ކޮންމެ މީހަކަށްވެސް ގޯސް ހެދޭނެ، އެހެންނަމަވެސް، މާފުކޮށް، ހިތް ޚަލާސް ކުރަންޖެހޭކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

ޖުމްހޫރީ ޕާޓީގެ ހަތަރުވަނަ ޤައުމީ ކޮންފަރެންސް ނިންމުމުގެ ރަސްމިއްޔާތުގައި ވާހަަކަ ދައްކަވަމުން ޤާސިމް ވިދާޅުވީ، ޖުމްހޫރީ ޕާޓީއަކީ ދެވަނައަށް ރާއްޖޭގައި އެންމެ ދޮށީ ޕާޓީ ކަމަށެވެ.

ޤާސިމް ވިދާޅުވީ، އެއްވެސް މީހަކާމެދު ހިތްހަމަނުޖެހުމެއް ނެތް ކަމަށެެވެ.

މި ރަސްމިއްޔާތުގައި އެމްޑީޕީގެ ރައީސް މުޙައްމަދު ނަޝީދުވެސް ބައިވެރިވެވަޑައިގެންފައިވާއިރު، ޤާސިމް ވަނީ ރައީސް ނަޝީދަށް އަމާޒުކުރައްވައި މާޒީގެ ބައެއް ވާހަކަތައް ހިއްސާ ކުރައްވާފައެވެ. އެގޮތުން ރައީސް ނަޝީދުގެ ވެރިކަން ވެއްޓިގެން ދިޔަ ގޮތުގައިވެސް ފޮރުވިފައިވާ ފިލާވަޅުތަކެއް ހުންނާނެކަމަށް ޤާސިމް ވިދާޅުވިއެވެ.

ޤާސިމް ވަނީ ރައީސް ނަޝީދަށް ތައުރީފު ކުރައްވައިވެސް ވާހަކަ ދައްކަވާފައެވެ.

ޤާސިމް އިތުރަށް ވިދާޅުވީ، ބޭނުންފުޅު ވަނީ ދިވެހި ރައްޔިތުންނަށް ޚިދުމަތް ކޮށްދިނުމުގައި ވެދެވެން އޮތް އެންމެ ބޮޑު އެހީތެރިކަމެއް ވެދިނުމަށް ކަމަށެވެ.

ކޮންމެ މީހަކީވެސް އިންސާނެއް ކަމަށާއި، ގޯސް ހެދުމާއި ދެރަ ކަންކަން ކުރެވުމަކީ ކޮންމެ މީހަކަށްވެސް ވެދާނެ ކަންކަން ކަމަށް ޤާސިމް ވިދާޅުވިއެވެ. އެހެންނަމަވެސް، މާފުކޮށް، ހިތް ޚަލާސް ކުރަންޖެހޭކަމަށް ޤާސިމް ވިދާޅުވިއެވެ.

ޤާސިމް ވަނީ ކޮންމެ މީހަކުވެސް އިހުލާސްތެރި ނިޔަތާއެކު ކަންކަން ކުރުމަށް އިލްތިމާސް ކުރައްވާފައެވެ.  

ޖޭޕީ އުފެދުނީއްސުރެ ވެސް އެ ޕާޓީގެ ލީޑަރުގެ މަގާމު ފުރުއްވަމުން ގެންދަވަނީ ގާސިމެވެ. މިއީ އޭނާ މި މަގާމަށް އިންތިހާބުވީ ހަތަރުވަނަ ފަހަރެވެ.