ރައީސް ކާމިޔާބީތައް ވިދާޅުވެދެއްވީ މަޝްރޫއުތަކުގެ ހިސާބުތަކުން

ހުކުރު ދުވަހުގެ ރޭ އެމްޑީޕީގެ ޕްރައިމަރީގެ ކެމްޕެއިން އަށް ބޭއްވި ޖަލްސާގައި ރައީސް އިބްރާހިމް މުހައްމަދު ޞާލިހު އެމަނިކުފާނުގެ ދައުރުގެ ކާމިޔާބީތައް ވިދާޅުވެދެއްވީ ތަފާސްހިސާބުތަކުންނެވެ. މި ސަރުކާރަށް ކުރެވުނީ ކޮން ކަމެއްތޯ ސުވާލުކުރާ ފަރާތްތަކަށް އެމަނިކުފާނު ވަނީ ރައްދުދެއްވާފައެވެ. އެގޮތުން ސަރުކާރަށް މަޝްރޫޢުތައް ނުހިންގޭ ކަމަށް ބުނާ އިރު މިހާތަނަށް ނިމުނު މަޝްރޫޢުތަކުގެ ތަފްސީލް ރައީސް ވަނީ ހިއްސާކުރައްވާފައެވެ.

ކުރިއަށް އޮތް ރިޔާސީ އިންތިހާބުގައި އެމްޑީޕީގެ ރިޔާސީ ޓިކެޓަށް ރައީސް ޞާލިހު އާ ވާދަކުރައްވާ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ރަށްރަށުގެ ތަރައްގީގެ މަޝްރޫއުތައް ކުރިއަށް ނުދާކަމަށް ވިދާޅުވެފައެވެ. އެފަދަ ފާޑުކިޔުންތަކާއި ގުޅިގެން ރައީސް ވިދާޅުވީ މި ސަރުކާރުން އެއްވެސް ސަރުކާރަކުން ނުހިންގާވަރަށް މަޝްރޫޢުތައް ހިންގާފައިވާ ކަމަށެވެ.

މިއީ އެންމެ ގިނަ މަޝްރޫޢުތައް ހިންގި ދައުރުކަމަށް ވާއިރު ސަރުކާރުން އެންމެ ބޮޑު އިސްކަމެއް ދެނީ އަސާސީ ޚިދުމަތްތައް ފުރިހަމަކޮށްދިނުމަށްކަން ރައީސް ވަނީ ފާހަގަކުރައްވާފައެވެ. އެގޮތުން ސަރުކާރުން ފެނާއި ނަރުދަމާގެ 141 މަޝްރޫއު މި ދައުރުގައި ހިންގާފައިވާ ކަމަށް ރައީސް ވިދާޅުވިއެވެ. ހަމައެހެން ރާއްޖޭގެ ރަށްތަކަށް ދިމާވެފައިވާ ލަފާފުރުމުގެ ދަތިކަން ހައްލުކުރުމަށް 47 މަޝްރޫއު ހިންގާފައިވާ ކަމަށް އެމަނިކުފާނު ވަނީ ފާހަހަގަކުރައްވާފައެވެ. ސަރުކާރުން ކޮށްފައިވާ އިތުރުކަންކަމަށް އަލިއަޅުވާލައްވާ 144 ރަށަކަށް 313 ޖެނަރޭޓަރު ސެޓު ފޯރުކޮށްދީފައިވާ ކަމަށް ވެސް އެމަނިކުފާނު ވިދާޅުވިއެވެ.

މީގެ އިތުރުން ތައުލީމީ ޖީލެއް ބިނާކުރުމަށް ކުރަމުންދާ މަސައްކަތުގެ ތެރެއިން 1،578 ކްލާސްރޫމް ނިންމުމާއި ހިލޭ ޑިގްރީ އަށް ކިޔަވާދިނުން ފަދަ މުހިންމުކަންކަން ކުރައްވާފައިވާކަން ރައީސް ވަނީ ވިދާޅުވެފައެވެ. އެގޮތުން 16،000 އަށް ވުރެ ގިނަ ދަރިވަރުން ހިލޭ ޑިގްރީގެ ދަށުން ތައުލީމް ހާސިލްކުރި އިރު 6،529 ދަރިވަރުން ހިލޭ ޑިގްރީ ސްކީމުން ކިޔަވާ ނިންމާފައިވާ ކަމަށް ރައީސް ވަނީ ވިދާޅުވެފައެވެ.

މީގެ އިތުރުން ހުރިހާ އަތޮޅެއްގައި މަތީ ސާނަވީއަށް ކިޔަވައިދޭން ފެށިއްޖެ ކަމަށް ވިދާޅުވިއެވެ. އަދި މި ސަރުކާރުން 17 މިސްކިތް އަޅާފައި ވާއިރު ކުޅުވަރުގެ ދާއިރާއިން ވެސް މުހިންމު މަސައްކަތްތަކެއް ކޮށްފައިވާކަން އެމަނިކުފާނު ފާހަގަކުރެއްވިއެވެ. އެގޮތުން ސަރުކާރުން 57 ފުޓުބޯޅަ ދަނޑާއި، 61 ފުޓްސަލް ދަނޑާއި 47 ޖިމް އަޅާފައިވާ ކަމަށް އެމަނިކުފާނު ވިދާޅުވިއެވެ. ރައީސް ވިދާޅުވީ މުހިއްމީ ހަމަޖެހިގެން އުޅެވޭނެ ގޮތާއި ދުޅަހެޔޮ ސިއްހަތާއި ފެންވަރު ރަނގަޅު ތައުލީމާއި ރަނގަޅު އާމްދަނީ އާއި ބޯހިޔާވަހިކަން ކަމަށެވެ. އަދި އެ ހިދުމަތްތައް ފޯރުކޮށްދިނުމަށް ސަރުކާރުން ކޮށްފައިވާ އަދި ކުރަމުން އަންނަ ބައެއް ކަންކަން ފާހަގަކުރައްވައި ރައީސް ވަނީ 5 ޓަރޝަރީ ހޮސްޕިޓަލްގެ މަސައްކަތް ކުރަމުންދާ ކަމަށާއި 130 އަށް ވުރެ ގިނަ ރަށަށް އެމްބިއުލާންސްގެ ޚިދުމަތް ފޯރުކޮށްދެމުންދާ ކަމަށް ވިދާޅުވެފައެވެ.