ކުނީގެ ބިލަށް ޗާޖު ކުރާނީ ސްޓެލްކޯގެ ބިލް ހަދާ މުއްދަތައް: ވެމްކޯގެ އެމްޑީ
ކުނީގެ ޚިދުމަތަށް ނަގާ ފީއަށް ބަދަލެއް ނާންނާނެ
ވެމްކޯގެ މެނޭޖިންގ ޑިރެކްޓަރު ސިރާޖު
ކަރަންޓް ބިލާއި، ކުނީގެ ބިލް އެއްކުރުމުން ކުނީގެ ބިލް ޗާޖު ކުރެވިގެންދާނީ ސްޓެލްކޯގެ ބިލުގައި އިންނަ މުއްދަތައް ކަމަށް ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން ސިރާޖު ވިދާޅުވީ ކުނީގެ ޚިދުމަތަށް ނަގާ ފީއަށް ބަދަލެއް ނާންނަ ކަމަށާއި، ދުވާލަކަށް ނަގަމުންދާ 04 ރުފިޔާ 93 ލާރި ނަގަމުންދާ ކަމަށެވެ. އަދި ވެމްކޯގެ ބިލާއި ސްޓެލްކޯގެ ކަރަންޓު ބިލު އެއްކޮލުމާއެކު ކުނީގެ ބިލް ޗާޖު ކުރަމުންދާނީ ސްޓެލްކޯއިން ކަރަންޓް ބިލަށް ރީޑިން ނަގާ މުއްދަތަށް ކަމަށެވެ. ސިރާޖު ވިދާޅުވީ ސްޓެލްކޯއިން 35 ދުވަހަށް ރީޑިން ނަގާނަމަ ވެމްކޯގެ ބިލް ވެސް ޗާޖު ކުރާނީ 35 ދުވަހަށް ކަމަށެވެ. އެހެންކަމުން އެކި މަސްތަކަށް ބިލް ކުރެވޭ އަދަދު ތަފާތުވާނެކަން އޭނާ ފާހަގަކުރެއްވިއެވެ.
ސިރާޖު ވިދާޅުވީ ކަރަންޓް ބިލާއެކު ކުނީގެ ބިލް ވެސް ދައްކަންޖެހޭނެ ކަމަށާއި، ވަކިވަކިން ބިލް ނުދެއްކޭނެ ކަމަށެވެ. މާލެ ސަރަހައްދުގެ ހުރިހާ ގޭބިސީއެއް ކުންޏަށް ރަޖިސްޓްރީ ކުރުމަށް ކުރި މަސައްކަތުގެ ނަތީޖާ އެހައި ރަނގަޅު ނޫންކަން ފާހަގަކުރައްވައި ސިރާޖު ވިދާޅުވީ ސްޓެލްކޯގެ ބިލާ އެއްކުރުމުން ބިލަށް ފައިސާ ހޯދުމުގައި މިހާރު ދިމާވަމުންދާ ދަތިތައް ހައްލުވާނެ ކަމަށެވެ.
ކުނި ނެގުމުގެ ޚިދުމަތަށް ވެމްކޯއަށް ރަޖިސްޓްރީވެފައިވަނީ ގާތްގަނޑަކަށް 24،000 ކަސްޓަމަރުންނެވެ. ނަމަވެސް މި ބަދަލާއެކު 50،000 އަށްވުރެ ގިނަ ގޭބީސީއަށް ބިލް ކުރެވިގެންދާނެ އެވެ.
