މިދިޔަ ފެބްރުއަރީ މަހު އަރިދަފުސް ރޯގާއާއި ބޭރަށް ހިންގުމުގެ ކޭސްތައް އިތުރުވެފައިވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން އާންމުކޮށްފައިވާ "ރޯގާގެ ގޮތުގައި ފެތުރެމުންދާ ބަލިތަކުގެ ހާލަތު" ގައި ވާގޮތުން ޖެނުއަރީ މަހާ އަޅާބަލާއިރު ފެބްރުއަރީ މަހު މި ދެ ރޯގާ ވަނީ އިތުރުވެފައެވެ.

މިގޮތުން ފެބްރުއަރީ މަހު އަރިދަފުސް ރޯގާގެ 30،628 ކޭސް ފެނިފައިވާއިރު، މިއަހަރުގެ ޖެނުއަރީ މަހު ރިޕޯޓުކޮށްފައިވަނީ އަރިދަފުސް ރޯގާގެ 29،307 ކޭހެވެ. މިއީ މިދިޔަ އަހަރުގެ މި މުއްދަތާ އަޅާ ބެލިނަމަވެސް އިތުރު އަދަދެއް ކަމަށް އެޗްޕީއޭއިން ހާމަކުރެއެވެ. މިދިޔަ އަހަަރުގެ ޖެނުއަރީ މަހު ރިޕޯޓުކޮށްފައިވަނީ އަރިދަފުސް ރޯގާގެ 25،554 ކޭހެވެ. އަދި މިދިޔަ އަހަރުގެ ފެބްރުއަރީ މަހު ރިޕޯޓުކޮށްފައިވަނީ 16،125 ކޭހެވެ.

އެޗްޕީއޭއިން ބުނީ މިއަހަރުގެ ޖެނުއަރީ މަހާ އަޅާ ބަލާއިރު ފެބްރުއަރީ މަހު އިންފްލުއެންޒާގެ އަލާމާތްތައް ހުރެގެން ޓެސްޓު ކުރި އަދަދުވެސް އިތުރުވެފައިވާކަމަށެވެ.

މީގެ އިތުރުން ބޭރަށް ހިންގުންވެސް ފެބްރުއަރީ މަހު ވަނީ އިތުރުވެފައެވެ. ޖެނުއަރީ މަހު ބޭރަށް ހިންގުމުގެ 3،502 ކޭސް ފެނިފައިވާއިރު، ފެބްރުއަރީ މަހު ބޭރަށް ހިންގުމުގެ 4،357 ކޭސް ފެނިފައިވެއެވެ. މިދިޔަ އަހަރުގެ ފެބްރުއަރީ މަހާ އަޅާ ބަލާއިރުވެސް މި އަދަދު މައްޗެވެ. މިދިޔަ އަހަރުގެ ފެބްރުއަރީ މަހު ރިޕޯޓުކޮށްފައިވަނީ ބޭރަށް ހިންގުމުގެ 2،742 ކޭހެވެ.

އެޗްޕީއޭއިން ބުނީ އަރިދަފުސް ރޯގާއާއި ބޭރަށް އިތުރުވެފައިވީނަމަވެސް ޑެންގީހުމުގެ ކޭސްތައް މަދުވެފައިވާކަމަށެވެ. ޖެނުއަރީ މަހު ޑެންގީހުމުގެ 198 ކޭސް ރިޕޯޓުކޮށްފައިވާއިރު ފެބްރުއަރީ މަހު މި އަދަދު ވަނީ 145 އަށް ދަށްވެފައެވެ.

އަރިދަފުސް ރޯގާއާއި ބޭރަށް ހިންގުން އިތުރުވެފައިވާތީ މި ބަލިތަކުން ރައްކާތެރިވެތިބުމަށް އެޅޭނެ ފިޔަވަޅުތައް އެޅުމަށް އެޗްޕީއޭއިން ނަސޭހަތްތެރިވެއެވެ. އަދި ޑެންގީ ހުމުގެ ކޭސްތައް މަދުނަމަވެސް ރައްކާތެރިވެތިބުމަށް އެޗްޕީއޭއިން ވަނީ ނަސޭހަތްތެރިވެފައެވެ.