ގާސިމްގެ ފާޑުކިޔުން ސަރުކާރަށް: "ޖޭޕީ ސްލޮޓްތަކުން އިސްތިއުފާދޭންޖެހޭ ނަމަ، ރައީސް ވެސް އިސްތިއުފާދެއްވަން ޖެހިވަޑައިގަންނަވާނެ"
ޤާސިމް ވަނީ ސަރުކާރަށް ވެސް ފާޑު ވިދާޅުވެފަ
ގާސިމް އިބްރާހިމް
ރައީސް އިބްރާހީމް މުހައްމަދު ޞާލިހުގެ ސަރުކާރުގައި ތިބި ޖުމްހޫރީ ޕާޓީގެ ބޭފުޅުން އިސްތިއުފާ ދެއްވަން ޖެހިވަޑައިގަންނަވާނަމަ ރައީސް ޞާލިހު ވެސް އިސްތިއުފާދެއްވަން ޖެހިވަޑައިގަންނަވާނެ ކަމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހީމް ވިދާޅުވެއްޖެއެވެ.
ރިޔާސީ އިންތިޚާބުގައި ޖުމްހޫރީ ޕާޓީން ވަކިން ވާދަ ކުރުމަށް އެ ޕާޓީން ވަނީ އަންގާރަ ދުވަހު ނިންމާފައެވެ. މިގޮތަށް އެ ޕާޓީން ނިންމާފައިވަނީ އަންގާރަ ދުވަހު ކުރިއަށްދިޔަ އެ ޕާޓީގެ 151 ވަނަ ކައުންސިލް ބައްދަލުވުމުގައެވެ. މި ބައްދަލުވުމުގައި ހުރިހާ މެމްބަރުން ވަނީ މި ނިންމުމަށް އިއްތިފާގުވެފައެވެ. އެ ޕާޓިން ނިންމާފައިވަނީ ރިޔާސީ އިންތިޚާބުގައި، ޖުމްހޫރީ ޕާޓީން އިސްވެ އުފައްދާ ކޯލިޝަނަކުން ވާދަކުރުމަށެވެ. އެއާއެކު ބުދަ ދުވަހު މަޖިލީހުގައި ސަރުކާރަށް ތާއީދުކުރައްވާ އެމްޑީޕީގެ މެމްބަރުން ވަނީ ސަރުކާރުގައި ތިބި ޖޭޕީގެ ބޭފުޅުންގެ އިސްތިއުފާ އަށް ގޮވާލައްވާފައެވެ. އަދި ޖޭޕީ ކޯލިޝަނުން ބާކީނުކޮށް ބޭއްވި ހަމައެކަނި ވެރިއަކީ ރައީސް ޞާލިހު ކަމަށް ވާއިރު އެމަނިކުފާނާއި އެކުގައި ޖޭޕީއިން އިތުރަށް މަސައްކަތް ނުކުރީ ކީއްވެތޯ އެ މެމްބަރުން ސުވާލު އުފެއްދެވިއެވެ.
މަޖިލީހުގައި ޤާސިމް ވިދާޅުވީ ބައެއް މެމްބަރުން ޖޭޕީއިން އިންތިޚާބުގައި ވަކިން ވާދަކުރުމަކީ ލަދުވެތިކަމެއް ކަމަށް ދެއްކި ނަމަވެސް އެއީ އެއްގޮތަކަށް ވެސް ލަދުވެތި ކަމެއް ނޫން ކަމަށެވެ. ޖޭޕީ އިން ކޯލިޝަންގައި ދެމި އޮތީ ސަރުކާރު ގެންނަން ޖޭޕީ އިން ވެސް މަސައްކަތްކޮށްގެން ކަމަށް ޤާސިމް ވިދާޅުވިއެވެ. އަދި ޖޭޕީ އަށް ކޯލިޝަނުން ދޭން އަހުދުވި މިންވަރު ދެވުނުތޯ ސަރުކާރުން ސުވާލުކޮށްލަން ޖެހޭ ކަމަށް ވެސް ގާސިމް ވިދާޅުވިއެވެ. ޖޭޕީގެ އެއްވެސް ބޭފުޅަކު މަޤާމުން އިސްތިއުފާދެއްވަން ވިދާޅުނުވާނެ ކަމަށް ގާސިމް ވިދާޅުވިއެވެ.
ގާސިމް ވިދާޅުވީ ކޯލިޝަންގައި ޖޭޕީ އޮތީ މި އަހަރުގެ ނޮވެމްބަރު މަހުގެ 19 އާއި ހަމައަށް ދެމިގެންދާ އެއްބަސްވުމެއްގެ ދަށުން ކަމަށެވެ. އަދި ޖޭޕީ އަށް ދެއްވި މަޤާމުތަކަކީ އެއްވެސް މީހެއްގެ ތަރިކަ މުދަލަކުން ދެއްވާފައިވާ އެއްޗެއް ނޫން ކަމަށް ގާސިމް ވިދާޅުވިއެވެ. މީގެ އިތުރުން ޤާސިމް ވަނީ ސަރުކާރަށް ވެސް ފާޑު ވިދާޅުވެފައެވެ. އެގޮތުން ރާއްޖެ ކުރިއަރުވަން ހުރިހާ ސަރުކާރުތަކުން މަސައްކަތް ކުރަން ޖެހޭ ކަަމަށް ވާއިރު މި ސަރުކާރުން ކުރާ މަސައްކަތުގެ އަގު ބޮޑުވެފައި ސްޕީޑް ދަށް ކަމަށް ގާސިމް ވިދާޅުވިއެވެ.
