ލިވަޕޫލް ޓެސްޓަށް ޔުނައިޓެޑު އޮތީ ފުރިހަމައަށް ތައްޔާރަށް: ޓެން ހާގް
5 މާރިޗު 2023 | އާދީއްތަ 02:24ޓެން ހާގް ބުނީ، އެ މެޗު ވަރަށް އުނދަގޫވާނެ ކަމަށާއި، ރަނގަޅު ނަތީޖާއެއް ނެރުމަށް ބޮޑު ޤުރުބާނީއެއް ވާން ޖެހޭކަން ވެސް އެނގޭ ކަމަށް
މެންޗެސްޓަރ ޔުނައިޓެޑުގެ ކޯޗު އެރިކް ޓެން ހާގް
އިނގިރޭސި ޕްރިމިއާ ލީގުގައި ވާދަވެރި ލިވަޕޫލާ ދެކޮޅަށް ކުޅޭ މެޗަށް މެންޗެސްޓަރ ޔުނައިޓެޑު އޮތީ ފުރިހަމައަށް ތައްޔާރަށް ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.
ޓެން ހާގް މިހެން ބުނީ ޕްރިމިއާ ލީގުގައި އާދިއްތަ ދުވަހުގެ ރޭ ލިވަޕޫލްގެ ދަނޑުގައި އެ ޓީމާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ.
އޭނާ ބުނީ ލިވަޕޫލް މެޗަށް ނުކުންނައިރު ކުޅުންތެރިންނާއި އޭނާ ވެސް ހުރީ ވަރަށް ބޮޑު އިތުބާރެއްގައި ކަމަށެވެ. އަދި ލިވަޕޫލްގެ އެންފީލްޑުގައި މާހައުލު އޮންނާނެ ގޮތް ތަފާތު ވާނެ ކަން އޭނާ އަށް އެނގޭ ކަމަށެވެ. ލިވަޕޫލް މެޗަކީ ވަރަށް ބޮޑު ޓެސްޓެއް ކަމަށާއި މެޗަށް ނުކުންނަނީ ލިވަޕޫލާ ދެކޮޅަށް ކަމަށް ވެސް ޓެން ހާގް ބުންޏެވެ. އޭނާ ބުނީ އޭނާ އަށް ޔުނައިޓެޑުގެ ކުޅުންތެރިން އެނގޭ ކަމަށާއި، މެޗަށް ނުކުންނަނީ ވަރަށް ފުރިހަމައަށް ތައްޔާރުވެގެން އިތުބާރާއެކު ކަމަށެވެ. މީގެ އިތުރުން އެ މެޗު ވަރަށް އުނދަގޫވާނެ ކަމަށާއި، ރަނގަޅު ނަތީޖާއެއް ނެރުމަށް ބޮޑު ޤުރުބާނީއެއް ވާން ޖެހޭކަން ވެސް އެނގޭ ކަމަށް ވެސް އޭނާ ބުންޏެވެ.
އިތުރަށް ވާހަކަ ދައްކަމުން ޓެން ހާގް ބުނީ އޭނާ ޤަބޫލު ކުރާ ގޮތުގައި ލިވަޕޫލްގައި ތިބި ކުޅުންތެރިންނާއި، ކޯޗިން ސްޓާފުންނަކީ ވަރަށް މޮޅު ބައެއް ކަމަށެވެ. ލިވަޕޫލުން ކުޅޭނީ ވަރަށް ރަނގަޅު ވައްޓަފާޅިއަކަށް ކަމަށާއި، އެ ޓީމުން އެންމެ ހީނުކުރާ ވަގުތުގައި ލަނޑު ވެސް ދީފައި ހުރި ކަމަށް ވެސް ޓެން ހާގް ބުންޏެވެ. އަދި އޭނާގެ ނަޒަރުގައި މި ސީޒަންގައި ލިވަޕޫލްގެ ނަތީޖާ ދަށްވި ނަމަވެސް އެ ޓީމާ ދެކޮޅަށް ކުޅުމަކީ އުނދަގޫ ކަމެއް ކަމަށާއި އޭނާގެ ކުޅުންތެރިންނަށް އަބަދު ވެސް އިތުބާރު އޮންނަ ކަމަށް އޭނާ ބުންޏެވެ. އަދި ކުޅުންތެރިންގެ ކުރާ މަސައްކަތުން ނަތީޖާ ނެރެވޭނެ ކަމަށް ޤަބޫލުކުރާ ކަމަށް ވެސް ޓެން ހާގް ބުންޏެވެ.
ޕްރިމިއާ ލީގުގައި ލިވަޕޫލްގެ ދަނޑުގައި ޔުނައިޓެޑުން އެ ޓީމާ ދެކޮޅަށް ނުކުންނާނީ އާދިއްތަ ދުވަހުގެ ރޭ ރާއްޖެ ގަޑިން 21:30 ގައެވެ.
