ޔުއެފާ ޔޫރޮޕާ ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުގައި ބަދަލުކުރުމުން ހިތްހަމަނުޖެހުނު ނަމަވެސް، ރަފީނިއާ މައާފަށް އެދެފިއެވެ.

މެޗުން ބާސެލޯނާ ސަލާމަތްކޮށްދިން ލަނޑުވެސް ޖެހި ރަފީނިއާ ބަދަލުކުރީ މެޗުގެ 83 ވަނަ މިނެޓުގައެވެ. އޭނާގެ ބަދަލުގައި ކުޅެން ނުކުތީ ފެރާން ޓޮރޭސްއެވެ. އެކަމުގެ ސަބަބުން ދަނޑުން ފޭބި ވަގުތު ރަފީނިއާ ވަނީ ހިތްހަނެޖުހުން ފާޅުކޮށްފައެވެ. ނަމަވެސް އޭގެ ފަހުން ރަފީނިއާ ބުނީ މިހާރު އޭނާ ވަނީ އެކަމާ ގުޅިގެން މައާފަށް އެދިފައި ކަމަށެވެ. އޭނާ ބުނީ ކުރިއަށް އޮތް ތަނުގައި އެފަދަ ކަމެއް ތަކުރާރު ނުކުރާނެ ކަމަށެވެ. އޭނާ ބުނީ ބަދަލުކުރުމާއެކު އޭނާގެ ފަރާތުން ފެނުނު އަމަލަށް މައާފަށް އެދޭ ކަމަށެވެ. މީގެ އިތުރުން ރަފީނިއާ ބުނީ ބާސެލޯނާގެ ކޯޗު ޒަވީ ހެނާންޑޭޒްއާއި އަދި ކުލަބާމެދު އޭނާގެ އެއްވެސް ހިތްހަމަނުޖެހުމެއް ނެތްކަމަށެވެ. ރަފީނިއާ ބުނީ އޭނާ ބޭނުންވަނީ ދަނޑު މަތީގައި ހުރެ ކުޅެން ކަމަށެވެ.

އެކަމާ ގުޅޭގޮތުން ވާހަކަދައްކަމުން ބާސެލޯނާގެ ކޯޗު ޒަވީ ބުނީ، ރަފީނިއާގެ އަމަލު އޭނާއަށް ފެނުނު ކަމަށާއި، އެކަން އޭނާއަށް ގަބޫލުވެސް ކުރެވޭ ކަމަށެވެ. ރަފީނިއާ ހުރީ ބަދަލު ކުރުމުން ރުޅި ގަދަވެފައިކަން ފާހަގަކޮށް ޒަވީ ބުނީ، އޭނާވެސް ހުރީ ރުޅި އައިސްފައި ކަމަށެވެ. ޒަވީ ބުނީ މެޗުގައި އޭނާ ބަދަލު ގެންނަނީ ޓީމާމެދު ވިސްނާފައި ކަމަށާއި، އެއްވެސް ހަލެއްގައި ވަަކި ކުޅުންތެރިޔަކަށް އިނގިލި ދިއްކުރުމުގެ މަގުސަދެއް އޮވެގެން ނޫންކަމަށެވެ. ޒަވީ ބުނީ ރަފީނިއާ މިހާރު އޭނާ ގާތުން ވަނީ މައާފަށް އެދިފައި ކަމަށާއި، އޭނާއަށް އެކަން ފެންނަނީ ޕޮޒިޓިވްްކޮށް ކަމަށެވެ. ސަބަބަކީ ކޮންމެ ކުޅުންތެރިޔަކުވެސް ބޭނުންވަނީ ކުޅެން ކަމަށް ޒަވީވެސް ބުންޏެވެ.

ބާސެލޯނާގެ ދަނޑުގައި ކުޅުނު މެޗު އެއްވަރުވީ 2-2ންނެވެ. ޔޫރޮޕާ ލީގުގެ ގަދަ 16އަށް ދާނެ ޓީމެއް ކަނޑައެޅޭނީ ޔުނައިޓެޑުގެ ދަނޑުގައި ކުޅޭ މެޗުންނެވެ.