ނިއުކާސަލް ޔުނައިޓެޑް 2-0 އިން ބަލިކޮށް ކަރަބޯކަޕް ފުޓްބޯޅަ މުބާރާތް ކާމިޔާބުކުރުމުގެ އުފާ އެތައް ހާސް ގުނައަކަށް މެންޗެސްޓާ ޔުނައިޓަށް ބޮޑުވެއްޖެ އެވެ.

މިއީ 2017 ވަނަ އަހަރުގެ ފަހުން ޔުނައިޓެޑަށް ލިބުނު ފުރަތަމަ ތައްޓެވެ. އަދި ކީޕަރު ޑޭވިޑް ޑެހަޔާ ފިޔަވައި ޓީމުގައި ތިބި ކުޅުންތެރިންނަށް ޔުނައިޓެޑްގެ ޖާޒީގައި ތައްޓެއް ލިބުނު ފުރަތަމަ ފަހަރެވެ. އަދި މިއީ މި ސީޒަން ފެށުމުގެ ކުރިން ޓީމާ ހަވާލުވި ކޯޗު އެރިކް ޓެންހަގަށް ވެސް ޔުނައިޓެޑްގައި ލިބުނު ފުރަތަމަ ތައްޓެވެ.

މިހެންވެ ޔުނައިޓެޑްގެ ކުޅުންތެރިންނާއި އޮފިޝަލުން އަދި ސަޕޯޓަރުން ވެސް ވަނީ މި ތަށި ލިބުމުގެ އުފާ ފާޅުކުރަމުންނެވެ.

ތަށި އުފުލާލުމަށްފަހު ކެޕްޓަން ބުރޫނޯ ފެނާންޑޭޒް ބުނީ ޔުނައިޓެޑްގެ ކުޅުންތެރިން ތިބީ އިތުރު ތަށިތަކެއް ހޯދަން ކެތްމަދުވެފައި ކަމަށެވެ.

އޭނާ އަދި ބުނީ މިވަރން މި ސީޒަނުގައި ވެސް ނުފުދޭނެ ކަމަށެވެ.

މި މެޗުގައި ޔުނައިޓެޑަށް ގޯލު ޖަހައިދިނީ ފުރަތަމަ ހާފުގައި ކަސެމީރޯ އާއި މާކަސް ރަޝްފޯޑެވެ.