ނާޒިމް މިނިވަންކުރުމަށް އަދީބު މަސައްކަތް ފެއްޓެވީތީ ޝުކުރުއަދާކުރަން: އާޒިމް
30 ޖޫން 2017 | ހުކުރު 22:38ކާނަލް ނާޒިމް ފެރޭމް ކުރުމުގެ ތުޙުމަތު އާއިލާއިން ކުރަނީ އަދީބްގެ މައްޗަށް
ޖަލަށް ލާފައިވާ ކުރީގެ ޑިފެންސް މިނިސްޓަރ މުޙައްމަދު ނާޒިމްގެ ކޮއްކޯފުޅު އަދި އެމްޔޫއޯގެ ހިޔަނި ކެބިނެޓުގެ މިނިސްޓަރު އާދަމް އާޒިމް
ކުުރީގެ ޑިފެންސް މިނިސްޓަރ ކާނަލް ނާޒިމް ޖަލުގައި ބަހައްޓަންޖެހޭ އެއްވެސް ސަބަބެއް ނެތް ކަމާއި ނާޒިމް މިނިވަން ކުރުމަށް ކުރީގެ ނައިބް ރައީސް އަހްމަދު އަދީބް ފެއްޓެވި މަސައްކަތަށް ޝުކުރުއަދާ ކުރާ ކަމަށް ނާޒިމްގެ ކޮއްކޯފުޅު އަދި އެމްޔޫއޯގެ ހިޔަނި ކެބިނެޓްގެ މިނިސްޓަރު އާދަމް އާޒިމް ވިދާޅުވެއްޖެއެވެ.
ނާޒިމްއާ އިމްރާން އަނބުރާ ޖަލަށް ގެންދިޔުމާއި ގުޅިގެން ރާއްޖެޓީވީން ގެނެސްދިން ލައިވް ކަވަރޭޖްގައި ވާހަކަދައްކަވަމުން އާޒިމް ވިދާޅުވީ އަދީބު ސުޕްރީމް ކޯޓަށް ފޮނުއްވާފައިވާ ސިޓީއާއެކު ކާނަލް ނާޒިމަކީ މިނިވަނެއް ކަމަށާއި ޖަލުގައި އެންމެ ދުވަހެއްވެސް ހޭދަ ކުރަން ނުޖެހޭނެ ކަމަށެވެ.
ޝެއިޚް އިމްރާނަކީ ދެއްކެވި ވާހަކައަކާ ގުޅިގެން ޖަލަށް ލެވިފައިވާ މީހެއް ކަމަށާއި ޖަލުގައި އޮންނަން ޖެހޭނެ ކަމަކަށް ޤަބޫލުނުކުރާ ކަމަށް ވިދާޅުވިއެވެ.
ފިސްތޯލައިން އަދީބުގެ ޑީއެންއޭ ފެނުމުން އެކަމުން ނާޒިމް ދުރުކުރަން އެއީ ފުރުޞަތެއް ކަމަށާއި އަދި އަދީބުވެސް ފިސްތޯލައިގެ ހަޤީގަތް އިނގޭ ކަމަށް ވިދާޅުވަމުންދާއިރު މިއީ ހުރިހާ ރައްޔިތުންނަށް ބިރުވެރި ވާހަކައެއް ކަމަށް އާޒިމް ވިދާޅުވިއެވެ.
ކުރީގެ ނައިބު ރައީސް އަދީބު ސުޕްރީމް ކޯޓަށް ފޮނުއްވި ސިޓީގައި ފިސްތޯލައާ ނާޒިމާ ގުޅުމެއް ނެތް ކަމަށާއި އެކަމުގެ ހަގީގަތް އެ މަނިކުފާނަށް އެނގިވަޑައިގަންނަވާ ކަމަށް ވިދާޅުވެފައިވާއިރު، އާޒިމް ވިދާޅުވީ މިގައުމުގެ ނައިބް ރައީސްކަން ކުރެއްވި ބޭފުޅަކު އެގޮތަށް ވިދާޅުވަމުން ގެންދަވާ ކަމަށްވާ ނަމަ އެކަން އެމްއެންޑީއެފްއާއި ފުލުހުންނާއި އަދިވެސް ކަމާއި ގުޅުން ހުރި މުއައްސަސާތަކުން މިކަން އިސްވެ ބަލަން ޖެހޭ ކަމަށެވެ.
ކޮންމެ މީހަކަށްވެސް ކުށެއް ކުރެވިދާނެ ކަމަށާއި، މާޢާފު ކުރުމަކީ ރީތި އާދައެއް ކަމަށްވާއިރު އެކަކު އަނެކަނަށް މަޢާފުދީ އަދީބަށްވެސް ބޭސްފަރުވާ ކުރެވޭނެ ގޮތް ހައްދަވައިދެއްވުމަށް ގޮވާލާ ކަމަށާއި މިގައުމުގައި އެންމެންވެސް މިނިވަންކަމާއި އެކީ އުޅެވޭނެ މަންޒަރު ފެންނާނެ ކަމަށްއާޒިމް ވިދާޅުވިއެވެ.
