އޭސީ މިލާން ބަލިކޮށް ލާޒިއޯ ތިން ވަނަ އަށް
25 ޖެނުއަރީ 2023 | ބުދަ 06:46ލާޒިއޯގެ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 4-0 އިން
އިޓާލިއަން ލީގުގައި ލާޒިއޯ އިން ކުޅުނު މެޗުގެ ތެރެއިން
އިޓާލިއަން ލީގުގައި އޭސީ މިލާނާ ދެކޮޅަށް ކުޅުނު މެޗު ކާމިޔާބުކޮށް ލާޒިއޯ އިން ލީގު ތާވަލްގެ ތިން ވަނަ އަށް ޖެހިލައިފި އެވެ.
އަންގާރަ ދުވަހުގެ ރޭ ލާޒިއޯގެ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 4-0 އިންނެވެ. މެޗުގައި ލާޒިއޯ އިން ފުރަތަމަ ލަނޑު ޖަހައި ލީޑު ނެގީ މެޗު ފަށައިގެން ހަތަރު ވަނަ މިނެޓުގަ އެވެ. ލާޒިއޯގެ މަޓިއާ ޒަގާނީ ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ސާގޭ މިލިންކޮވިޗް ސަވިޗު އެވެ. ފުރަތަމަ ހާފު ނިމުމުގެ ކުރިން ލާޒިއޯ އިން ވަނީ ދެ ވަނަ ލަނޑެއް ޖަހައި ލީޑު ފުޅާކޮށްފަ އެވެ. އެއީ މެޗުގެ 38 ވަނަ މިނެޓުގައި ފުރަތަމަ ލަނޑު ޖަހަން އެހީތެރިވެދިން ޒަގާނީ ޖަހައިދިން ލަނޑުންނެވެ. ދެ ވަނަ ހާފުގައި ލާޒިއޯގެ ތިން ވަނަ ލަނޑު ލުއިޒް އަލްބާޓޯ ޖެހީ އެ ޓީމަށް ލިބުނު ޕެނަލްޓީއެއްގަ އެވެ. ލާޒިއޯގެ ފަހު ލަނޑު މެޗުގެ 75 ވަނަ މިނެޓުގައި އަލްބާޓޯގެ އެހީތެރިކަމާއެކު ޖަހައިދިނީ ފިލީޕޭ އެންޑަަސަން އެވެ.
މެޗުން މޮޅުވެ ލާޒިއޯ ތިން ވަނަ އަށް ޖެހިލީ ކުޅުނު 19 މެޗުން 37 ޕޮއިންޓު ހޯދައިގެންނެވެ. ދެ ވަނައިގައި އޮތް އޭސީ މިލާނާ ލާޒިއޯއާ ދެމެދު މިހާރު އޮތީ ޕޮއިންޓެއްގެ ފަރަގެކެވެ. މިލާނަށް 19 މެޗުން ލިބެނީ 38 ޕޮއިންޓެވެެ.
