މިއަހަރު މިހާތަނަށް 2380 އަށްވުރެ ގިނަ މީހުން ޤައުމީ ކުތުބުޚާނާ އިން ޚިދުމަތް ހޯދާފައިވޭ
2018 ވަނަ އަހަރު އެވްރެޖްކޮށް 1500 އާއި 2000އާ ދެމެދުގެ އަދަދަކަށް މީހުން ލައިބްރަރީއަށް ޒިޔާރަތްކުރި
ް މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖްގެ ޑެޕިއުޓީ މިނިސްޓަރު އަހަމްދު މުހުސިން
މިއަހަރު މިހާތަނަށް 2380 އަށްވުރެން ގިނަ މީހުން ލައިބްރަރީއަށް ގޮސް ޚިދުމަތް ހޯދާފައިވާ ކަމަށް މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖްގެ ޑެޕިއުޓީ މިނިސްޓަރު އަހްމަދު މުހުސިން ވިދާޅުވެއްޖެއެވެ.
ޤައުމީ ކުތުބުޚާނާ އަކީ އެތައް ގޮތަކުން އެތައް ބަޔެއްގެ މަދަދުގާރެއްކަން ފާހަގަކުރައްވާ މުހުސިން ވިދާޅުވީ 2018 ވަނަ އަހަރު އެވްރެޖްކޮށް 1500 އާއި 2000އާ ދެމެދުގެ އަދަދަކަށް މީހުން ލައިބްރަރީއަށް ޒިޔާރަތްކުރި ކަމަށެވެ. އަދި 2019 ވަނަ އަހަރު ވެސް އެ އަދަދުގައި ހިފެހެއްޓުނު ކަމަށެވެ.
ކޮވިޑްގެ ދެ އަހަރު ނިމި، މަސައްކަތަށް ބައެއް ދިމަދިމާ ބަންދުކޮށްގެން އުޅުނު އިރުވެސް 1500 އާއި 2000އާ ދެމެދުގެ އަދަދެއްގެ މީހުން ދުވާލަކަށް ލައިބްރަރީއަށް ޒިޔާރަތްކުރި ކަމަށާއި ޤައުމީ ކުތުބުޚާނާގެ ބޭނުން ހިފާ މީހުން ދުވަހެއް ދުވަހަކަށް އިތުރުވަމުންދާ ކަމަށް މުހުސިން ވިދާޅުވިއެވެ.
ކުތުބުޚާނާ އަކީ ސާނަވީ ކުދިންގެ ޓިއުޝަން ސެންޓަރު ކަމަށް ވެސް މުހުސިން ވަނީ ފާހަގަކުރައްވާފައެވެ.
ޤައުމީ ކުތުބުޚާނާ އިތުރަށް ތަރައްގީކޮށް ޒަމާނީ ފެންވަރަށް ބަދަލުކުރުމަށްފަހު އަލުން ހުޅުވާފައިވަނީ ޖެނުއަރީ 25 ވަނަ ދުވަހުއެވެ.
ބޭންކް އޮފް މޯލްޑިވްސްގެ އެހީގައި ގައުމީ ކުތުބުޚާނާ ތަރައްގީކުރުމުގެ މަސައްކަތް ކުރިއަށް ގެންދެވުނީ، މަސައްކަތް ކުރާ ވަގުތުތަކުގައި މުޅި ލައިބްރަރީން ދެމުންދާ ޚިދުމަތްތައް އެއްކޮށް ހުއްޓާނުލައި ކަމަށް ކުތުބުޚާނާއިން ބުނެއެވެ. އެގޮތުން މަސައްކަތް ކުރެވޭ އޭރިޔާތައް ބަންދުކުރަން ޖެހުނު ވަގުތުތަކުގައި، އެތަނަކުން ދެވޭ ޚިދުމަތް އެހެން އޭރިޔާއަކުން ދެވޭނޭ އިންތިޒާމް ހަމަޖެއްސި ކަމަށްވެސް ވަނީ ވިދާޅުވެފައެވެ.
އެތަނުގައި މިހާރު އޯޑިއޯ ބޫތެއް ޤާއިމުކުރެވިފައިވާއިރު މިއީ ގައުމީ ކުތުބުޚާނާގައި މުޅިން އަލަށް ގާއިމް ކުރެވުނު ބޫތެކެވެ. ފޮތްތަކަށް އަޑު އެޅުމަށާއި، ފެނުމުން މަހުރޫމްވެފައިވާ ފަރާތްކަށް ކުތުބުޚާނާއިން ޚިދުމަތް ދިނުމަށްޓަކައި މުޅިން އަލަށް ތައްޔާރު ކުރަން ފަށާ ޓޯކިންގ ބުކްސް ތައްޔާރުކުރުމުގައި، މިއީ ވަރަށް ބޮޑު އެހީތެރިކަމެކެވެ. އޯޑިއޯ ބޫތު ފަރުމާކޮށްފައިވަނީ އަޑު ރެކޯޑް ކުރުމާއި އެޑިޓް ކުރުމުގެ އެންމެ ޒަމާނީ ވަސީލަތްތަކާއެކުގައެވެ. އަދި މި ބޫތާއެކު ފޯރުކޮށްދޭ ވީޑިއޯ ކެމެރާގެ ސަބަބުން، ގައުމީ ކުތުބުޚާނާއިން ދިނުމަށް މަސައްކަތް ކުރަމުންދާ އާ ޚިދުމަތްތަކަށް މަގުފަހިވެގެންދާނެއެވެ.
