ވ. ކެޔޮދޫއިން ފިސްތޯލައެއް ފެނިއްޖެއެވެ.
ފުލުހުންގެ މީޑިއާ އޮފިޝަލް ރާއްޖެއެމްވީއަށް ވިދާޅުވީ ފިސްތޯލައެއް ކަމަށް ބެލެވޭ އެއްޗެއް ފެނިފައިވާ ކަމަށެވެ. އަދި ފުލުހުން އެރަށުގައި ހަރަކާތްތެރިވަމުންދާ ކަމަށް އޭނާ ވިދާޅުވިއެވެ. އޮފިޝަލް ވިދާޅުވީ ފިސްތޯލަ ކަމަށް ބެލެވޭ އެއްޗެއް ފެނިފައިވަނީ މިއަދު ހެނދުނު 11:30 ހާއިރު ކަމަށެވެ.
އެ ރަށުން ރާއްޖެ އެމްވީ އަށް މައުލޫމާތު ދިން މީހަކު ބުނީ ފިސްތޯލަ ފެނުނީ ބަނދަރު ސަރަހައްދުން ކަމަށާއި އެ ފެނުނީ އެ ސަރަހައްދަށް މޫދަށް އެރެން އުޅުނު 10 ވަރަކަށް އަހަރުގެ ކުދިބަޔަކަށް ކަމަށެވެ. އެ ކުދިންނަށް އެއީ އަސްލު އެއްޗެއްހެން ހީވެގެން މީހަކު މެދުވެރިކޮށް ކައުންސިލަށް އެންގި ކަމަށާއި އެ ރަށަށް މި ވަގުތު ޗުއްޓީ އަށް ގޮސް ހުރި ސިފައިންގެ މީހަކު އެ ބެލުމަށް ފަހު އެއީ އަސްލު އެއްޗެއްކަން ކަށަވަރުކޮށްދިން ކަމަށް ވެސް އެ މީހާ ބުންޏެވެ.
އޭނާ ބުނީ ފިސްތޯލައިގަ ވަޒަނެއް ނެތް ކަމަށެވެ.
މިހާރު ވަނީ މި ހަތިޔާރު ފުލުހުންގެ ބެލުމުގެ ދަށަށް ގެންގޮސްފައެވެ. އަދި ފުލުހުން ގެންދަނީ އެ މައްސަލަ ބަލަމުންނެވެ.
