2019 ވަނަ އަހަރު ޝަރުއީ ދާއިރާ އިސްލާހުކުރުމަށް ފެށި މަސައްކަތްތަކުގެ ނަތީޖާ މިހާރުވެސް ފެންނަމުންދާ ކަމަށް ޗީފް ޖުޑީޝަލް އެޑްމިނިސްޓްރޭޓަރ އައިޝަތު ރިޒްނާ ވިދާޅުވެއްޖެއެވެ.
އޭނާ މިފަދައިން ވިދާޅުވީ "ޤަޟާއީ އަހަރު 2023" ފެށުމުގެ ރަސްމިއްޔާތުގައި ވާހަކަދައްކަވަމުންނެވެ. "ޤަޟާއީ އަހަރު 2023" ފަށާއިރު އެ ދާއިރާ ހަރުދަނާ ކުރުމަށް މަސައްކަތްތައް ކުރަމުންދާކަމަށް އޭނާ ވިދާޅުވިއެވެ. އެގޮތުން ފާއިތުވި އަހަރުތަކުން ދަސްވި ކަންކަމުގެ އަލީގައި ޝަރުއީ ދާއިރާ އިސްލާހުކުރަމުންދާ ކަމަށް އޭނާ ވިދާޅުވިއެވެ. އެ މަަސައްކަތްކުރަމުން ދަނީ ސަރުކާރުގެ ސްޓްރެޓީޖިކް ޕްލޭން އާއި ޝަރުއީ ދާއިރާގެ ސްޓްރެޓީޖިކް ޕްލޭންގައި ހިމެނޭ ކަންކަން އެކުލެވޭ ގޮތަށް ކަމަށް ވެސް އޭނާ ވިދާޅުވިއެވެ. ރިޒްނާ ވިދާޅުވީ އެ މަސައްކަތުގެ ތެރެއިން ކޯޓުތަކުގެ އިދާރީ ހިންގުން ހަރުދަނާ ކުރުމަށް މަސައްކަތްކުރަމުންދާ ކަަމަށެވެ.
ޤަޟާއީ އަހަރު ފާހަގަކުރުމުގެ މަގްސަދަކީ އެ އަހަރެއް ނިމިގެންދާ އިރު ކުރި މަސައްކަތްތައް ހިއްސާކުރުމާއި ކުރިއަށް އޮތް އަހަރަށް ތައްޔާރުވެ ކަންކަން ޕްލޭން ކުރުންކަން ރިޒްނާ ވަނީ ފާހަގަކުރައްވާފައެވެ. މީގެ އިތުރުން މިހާރު ކުރަމުންދާ މަސައްކަތުގެ ތެރޭގައި މަރުކަޒީ ގޮތެއްގައި ޖުޑީޝަލް އެޑްމިނިސްޓްރޭޝަން އަށް ބަރޯސާވާ މިންވަރު ކުޑަކުރުމަށް މަސައްކަތްކުރަމުންދާ ކަަމަށް އޭނާ ވިދާޅުވިއެވެ. މިހާރު ކްލަސްޓަރ ނިޒާމްގެ ދަށުން ކޯޓުތައް ހިނގާ އިރު، ލީގަލް މުވައްޒަފުން ހޯދުމުގެ މަސައްކަތް މިހާރު ކުރިއަށްދާ ކަަމަށް އޭނާ ވިދާޅުވިއެވެ. އަދި އިންސާނީ ވަސީލަތާއި އެހެން ވަސީލަތްތައް އިތުރުކުރަމުންދާ ކަމަށް އޭނާ ވިދާޅުވިއެވެ.
މިދިޔަ އަހަރު އަލަށް އަމަލުކުރަން ފެށި ގަވާއިދުތަކާއި ޤާނޫނުތަކާއި އެކު ކޯޓުތަަކަށް އާ ވަސީލަތްތަކާއި އާ މުވައްޒަފުން ހޯދުމުގެ މަސައްކަތް ކުރިއަށްދާ ކަމަށް އޭނާ ފާހަގަކުރެއްވިއެވެ. އެ ދާއިރާއަށް ދިމާވާ އެންމެ ބޮޑު ގޮންޖެހުމަކީ އެކަށީގެންވާ ގާބިލް މުވައްޒަފުން ނުލިބުން ކަމަށް ވެސް ރިޒްނާ ފާހަގަކުރެއްވިއެވެ. އެހެންކަމުން އެކަން ހައްލުކުރުމަށް މަސައްކަތްކުރަމުންދާ ކަމަށް އޭނާ ވިދާޅުވިއެވެ.
