ލޮނުގެ އަސަރުކޮށް ސަލްމާން މިސްކިތުގެ އޭސީތައް ދަބަރަށްވަނީ
13 ފެބުރުއަރީ 2023 | ހޯމަ 06:44ލޮނުގެ އަސަރު ވަރަށްބޮޑަށް ކޮށް އެއްޗެހި ދަބަރަށްވެ ހަލާކުވަނީ
ސަލްމާން މިސްކިތުގެ އެއަރކޮންޑިޝަން ސިސްޓަމަށް ދިމާވެފައިވާ މައްސަލަ ހައްލުކުރުމުގެ މަސައްކަތް ކުރަނީ
ކިންގް ސަލްމާން މިސްކިތުގެ އޭސީތަކަށް ލޮނުގެ އަސަރުކޮށް ދަބަރަށްވަމުންދާ ކަމަށް އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ހެންވޭރު އުތުރު ދާއިރާގެ މެންބަރު އިބްރާހިމް މުޢިއްޒު ކުރެއްވި ސުވާލަށް ޖަވާބު ދެއްވަމުން އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވީ ކިންގް ސަލްމާން މިސްކިތުގެ އޭސީގެ މައްސަލަ ފުރަތަމަ ފާހަގަކުރެވުނީ މިދިޔަ އޮގަސްޓްމަހުގެ ތެރޭގައި ކަމަށެވެ. އެކަމަށް ހައްލު ހޯދުމަށް ކޮންޓްރެކްޓަރާއި ވާހަކަދައްކާ 25 އޮގަސްޓުގައި އެބޭފުޅުން މާލެ ވަޑައިގެން ފުރަތަމަ އޭސީ ރަނގަޅުކުރި ކަމަށެވެ.
މިނިސްޓަރު ވިދާޅުވީ އަނެއްކާވެސް އޮކްޓޯބަރު މަހުގެ ތެރޭގައި ދެވަނަ ފަހަރަށް އޭސީގެ މައްސަލަ ދިމާވެ ކޮންޓްރެކްޓަރާއި ވާހަކަދައްކައިގެން އެބޭފުޅުންނާއެކީގައި 13 ނޮވެމްބަރުގައި އެއްބަސްވުމެއް ހަދައި، 23 ޖެނުއަރީގައި އެބޭފުޅުން މަސައްކަތް ފެއްޓެވި ކަމަށެވެ.
މިނިސްޓަރު ވިދާޅުވީ ސަލްމާން މިސްކިތުގެ ސައުންޑް މައްސަލައަކީ ވެސް އެގޮތަށް ދިމާވެފައި ހުރި މައްސަލައެއް ކަމަށެވެ. އަދި އެ މައްސަލަ ހައްލުކުރަމުން ގެންދަވާ ކަމަށާއި، އެތަން ބޭނުންކުރަން ފެށުނުއިރު އެންމެ މުންނާރަކުން ކުޑަކޮށް އަޑުއިވެމުންދިޔަ ކަމަށެވެ. އަދި ފަހުން މައްސަލަ ދިމާވެ އެކަން ހައްލުކުރުމުގެ މަސައްކަތް ކުރަމުންދާއިރު ލަސްތަކެއް ނުވެ އޭސީގެ މައްސަލަ ހައްލުކުރާ މީހުންނާއެކީ އެ މައްސަލަ ވެސް ހައްލުކުރެވިގެންދާނެ ކަމަށެވެ.
