ޓީޗަރުންގެ މުސާރައިގެ މައްސަލަ: ސިވިލް ސާވިސް ކޮމިޝަނާއި ޕޭ ކޮމިޝަނުގެ ހިޔާލު ތަފާތުވުންތަކެއް

ތައުލީމީ ދާއިރާގެ މުވައްޒަފުންގެ މުސާރައިގެ އޮނިގަނޑުގައި ހުރި ކަންބޮޑުވުންތައް ހައްލުކޮށްދިނުމުގައި ސިވިލް ސާވިސް ކޮމިޝަން (ސީއެސްސީ) އާއި ނޭޝަނަލް ޕޭ ކޮމިޝަން ހިޔާލު ތަފާތުވެއްޖެއެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ވަނީ މި ދެ ކޮމިޝަނާ ބައްދަލުކޮށްފައެވެ. މިއަދުގެ ބައްދަލުވުމުގައި މަޝްވަރާ ކުރެވުނީ އަލަށް ޑިގްރީ ހަދާ ޓީޗަރުންގެ ހުރި ކަންބޮޑުވުންތަކާ މެދުގައެވެ. އެ ގޮތުން އަލަށް ޑިގްރީ ހަދާ ޓީޗަރުންނަށް އެ ޓީޗަރަކު މަސައްކަތް ކުރާ ސްކޫލެއްގައި ހުރެފައި ޕްރޮމޯޝަން ނުލިބޭ ކަމުގެ ޝަކުވާ ވަރަށް ގިނައިން ކުރެއެވެ. އެހެން ނަމަވެސް އެ ޓީޗަރު އެހެން ސްކޫލަކަށް ބަދަލުވެއްޖެނަމަ އޭނާއަށް ޑިގްރީ ފެންވަރު މަގާމަށް ޕްރޮމޯޓްވެވެއެވެ.

ސިވިލް ސާވިސް ކޮމިޝަނުގެ ނައިބު ރައީސް އިބްރާހީމް ރަޝީދު މިއަދުގެ ކޮމިޓީގައި ވިދާޅުވީ މައްސަލައަކީ ޑިޕްލޮމާގައި ރޭންކް 1ގައި ތިބޭ ޓީޗަރުން ޑިގްރީ ހެދުމުން ލެވެލް 2އަށް ޕްރޮމޯޓްނުވާ މައްސަލަ ކަމަށެވެ. އޭނާ ވިދާޅުވީ އެޑިއުކޭޝަން މިނިސްޓްރީން ބޭނުންވަނީ ޑިގްރީ ފެންވަރުގެ ޓީޗަރުން ކަމަށާއި އެހެން ނަމަވެސް މުސާރައިގެ އައު އޮނިގަނޑާއެކު ޑިގްރީ ހަދާ ޓީޗަރުން ޖެހެނީ ޕްރޮމޯޝަން ނުލިބި ދެ އަހަރު މަޑުކުރަން ކަމަށެވެ.

އިބްރާހީމް ރަޝީދު ވިދާޅުވި ގޮތުގައި އެކަމުގެ ސަބަބުން ޓީޗަރުން ވަރަށް ބޮޑަށް ޑީމޯޓިވޭޓްވާކަމުގެ ޝަކުވާ އެ ކޮމިޝަަނަށް ލިބެމުންދާއިރު އެކަމާ ގުޅިގެން އެޑިއުކޭޝަން މިނިސްޓްރީ އާއި ޕޭ ކޮމިޝަނާ ވެސް މަޝްވަރާކުރެވިފައިވާ ކަމަށެވެ.

ސިވިލް ސާވިސް ކޮމިޝަންގެ މެންބަރު މުހައްމަދު ފަރުޞަތު ވިދާޅުވީ އަބަދުވެސް ޕޭ ފްރޭމްވޯކެއް އައުމުން ހިޖުރަ ކުރާނެ ކަމަށާއި އެ އުސޫލުން މިދިޔަ އަހަރުގެ މެއި އެއްވަނަ ދުވަހު ވެސް އެ ގޮތަށް އެކަން ކުރި ކަމަށެވެ. އަދި ބޭނުންވަނީ ޑިގްރީ ފެންވަރުގެ ޓީޗަރުން ނަމަވެސް ހިޖުރަކުރި އިރުގައި ޑިޕްލޮމާ ފެންވަރުގެ ޓީޗަރުން ވެސް ތިބިކަމަށެވެ. ޑިޕްލޮމާ، ޑިގްރީ އަދި މާސްޓާސް ވަކި ލެވެލްއަކަށް ލެވުނު ނަމަވެސް ޑިގްރީ ފެންވަރުގެ ޓީޗަރުންނަށް ފިޔަވައި އެހެން ބަޔަކަށް މައްސަލައަކާ ކުރިމަތިނުވާ ކަމަށް ވެސް އޭނާ ފާހަގަކުރެއްވިއެެވެ.

މީގެއިތުރުން އޭނާ ވިދާޅުވީ ޑިގްރީ މީހުންނަށް ދިމާވާ މައްސަލައަކީ ޑިގްރީ ހަދައިގެން ތަނަކަށް ވަޒީފާއަށް އެޕްލައިކުރުމުން އޭނާއަށް ޑިގްރީ ފެންވަރުގެ މަގާމެއް ލިބުނު ނަމަވެސް ޑިގްރީ ލެވެލްގެ މަގާމު ނެތި ޑިޕްލޮމާ ލެވެލްގެ މަގާމުގައި ހުރެގެން ޑިގްރީ ހެދުމުން އެ ތަނަކުން އެ މަގާމަކަށް ޕްރޮމޯޓެއް ނުވުން ކަމަށެވެ. ފަރުޞަތު ގަބޫލުކުރައްވާ ގޮތުގައި އެހެން ތަނަކަށް ބަދަލުވުމުން ކުރިއެރުން ލިބޭނަމަ އެ ތަނެއްގައި ހުރެގެން ވެސް އެ މީހަކަށް ކުރިއެރުން ލިބެން ޖެހޭނެއެވެ. އެހެންކަމުން، ހުރިހާ ޓީޗަރުންނަކީ ޑިގްރީ ފެންވަރުގެ ޓީޗަރުންނަށް ހަދަން ބޭނުންނަމަ ޕޭ ފްރޭމްވޯކުން އަލަށް ޑިގްރީ ހަދާ މީހުންނަށް އެކްސެޕްޝަނަލް ފުރުސަތެއް ދޭން ޖެހޭ ކަމަށް އޭނާ ވިދާޅުވިއެވެ.

އެހެން ނަމަވެސް އެ ގޮތަށް އެކްސްޕެކްޝަނަލް ފުރުސަތެއް ތައުލީމީ ދާއިރާއިން އެކަނި ދިނުމަކީ ހަމަހަމަގޮތެއް ކަމަކަށް ޕޭ ކޮމިޝަނަކުން ނުދެކެއެވެ. އެ ކޮމިޝަންގެ ސެކްރެޓްރީ ޖެނެރަލް މުހައްމަދު ފައިޒަލް ވިދާޅުވީ ޕޭ ކޮމިޝަނުގެ އެންމެ ބޮޑު ބޭނުމަކީ މުސާރައިގެ އޮނިގަނޑުތައް ހާމަނައިޒް ކުރުން ކަމަށެވެ. ކުރީގެ މުސާރައިގެ އޮނިގަނޑުތަކުގައި އޮތް ގޮތުން ފާހެއް ހިފައިގެން އަންނައިރަށް ޕްރޮމޯޝަން ލިބޭ ގޮތަށް އޮތްކަމަށާއި އެހެން ނަމަވެސް ތައުލީމީ ދާއިރާއަށް ކުރިން އޮތް އެ ފުރުސަތު އެހެން ދާއިރާތަކަށް ނެތް ކަމަށެވެ.

އެހެންކަމުން މި ކަމުގައި ހޯދަން ޖެހެނީ އެހެން ހައްލެއް ކަމަށް ޕޭ ކޮމިޝަނުން ގަބޫލުކުރާއިރު ދެ ކޮމިޝަނަށް ވެސް ކޮމިޓީން ވަނީ މަޝްވަރާ ކުރުމަށް ފުރުސަތު ދީފައެވެ. އަދި މަަޝްވަރާކުރުމަށްފަހު މި ކަމަށް ހައްލެއް ހޯދައިދިނުމަށް ވަނީ އެދިފައެވެ. ޕޭ ކޮމިޝަނުން ބުނީ މެއި މަހުގެ ނިޔަލަށް މި ކަަމަށް ހައްލެއް ހޯދައިދޭނެ ކަމަށެވެ.