ޖަރުމަނު ލީގުގައި ހާތާ ބާލިން ބަލިކޮށް ބޮރޫޝިއާ ޑޯޓްމަންޑުން ދެ ވަނަ އަށް ޖެހިލުމާއެކު، ލީގުގެ ވާދަވެެރިކަން އިންތިހާ އަށް ބޮޑުވެއްޖެ އެވެ.

އާދިއްތަ ދުވަހުގެ ރޭ ޑޯޓްމަންޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ޑޯޓްމަންޑުން ވަނީ ދެ ލަނޑު ޖަހައި ލީޑު ނަގައިފަ އެވެ. މެޗުގެ 27 ވަނަ މިނެޓުގައި މާކޯ ރެއުސްގެ އެހީތެރިކަމާއެކު އެ ޓީމަށް ލީޑު ނަގައިދިނީ ކަރީމް އަޑޭމީ އެވެ. ޑޯޓްމަންޑުގެ ދެ ވަނަ ލަނޑު އަޑޭމީ ތަނަވަސްކޮށްދިން ފުރުސަތެއްގައި 32 ވަނަ މިނެޓުގައި ޖެހީ ޑޮންޔެލް މަލެން އެވެ. ދެ ވަނަ ހާފަށް ނިކުމެ ހާތާ ބާލިން އިން ވަނީ ލަނޑެއް ޖަހައިފަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި ސުއަޓް ސާޑާ ދިން ބޯޅައެއް ގޯލަށް ފޮނުވާލައިގެން އެ ޓީމުގެ ލަނޑު ކާމިޔާބު ކުރީ ލޫކަސް ޓުސާޓް އެވެ. އޭގެ ފަހުން ޑޯޓްމަންޑުން ވަނީ ދެ ލަނޑު ޖަހައިފަ އެވެ. އެއީ 76 ވަނަ މިނެޓުގައި ރެއުސް ޖެހި ލަނޑާއި، 90 ވަނަ މިނެޓުގައި ލޫކަސް ބްރަންޑްޓް ޖެހި ލަނޑުތަކެވެ.

މެޗުން މޮޅުވެ ޑޯޓްމަންޑު ދެ ވަނައިގައި އޮތީ ކުޅުނު 21 މެޗުން 43 ޕޮއިންޓާއެކު އެވެ. އެއް ވަނައިގައި އޮތް އެންމެ ފަހުގެ ޗެމްޕިއަން ބަޔާން މިއުނިކާއި، ތިން ވަނައިގައި އޮތް ޔޫނިއަން ބާލިން އަށް ވެސް ލިބެނީ 21 މެޗުން 43 ޕޮއިންޓެވެ. އެއީ ލީގުގައި މި ހަފްތާގައި އެ ދެ ޓީމު ކުޅުނު މެޗުން މޮޅުނުވެވުމުންނެވެ. ތިން ޓީމު އެއްވަރުވެފައި އޮތުމުން މިހާރު ލީގުގެ ވާދަވެރިން އޮތީ ބޮޑުވެފަ އެވެ.