންމެ ރަނގަޅަށް ހައްލުކުރެވިފައިކަމަށެވެ. ނަމަވެސް މުޅި މިސްކިތުގެ ކަރަންޓް ވަޔަރިންގ އެއްކޮށް ބަދަލުކުރުމުގެ ވިސްނުން މިނިސްޓްރީން ގެންގުޅޭ ކަމަށެވެ. އަދި އެކަންކުރާނީ އިންޑިޔާ ޓީމު އައުމަށްފަހު ދެން ކުރިޔަށްދާ މަރާމާތުތަކުގެ ތެރޭގައިކަމަށް ޠާރިޤް ވިދާޅުވިއެވެ.
އަލިފާނުގެ ސަބަބުން މިސްކިތުގެ ލަކުޑީގެ ބައިތަކުގައި އަލިފާން ހިފާފައިވާ ކަމަށާއި, ބައެއް ލަކުޑިތައް ދެއްޔަށް ވާން ކައިރިވެފައި ހިސާބުގައި ހުރިކަމަށް ޠާރިޤް ވިދާޅުވިއެވެ.
އިންޑިޔާގެ އެހީތެރިކަމާއެކު، ހުކުރު މިސްކިތް ހިމާޔަތްކޮށް މަރާމާތުކުރުމުގެ މަސައްކަތް އަންނަނީ ކުރަމުންނެވެ. އެގޮތުން އާރކިއޮލޮޖިކަލް ސާވޭ އޮފް އިންޑިއާ (އޭ.އެސް.އައި)ގެ ޓީމެއް ވަނީ ރާއްޖެ އައިސް ވަނީ އެމަސައްކަތް ކޮށްފައެވެ. އެމަސައްކަތް ލަސްވެފައިވަނީ މަސައްކަތް ފެށިތަނާ ކޮވިޑްގެ ހާލަތު ކުރިމަތިވެ ލޮކްޑައުންކުރުމުގެ ސަބަބުންނެވެ. ނަމަވެސް މިއަހަރުގެ އޭޕްރީލް މަހު އަލުން މިޓީމު ވަނީ ރާއްޖެއައިސް އެމަސައްކަތްކޮށްފައެވެ.
ހުކުރު މިސްކިތަކީ ދިވެހިރާއްޖޭގައި ހުރި އެންމެ އާސާރީ އަދި އެންމެ އެންމެ ރީތި އެއް މިސްކިތެވެ. މި މިސްކިތް ބިނާކުރެވިފައިވަނީ އައްސުލްޠާން އިބްރާހީމް އިސްކަންދަރު 1ގެ ރަސްކަމުގައި، 1658 ވަނަ އަހަރުގައެވެ. އޭރު މިސްކިތް އިމާރާތް ކުރުމަށް ބޭނުން ކުރީ ހިރިގަލެވެ. އަދި މަސައްކަތުގެ މާހިރުން ވަނީ، ސިމެންތި، މޯޓާ އަދި ލައިމް ފަދަ އެއްވެސް އެއްޗެއް ބޭނުން ކުރުމެއް ނެތި، ހިރިގަލުގައި ބިންވަޅުނަގައި، އެއްގާ އަނެއްގަލާ ގުޅުވައިގެން އިމާރާތްކޮށްފައެވެ. މި މިސްކިތް 2008ވަނަ އަހަރު ޔުނެސްކޯގެ ދުނިޔޭގެ ތަރިކައިގެ ވަގުތީ ލިސްޓުގައި، ހިމެނުނެވެ. މާލޭ ހުކުުރު މިސްކިތަކީ 360 އަހަރަށްވުރެ ގިނަ ދުވަސް ވެފައިވާ އާސާރީ ބިނާއެކެވެ.
