ދުވާފަރު ކޮރަޕްޝަން މައްސަލައިގައި ކައުންސިލްގެ 8 މީހަކަށް ދައުވާކުރަން ފޮނުވައިފި
މި މައްސަލަ ފެންމަތިވީ މިދިޔަ އަހަރު ޖުލައި މަހު
ދުވާފަރު ކައުންސިލްގެ ބައްދަލުވުމެއް --
ކޮރަޕްޝަންގެ ތުހުމަތު ކުރެވޭ ރ. ދުވާފަރު ކައުންސިލް މެންބަރުންނާއި އެ ކައުންސިލްގެ ބައެއް އިދާރީ މުވައްޒަފުންގެ މައްޗަށް ދައުވާ ކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ)އިން ޕްރޮސިކިއުޓާ ޖެނެރަލް އޮފީސް (ޕީޖީ)އަށް ފޮނުވައިފިއެވެ.
މީޑިއާތަކަށް އޭސީސީން ހިއްސާކުރި މައުލޫމާތުގައި ބުނެފައިވަނީ ލޯކަލް ގަވަރމަންޓް އޮތޯރިޓީ (އެލްޖީއޭ)އިން އެކުލަވައުލި ދުވާފަރު ކައުންސިލްގެ ހައްސަ މޮނީޓަރިން ރިޕޯޓަކުން ފާހަގަވި ކޮރަޕްޝަންގެ މައްސަލައާ ގުޅިގެން 12 މީހެއްގެ މައްސަލަ ތަހުގީގު ކުރި ކަމަށެވެ. އަދި އޭގެ ތެރެއިން އަށް މީހެއްގެ މައްޗަށް ދައުވާ ކޮށްދިނުމަށް އެދިފައިވާ ކަމަށާއި އޭގެެ ތެރޭގައި އެ ކައުންސިލްގައި އޭރު ތިބި މެންބަރުންނާއި މުވައްޒަފުން ހިމެނޭ ކަމަށް އޭސީސީން ބުންޏެވެ.
ދައުވާ ކޮށްދިނުމަށް އެދި ޕީޖީއަށް ފޮނުވި އަށް މީހުންނަކީ
މި އެންމެންގެ މައްޗަށް ވެސް ކޮށްދޭން އެދިފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ކުށުގެ ދައުވާ އާއި ދައުލަތުގެ މުދަލާއި ފައިސާއަށް ހިޔާނާތްތެރިވުމުގެ ކުށުގެ ދައުވާ އާއި ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ކުށުގެ ދައުވާއެވެ.
އޭސީސީން ބުނީ އުސޫލުތަކާ ހިލާފަށް ގިނަ އަދަދެއްގެ ފައިސާގެ މުއާމަލާތްތަކެއް ހިންގާފައިވާކަން ފާހަގަކުރެވުނު މި މައްސަލަ، މިދިޔަ އަހަރުގެ ޖުލައި މަހު އެ ކޮމިޝަނަށް ހުށަހެޅުމާއެކު، ހާއްސަ ޓީމަކުން ދުވާފަރަށް ގޮސް ތަހުގީގަށް ބޭނުންވާ މައުލޫމާތު އެއްކުރި ކަމަށެވެ. އަދި ދެމަސްދުވަސް ތެރޭގައި މައްސަލައިގެ ތަހުގީގު ނިންމައި ޑިއުޓީ ޕްރޮސިކިއުޝަނަށް ފޮނުވާފައިވާ ކަމަށް އެ ކޮމިޝަނުން ބުންޏެވެ.
މީގެ އިތުރުން، ދައުވާކޮށްދިނުމަށް އެދި ޕްރޮސިކިއުޓާ ޖެނެރަލްގެ އޮފީހަށް ފޮނުވާފައި ވަނީ ޑިއުޓީ ޕްރޮސިކިއުޝަން މަރުހަލާގައި ޕްރޮސިކިއުޓާ ޖެނަރަލްގެ އޮފީހުން އިސްލާހުކުރުމަށް އެންގި ކަންކަން އިސްލާހު ކުރުމަށް ފަހުގައި ކަމަށް ވެސް އެ ކޮމިޝަނުން ބުނެއެވެ.
