ރައީސްގެ އިތުބާރު ނެތްކަމުގެ ވޯޓު ނަގާނެ ކަމުގެ އިންޒާރު ދީފި
މަޖިލީހުގެ ރައީސް ވަކިކުރުމަށްޓަކައި ވޯޓު ހަމަކުރަން މަސައްކަތް ފަށައިފިނަމަ ރައީސް ސާލިހުގެ އިތުބާރު ނެތްކަމުގެ ވޯޓު ހަމަކުރުމުގެ މަސައްކަތް ފަށާނެ ކަމަށް ވިދާޅުވި
ދެރައީސުންގެ ހިޔާލު ތަފާތުވުން
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ އިތުބާރު ނެތް ކަމަށް ފާސްކުރަން ވޯޓު ހަމަކުރުމުގެ މަސައްކަތް ފަށާނެ ކަމުގެ އިންޒާރު ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަލީ އާޒިމް ދެއްވައިފިއެވެ.
އާޒިމް މިފަދައިން އިންޒާރު ދެއްވީ ހޮނިހިރު ދުވަހު ކުރެއްވި ޓްވީޓެއްގައެވެ. އޭނާ އެގޮތަށް ވިދާޅުވީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރު ނެތްކަމުގެ ވޯޓު ނަގަން ބޭނުންވާ އަދަދު ހަމަވެފައިވާ ކަމަށް އެމްޑީޕީ ޕީޖީ ގްރޫޕުގެ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެފައިވާތީއެވެ.
އާޒިމް ކުރެއްވި ޓްވީޓުގައި ވިދާޅުވީ މަޖިލީހުގެ ރައީސް ވަކިކުރުމަށްޓަކައި ވޯޓު ހަމަކުރަން މަސައްކަތް ފަށައިފިނަމަ ރައީސް ސާލިހުގެ އިތުބާރު ނެތްކަމުގެ ވޯޓު ހަމަކުރުމުގެ މަސައްކަތް ވެސް އެ ބޭފުޅުން ފައްޓަވާނެ ކަމަށެވެ.
އޭނާގެ ޓްވީޓަށް އުންގޫފާރު ދާއިރާގެ މެންބަރު މުޙައްމަދު ވަހީދު (ވައްޑެ) ވެސް ވަނީ ތާއީދު ކުރައްވައިފައެވެ. އޭނާ ކުރެއްވި ޓްވީޓެއްގައި ވިދާޅުވީ ރައީސް ނަޝީދު ތަގުރީރު ދެއްވުމުން ވާގޮތާއި މަޖިލީހުގެ ތަޅުމުގައި ކޮންމެ ޖަލްސާއަކު އެ ތަގުރީތުތައް ދެއްވަން ފައްޓަވައިފި ނަމަ ވާނެ ގޮތް ރައީސް އިބްރާހިމް މުހައްމަދު ސާލިހަށް މާ ބޮޑަށް ސާފުވާނެ ކަމަށެވެ. އެހެންކަމުން އެމަނިކުފާނު މަގާމުން ވަކިކުރަން ނުކެރޭނެ ކަމަށް އޭނާ ވިދާޅުވިއެވެ.
ގާނޫނު އަސާސީގައިވާ ގޮތުން ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމަށް ސިމްޕަލް މެޖޯރިޓީން ފާސްވާނެއެވެ. އެއީ މިހާރު 87 މެންބަރުން ތިއްބަވާ މަޖިލީހުގެ 43 މެންބަރުންގެ ވޯޓުންނެވެ. ނަމަވެސް އެ މައްސަލަ މަޖިލިސް ތަޅުމަށް ހުށަހަޅައި ބަހުސް ފަށަން ބޭނުންވަނީ 22 މެންބަރުންގެ ސޮޔެވެ.
