ރޯމާ އިން ސްޕެޒިއާ ބަލި ކުރި މެޗުގައި ވިދާލީ ޑިބާލާ

އިޓާލިއަން ލީގުގައި ސްޕެޒިއާއާ ދެކޮޅަށް ކުޅުނު މެޗުން ރޯމާ މޮޅުވެއްޖެ އެވެ.

ސްޕެޒިއާގެ ދަނޑުގައި ކުޅުނު މެޗު ރޯމާ އިން ކާމިޔާބުކުރީ 2-0 އިންނެވެ. މެޗުގައި ރޯމާގެ ދެ ލަނޑު ޖެހުމަށް ވެސް އެހީތެރިވެދިނީ އާޖެންޓީނާގެ ޕައުލޯ ޑިބާލާ އެވެ.

މެޗުގައި ރޯމާގެ ފުރަތަމަ ލަނޑު ޖެހީ އެލް ޝާރަވީ އެވެ. އެއީ މެޗުގެ ފުރަތަމަ ހާފު ނިމެން މިނެޓަކަށްވެފައި ވަނިކޮށް، ސްޕެޒިއާގެ އޭރިޔާ ތެރެއިން ޑިބާލާ ދިން ބޯޅައެއް ގޯލަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. ރޯމާގެ ދެ ވަނަ ލަނޑު މެޗުގެ ދެ ވަނަ ހާފުގައި ޖެހީ ޓަމީ އަބްރަހަމް އެވެ. އެއީ 49 ވަނަ މިނެޓުގައި ސްޕެޒިއާގެ ކުޅުންތެރިޔަކި ޖައްސާލި ބޯޅައެއް ޑިބާލާ އަށް ލިބުމާއެކު އޭނާ އަބްރަހަމް އަށް ޖައްސާލުމުން، ސްޕެޒިއާގެ ޑިފެންޑަރަކު ކައިރިން ނައްޓައި، އެ ޓީމުގެ ކީޕަރުގެ ފައި ދަށުން ގޯލަށް ފޮނުވާލައިގެންނެވެ. މެޗުގެ މޮޅު ކުޅުންތެރިޔަކަށް ހޮވުނީ ވެސް ޑިބާލާ އެވެ.

މެޗުން މޮޅުވެ ރޯމާ އޮތީ ލީގުގައި ކުޅުނު 19 މެޗުން 37 ޕޮއިންޓާއެކު ހަތަރު ވަނައިގަ އެވެ. ރޯމާ އަށް ވުރެ އެއް މެޗު މަދުން ކުޅެގެން ތިން ވަނައިގައި އޮތް އިންޓަ މިލާނަށް ވެސް ލިބެނީ 37 ޕޮއިންޓެވެ. އިންޓަ އިން ކުރި ހޯދަނީ ފައިދާ ގޯލުންނެވެ.