މެންބަރު ރިޒާގެ ހަނދާނުގައި ސުކޫތެއް
ހޯމަ ދުވަހުން ފެށިގެން ތިން ދުވަސް ވަންދެން ރިޒާގެ ތައުޒިޔާގެ ދަފްތަރެއް މަޖިލީހުގެ އިދާރާގައި އޮންނާނެ
އިބްރާހިމް ރިޒާ
ރައްޔިތުންގެ މަޖިލީހުގެ ކ. ގުރައިދޫ ދާއިރާގެ މެންބަރު އިބްރާހީމް ރިޒާގެ ހަނދާނުގައި ރައްޔިތުންގެ މަޖިލީހުގައި ހަމަ ހިމޭންކަމުގެ ސުކޫތެއް ގެނެސްފިއެވެ.
ހޯމަ ދުވަހުގެ ޖަލްސާގައި މަޖިލީހުގައި ސުކޫތެއް ގެނެސްފައި ވަނީ މަޖިލީހުގެ ޖަލްސާގެ މަސައްކަތްތައް ފެށުމުގެ ކުރިންނެވެ. އެ ޖަލްސާގައި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވަނީ ރިޒާގެ ޚިދުމަތްތަކަށް އަލިއަޅުވާލައްވާފައެވެ. މެންބަރު އިބްރާހީމް ރިޒާ އަވަހާރަވެފައި ވަނީ އަލާސްވެ އުޅުއްވާ މެލޭޝިއާގައި ފަރުވާ ހޯއްދަވަމުން ދަނިކޮށެވެ. އޭނާ އަވަހާރަވީ ފެބްރުއަރީ 22 ވަނަ ދުވަހުގެ ރޭގެ ވަގުތެއްގައެވެ.
17 ވަނަ ރައްޔިތުންގެ މަޖިލީހުން ފެށިގެން ގުރައިދޫ ދާއިރާގެ މެންބަރުކަން ކުރައްވަމުންދާ ރިޒާ އަކީ މަޖިލީހުގައި މުހިންމު މަސައްކަތްތަކުގައި ޝާމިލްވެވަދައިގަންނަވާފައިވާ ބޭފުޅެކެވެ. ތިން ދައުރު މަޖިލީހުގައި ޚިދުމަތްކުރައްވާފައިވާ ރިޒާ އަކީ ރާއްޖޭގެ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީ އާއި ޖުޑިޝަރީ ކޮމިޓީ އާއި ސަލާމަތީ ހިދުމަތްތަކާބެހޭ ކޮމެޓީ އާއި ޖުޑިޝަރީ ކޮމެޓީގެ ޖޮއިންޓް ކޮމެޓީ އާއި ބަޖެޓު ދިރާސާކުރާ ކޮމެޓީ އާއި އެމްއެމްޕީއާރުސީ މައްސަލަ ދިރާސާކުރެއްވި ކޮމިޓީ އާއި މިނިވަން މުއައްސަސާތަކުގެ ކޮމެޓީ ފަދަ މުހިންމު ކޮމިޓީތަކުގައި މަސައްކަތްކުރައްވާފައިވާ ބޭފުޅެކެވެ.
ރިޒާ ވަނީ އަދާކުރައްވާފައިވާ މަޤާމުތަކަށް ބަލާ އިރު 18 ވަނަ ރައްޔިތުންގެ މަޖިލީހުގައި ގައުމީ ސަލާމަތު ކޮމެޓީގެ މުގައްރިރު ކަމާއި 17 ވަނަ ރައްޔިތުންގެ މަޖިލީހުގައި އިމްތިޔާޒު ކޮމެޓީގެ މުގައްރިރު ކަމުގެ އިތުރުން އެ ކޮމެޓީގެ މުގައްރިރުގެ ނައިބުކަން އަދާކުރައްވާފައިވެއެވެ. އަލްމަރްހޫމް ރިޒާގެ ތައުޒިޔާގެ ދަފުތަރެއް އެކުލަވާލާ ހޯމަ ދުވަހުން ފެށިގެން ތިން ދުވަސް ވަންދެން މަޖިލީހުގެ އިދާރާގައި އެ ދަފްތަރު ބޭއްްވުމަށް ވަނީ ހަމަޖެހިފައެވެ. އެ ދަފްތަރުގައި އާންމުންނަށްވެސް ސޮއިކުރުމުގެ ފުރުސަތު އޮންނާނެ ކަމަށް ރައީސް ނަޝީދު ވިދާޅުވި އެވެ.
