ބާސެލޯނާ އިން ދައްކަމުން އަންނަ ކުޅުމާމެދު ވަރަށް ބޮޑަށް ހިތްހަމަޖެހޭ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ޒަވީ މިހެން ބުނީ ސްޕެނިޝް ލީގުގައި ބާސެލޯނާ އިން ރެއާލް ބެޓިސް ބަލިކުރި މެޗަށް ފަހު ވާހަކަ ދައްކަމުންނެވެ. އެ މެޗުން ލިބުނު މޮޅާއެކު މިހާރު ބާސެލޯނާ އެއް ވަނައިގައި އޮތީ އަށް ޕޮއިންޓުގެ ލީޑަކުންނެވެ. މެޗަށްފަހު ވާހަކަ ދައްކަމުން ޒަވީ ބުނީ މެޗުގައި ބާސެލޯނާގެ ކުޅުންތެރިން ދެއްކި ކުޅުމާމެދު އޭނާ ހިތްހަމަޖެހޭ ކަމަށާއި، މެޗުގެ ނަތީޖާއާމެދު އުފާވާ ކަމަށެވެ. އަދި އެންމެ ފަހުން ލީގުގައި ޖިރޯނާއާ ދެކޮޅަށް ކުޅުނު މެޗާ އަޅާ ބަލާއިރު، ބާސެލޯނާ އިން ބޮޑު ކުރިއެރުމެއް ހޯދާފައިވާ ކަމަށެވެ. ޒަވީ ބުނީ ޖިރޯނާއާ ދެކޮޅަށް ބާސެލޯނާ އިން ކުޅުނީ ވަރަށް ބޮޑަށް ވިސްނުންތެރިކަމާއެކު ކަމަށާއި، އެ މެޗުގެ އަމާޒަކަށްވީ މުހިންމު ވަގުތުގައި ބޯޅަ ގެއްލުވާނުލައި، ކުދި ކުދި ގޯސްތައް ނުހެދުން ކަމަށެވެ. އެކަން ބާސެލޯނާގެ ކުޅުންތެރިން ފުރިހަމަ އަށް އަދާކުރިކަން ފާހަގަކޮށް ޒަވީ ބުނީ، މެޗު ޑޮމިނޭޓުކޮށްގެން ކުޅުނީ ވެސް ބާސެލޯނާ އިން ކަމަށެވެ.
މެޗާ މެދު އަހަރެން މިހުރީ ވަރަށް އުފާވެފައި. އެންމެ ފަހުން ޖިރޯނާއާ ދެކޮޅަށް ކުޅުނު މެޗާ އަޅާބަލާއިރު، އަހަރަމެން ބޮޑު ކުރިއެރުމެއް ހޯދައިފި. އަހަރަމެން ކުޅުނީ ވިސްނުންތެރިކަމާއެކު، މޮޅު ގޭމެއް. މިއަދުގެ އަމާޒަކަށްވީ ވެސް މުހިންމު ވަގުތުގައި ބޯޅަ ގެއްލުވާ ނުލައި، ކުދި މިސްޓޭކްސްތައް ނުހެދުން. މެޗު ފެށިގެން ނިމެންދެން ޑޮމިނޭޓުކޮށްގެން ކުޅުނީ އަހަރަމެން.ޒަވީ ހެނާންޑޭޒް / ބާސެލޯނާގެ ކޯޗު
މީގެ އިތުރުން ޒަވީ ވަނީ މެޗުގައި ބާސެލޯނާގެ ފުރަތަމަ ލަނޑު ޖެހި ރަފީނިއާގެ ވާހަކަ ވެސް ދައްކައިފަ އެވެ. ޒަވީ ބުނީ މެޗުގައި ރަފީނިއާ މޮޅު ކުޅުމެއް ދެއްކި ކަމަަށެވެ. ހަމައެކަނި ލަނޑު ޖެހުން ނޫން ކަން ފާހަގަކޮށް ޒަވީ ބުނީ ޑިފެންސިވް ގައި ވެސް އޭނާ މޮޅު ކުޅުމެއް ދެއްކި ކަމަށެވެ. އަދި ރަފީނިއާ އަކީ ހުނަރުވެރި މޮޅު ކުޅުންތެރިޔެއް ކަމަށާއި، އޭނާ އެތައް ބައިވަރު ކަންކަން ކުރަމުން އަންނަ ކަމަށެވެ. މީގެ އިތުރުން ޒަވީ ބުނީ ރަފީނިއާ ކުރަމުން އަންނަ މަސައްކަތާއި، އޭނާ ދައްކަމުން އަންނަ ކުޅުން ބާސެލޯނާއިން ފާހަގަކުރާ ކަމަށެވެ. އަދި ބާސެލޯނާ އަށް ކުޅެމުން އަންނަ ސްޕެއިންގެ ޒުވާން ޕެޑްރީ ހަ ނަންބަރު ޖާޒީގައި ފެނުމަކީ އޭނާ އަށް ލިބޭ ވަރަށް ބޮޑު އުފަލެއް ކަމަށެވެ. ޒަވީ ބާސެލޯނާއަށް ކުޅުންތެރިޔެއްގެ ގޮތުގައި ކުޅެދިން އިރު އޭނާ ބޭނުންކުރީ ވެސް ހަ ނަންބަރު ޖާޒީ އެވެ. އެކަން ފާހަގަ ކުރަމުން ޒަވީ ބުނީ، އިތުރަށް އޭނާ އަށް ދެން ހަ ނަންބަރު ޖާޒީ ބޭނުން ނުކުރެވޭނެ ކަމަށާއި، ނަމަވެސް އުންމީދަކީ ގިނަ އަހަރުތަކަކަށް ޕެޑްރީ އެ ޖާޒީ ބޭނުން ކުރުން ކަމަށެވެ. އިތުރަށް ޒަވީ ބުނީ ކުރިން ބާސެލޯނާ އަށް ކުޅުނު އެ ޓީމުގެ ކެޕްޓަން އަންދްރެސް އިނިއެސްޓާ އަކީ ސްޕެއިންގައި އޭނާ އަށް ފެނުނު އެންމެ ހުނަރުވެރި ކުޅުންތެރިޔާ ކަމަށާއި، ޕެޑްރީ އަކީ ވެސް އެފަދަ ހުނަރުވެރި ކުޅުންތެރިޔެެއް ކަމަށެވެ.
ބާސެލޯނާ އަށް ކުރިއަށް އޮތީ ބުރަ މަސައްކަތެއް ކަމަށާއި، ޓީމެއްގެ ގޮތުގައި ތިބެއްޖެ ނަމަ ބޭނުންވާ ކަންތައް ޙާސިލްވާނެ ކަމަށްވެސް އޭނާ ބުންޏެވެ. ބާސެލޯނާ އިން މި ސީޒަންގެ ސްޕެނިޝް ސުޕަ ކަޕް ކާމިޔާބުކޮށްފައިވާއިރު، ސްޕެނިޝް ލީގު ކާމިޔާބު ކުރުމުގެ ފުރުސަތު އެބަ އޮތެވެ. މީގެ އިތުރުން އެ ޓީމު މިހާރު އޮތީ ކޮޕަ ޑެލް ރޭ މުބާރާތުގެ ސެމީ ފައިނަލްގަ އެވެ. މި ސީޒަންގެ ޔުއެފާ ޔޫރޮޕާ ލީގުގައި ވެސް ބާސެލޯނާ ވާދަކުރެ އެވެ.
