ނޮޓިންހަމް ފޮރެސްޓް ބަލިކޮށް ކަރަބޯ ކަޕް ފައިނަލްގެ އުންމީދު ޔުނައިޓެޑުން ބޮޑުކޮށްފި
26 ޖެނުއަރީ 2023 | ބުރާސްފަތި 05:57ފޮރެސްޓުގެ ދަނޑުގައި ކުޅުނު މެޗު ޔުނައިޓެޑުން ކާމިޔާބުކުރީ 3-0 އިން
މެންޗެސްޓަރ ޔުނައިޓެޑުން ކުޅުނު މެޗުގެ ތެރެއިން
ކަރަބޯ ކަޕްގެ ސެމީ ފައިނަލްގެ ފުރަތަމަ ލެގުގައި ނޮޓިންހަމް ފޮރެސްޓް ބަލިކޮށް މެންޗެސްޓަރ ޔުނައިޓެޑުން ފައިނަލްގެ އުންމީދު ބޮޑުކޮށްފި އެވެ.
ބުދަ ދުވަހުގެ ރޭ ފޮރެސްޓުގެ ދަނޑުގައި ކުޅުނު މެޗު ޔުނައިޓެޑުން ކާމިޔާބުކުރީ 3-0 އިންނެވެ. މެޗު ފަށައިގެން ހަ ވަނަ މިނެޓުގައި ޔުނައިޓެޑަށް ލީޑު ނަގައިދިނީ މޮޅު ކުޅުމެއް ދައްކަމުން އަންނަ އިނގިރޭސި ފޯވާޑް މާކަސް ރަޝްފޯޑު އެވެ. އެއީ އެ ޓީމުގެ ބްރެޒިލް މިޑްފީލްޑަރު ކަސެމީރޯ ތަނަވަސްކޮށްދިން ފުރުސަތެއްގައި ރަޝްފޯޑު ޖެހި ލަނޑެކެވެ. ފުރަތަމަ ހާފު ނިމެންވެފައި ވަނިކޮށް ޔުނައިޓެޑުގެ ލީޑު ފުޅާ ކޮށްދިނީ ދާދި ފަހުން އެ ޓީމަށް ބަދަލުވި ނެދަލެންޑްސްގެ ފޯވާޑް ވައުޓް ވެގްހޯސްޓް އެވެ. އެއީ ފޮރެސްޓުގެ ގޯލް ކީޕަރުގެ އަތުގައި ޖެހި ރީ ބައުންސަށް ނިކުން ބޯޅައެއް ގޯލަށް ފޮނުވާލައިގެންނެވެ. ޔުނައިޓެޑުގެ ތިން ވަނަ ލަނޑު ޖަަހައިދިނީ އެ ޓީމުގެ ކެޕްޓަން ބްރޫނޯ ފެނާންޑޭޒް އެވެ. އެއީ އެ ޓީމުގެ އެންތަނީ އެލަންގާ ދިން ބޯޅައެއް ތިރިތިރިން ގޯލަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.
ސެމީ ފައިނަލް ދެ ވަނަ ލެގުގެ މެޗު އޮންނާނީ އަންނަ މަހުގެ ދެ ވަނަ ދުވަހު ޔުނައިޓެޑުގެ އަމިއްލަ ދަނޑުގަ އެވެ.
