އާބިދަށް ކުރާ ދައުވާ: ހެކިބަސް ނެގުން ނިންމާލައިފި
އާބިދަށް ކުރަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ
ބަންގްލަދޭޝްގެ ވެއިޓަރެއްކަމަށްވާ ޝަމީމްއަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދު
ހުޅުމާލޭގައި ހުންނަ ޚާންޖީ ރެސްޓޯރަންޓްގައި ބަންގްލަދޭޝްގެ ވެއިޓަރެއްކަމަށްވާ ޝަމީމްއަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދުގެ މައްޗަށް ކުރާ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
އާބިދަށް ކުރަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ.
އާދިއްތަ ދުވަހުގެ އަޑުއެހުމުގައި އޮތީ މި މައްސަލައިގެ ޑީއެންއޭ ތަހުލީލު ރިޕޯޓު ތައްޔާރު ކުރެއްވި އޮފިސަރުގެ ހެކިބަސް ނެގުމެވެ.
ހެކިވެރިޔާ ވިދާޅުވި ގޮތުގައި 5 ވަޅިއަކާއި އަންނައުނުގެ އިތުރުން، ޑީއެންއޭ ތަހުލީލަށް ބޭނުންވާ ސްވޮބްތަކެއް އޭނާ ވަނީ މި މައްސަލައާ ގުޅިގެން ތަހުލީލުކޮށްފައެވެ.
ހެކިވެރިޔާ ވަނީ ހެކިތައް ލިބުމުން، އޭގެ ތަހުލީލު ކުރިއަށްގެންދާ ގޮތުގެ މައުލޫމާތު ތަފްސީލު ކޮށްދެއްވާފައެވެ.
މި މައްސަލައިގައި ދައުލަތުގެ ޝަފަހީ ހެކިންގެ ތެރެއިން 2 ހެއްކެއްގެ ހެކިބަސް އަދި ނެގިފައެއް ނުވެއެވެ. އެއީ ޑެތް ސަމަރީ ތައްޔާރު ކުރެއްވި ޑޮކްޓަރާއި އިތުރު ފަރާތެކެވެ. އެ ދެ ހެކިންނަކީވެސް ރާއްޖެއިން ބޭރުގައި ދިރިއުޅޭ ފަރާތްތަކެއް ކަމުން، ޝަރީއަތަށް ހާޒިރު ކުރުމުގައި ވަނީ ގޮންޖެހުންތައް ކުރިމަތިވަމުންނެވެ. ނަމަވެސް އެ ހެކިންގެ ރިޕޯޓު ޝަރީއަތަށް ބަލައިގަތުމަށް ގާޒީ ވަނީ ނިންމަވާފައެވެ.
އޭގެ އިތުރުން، އެ ދެފަރާތުގެ ހެކިބަސް އިތުރަށް ކުރިއަށް ނުގެންދެވުމަށްވެސް ގާޒީ ވަނީ އެކަށީގެންވާ ސަބަބާއެކު ނިންމަވާފައެވެ. ދައުލަތުންވެސް އެކަމަށް އިއުތިރާޒެއް ނުކުރެއެވެ.
ދެން އޮންނާނީ ހެއްކާ ގުޅޭގޮތުން ވާހަކަ ދެއްކުމާއި ޚުލާސާ ބަޔާން އިއްވުމަށް ބާއްވާ އަޑުއެހުމެވެ. އެ އަޑުއެހުން އެއްމަސްތެރޭގައި ބޭއްވުމަށް މަސައްކަތް ކުރައްވާނެކަމަށް ގާޒީ ވިދާޅުވިއެވެ.
އެއަށްފަހު ދެން އޮންނާނީ މައްސަލައިގެ ޙުކުމް ކުރެއްވުމެވެ.
އާބިދު ވަނީ މި ދައުވާއަށް އިންކާރު ކޮށްފައެވެ. އޭނާ ބުނާ ގޮތުގައި އޭނާއާ ކައްކާއާ ދެމެދު ހިނގި ހަމަނުޖެހުމުގައި އޭނާ އަތް ހޫރާލީ އަމިއްލަ ނަފްސުގެ ދިފާއުގައެވެ. އޭރު އެއީ ވަޅިއެއްކަންވެސް ނޭނގޭ ކަމަަށާއި، ގަސްތު މަރުގެ ދައުވާއަށް އިންކާރު ކުރާކަމަށް އޭނާ ބުނެއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
