ރޯދަ މަސް ފެށުމުގެ ކުރިން ހުޅުމާލޭ ދެވަނަ ފިޔަވަހީގައި އެސްޓީއޯ ރޯދަ މާޓް ގެ ނަމުގައި އައު ފިހާރައެއް ހުޅުވުމުގެ މަސައްކަތްކުރަމުން އަންނަ ކަމަށް އެ ކުންފުނީގެ މެނޭޖިން ޑިރެކްޓަރު ހުސައިން އަމްރު ވިދާޅުވެއްޖެއެވެ.
އެސްޓީއޯގެ ފިހާރައެއް ހުޅުމާލޭ ދެވަނަ ފިޔަވަހީގައި ނެތުމުން ދިމާވާ ދަތިތައް ހާމަކޮށް މީހަކު ކޮށްފައިވާ ޓްވީޓަކަށް ޖަވާބުދެއްވަމުން އަމްރު ވިދާޅުވީ ރޯދައިގެ ކުރިން އެސްޓީއޯ ރޯދަ މާޓް ހުޅުމާލޭ ދެވަނަ ފިޔަވަހީގައި ހުޅުވުމުގެ މަސައްކަތް ކުރަމުންދާ ކަމަށެވެ.
އެ ކަމުގެ މައުލޫމާތު ދެމުން އެސްޓީއޯއިން ބުނެފައިވަނީ، ހުޅުމާލޭގައި މިވަގުތު އެސްޓީއޯގެ ފިހާރަ މަރާމާތުކުރުމަށް ބަންދު ކޮށްފައި ހުރުމާއެކު، އެސްޓީއޯއިން ޒަރޫރީ ބޭނުމަށް އެތެރެކުރާ ކާބޯތަކެތި ލިބޭނޭ އެސްޓީއޯގެ ފިހާރައެއް ނެތްކަމުގެ ޝަކުވާ އެ ކުންފުންޏަށް ލިބެމުންދާ ކަމަށެވެ. އެއީ ހުޅުމާލޭ ފަދަ ބޮޑު އާބާދީއެއްގައި އެސްޓީއޯގެ ފިހާރައެއް ނެތުމުން ތަކެތީގެ އަގު ބޮޑުވެގެން ގޮސްދާނޭކަމުގެ ޝަކުވާ ކަމަށާއި އެއާއެކު މާލެއަށްދަތުރުކޮށް ކިއުގައި ޖެހެން ޖެހިދާނޭކަމުގެ ބިރު ކަމަށް އެ ކުންފުނިން ބުނެފައިވެއެވެ. އަދި އެއީ ރަނގަޅު ރޭޓެއްގައި ތަކެތިހޯދުމަށް ބާޒާރުމަތީ އެއްތަނުން އަނެއްތަނަށް ދުވަންޖެހިދާނޭކަމުގެ ނުތަނަވަސްކަން ކަމުގައި ވެސް ބުނެފައިވެއެވެ.
މިފަދަ މުހިންމު ޝަކުވާތައް ދެނެގަނެ، ޒަމާނީ ހައްލު ހޯދައިދިނުމުގެގޮތުން އެސްޓީއޯއިންވަނީ ހުޅުމާލޭ ދެވަނަ ފިޔަވަހީގެ ވިނަރެސް ފްލެޓް ތިރީގައި ރޯދަމަހަށް ހާއްސަކޮއްގެން ފިހާރައެއް ހުޅުވުމުގެ މަސައްކަތް ފަށާފައި ކަމަށާއި ބޭނުމަކީ އެސްޓީއޯގެ މުދާ ރަނގަޅު ރޭޓެއްގައި ރައްޔިތުންނަށް ފަސޭހަކަމާއެކު ފޯރުކޮއްދިނުން ކަމަށް އެސްޓީއޯއިން ބުނެއެވެ.
ފިހާރަ ހުޅުވުމުގެ މަސައްކަތް މިވަގުތު ދަނީ ބާރު ދުވެއްޔެއްގައި ކުރެވެމުން ކަމަށާއި މާޗު މަހުގެ ނިޔަލަށް ފިހާރަ ހުޅުވޭނެ ކަމަށް އަންދާޒާ ކުރެވޭ ކަމަށް ވެސް އެ ކުންފުނިން ބުނެއެވެ. އެ ފިހާރައިން އެސްޓީއޯއިން އާންމުކޮށް އެތެރެކުރެވޭ ބާވަތްތައް ލިބޭނެ ކަމަށާއި އޭގެ އިތުރުން ރޯދަމަހަށް ހާއްސަކޮއްގެން އެތެރެކުރެވޭ ފިޔާ، އަލުވި، އަދި ބިސްވެސް ލިބޭނެ ކަމަށް މައުލޫމާތު ދީފައިވެއެވެ.
