އައްޑޫގެ އެއަރޕޯޓުގެ މަސައްކަތް އޮތީ ފައިނަލް އިވެލުއޭޝަން މަރުހަލާގައި، ވަރަށް އަވަހަށް ބަޔަކާއި ހަވާލުކުރާނެ: ރައީސް
އެ ސިޓީގެ ބަނދަރުތައް ހެދުމާއި މަގު ހެދުމުގެ އިތުރުން ކަރަންޓު ވިއުގައިގައިގެ މަސައްކަތް ވެސް އައްޑޫ ސިޓީގައި ކުރިއަށްދާ ކަމަށް އެމަނިކުފާނު ފާހަގަކުރެއްވި
ރައީސް އިބްރާހިމް މުހައްމަދު ޞާލިހު
އައްޑޫގެ އެއަރޕޯޓް ތަރައްޤީ ނުވެ އައްޑޫ ސިޓީ އަށް ތަރައްޤީ ނުގެނެވޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހު މިފަދައިން ވިދާޅުވީ އެމްޑީޕީގެ ރިޔާސީ ޕްރައިމަރީގެ ކެމްޕެއިން ދަތުރުތަކުގެ ތެރެއިން ހުކުރު ދުވަހު ހަވީރު ބޭއްވި ޖަލްސާގައި ވާހަކަދައްކަވަމުންނެވެ. ރައީސް ޞާލިހު ވަނީ އައްޑޫގެ ތަރައްޤީ އާއި އެ ސިޓީގެ އެއަރޕޯޓާއި ވަަރަށް ބޮޑަށް ގުޅިފައިވާކަމަށް ވިދާޅުވެފައެވެ. އެއަރޕޯޓުގެ ޓެކްނިކަލް އިވެލުއޭޝަން ނިމިފައިވާ ކަމަށާއި މިހާރު އެ މަސައްކަތް އޮތީ ފައިނަލް އިވެލުއޭޝަންގެ މަރުހަލާގައި ކަމަށް ރައީސް ވިދާޅުވިއެވެ. ރައީސް ވިދާޅުވީ ލަސްނުވެ އެ މަސައްކަތް ކުންފުންޏަކާއި ހަވާލުކުރާނެ ކަމަށެވެ.
އައްޑޫސިޓީގެ ތަރައްޤީ އަށް މި ސަރުކާރުން އިސްކަން ދެއްވާ ކަމަށާއި އެ މަސައްކަތް ދޫކޮށް ނުލައްވާނެ ކަމަށް އެމަނިކުފާނު ވަނީ ވިދާޅުވެފައެވެ. އެގޮތުން އެ ސިޓީގެ ބަނދަރުތައް ހެދުމާއި މަގު ހެދުމުގެ އިތުރުން ކަރަންޓު ވިއުގައިގެ މަސައްކަތް ވެސް އައްޑޫ ސިޓީގައި ކުރިއަށްދާ ކަމަށް އެމަނިކުފާނު ފާހަގަކުރެއްވިއެވެ. ފެނާއި ނަރުދަމާގެ މަސައްކަތުގެ އިތުރުން ކަރަންޓް ވިއުގައިގެ މަސައްކަތް ނިމުމަކާއި ގާތްވެފައިވާ ކަމަށް އެމަނިކުފާނު ވިދާޅުވިއެވެ. އަދި މަގުތައް ހަދަމުން ދަނީ ރަނގަޅު ޕްލޭންއަކާއި އެކުގައި ކަމަށް ވެސް ރައީސް ވިދާޅުވިއެވެ. ރައީސް ވިދާޅުވީ އައްޑޫގެ މަގު ހެދުމުގެ މަޝްރޫޢު އަކީ ލިންކްރޯޑަށް ފަހު އެ ސިޓީގައި ކުރެވޭ އެންމެ ބޮޑު ތަރައްޤީގެ މަސައްކަތް ކަމަށެވެ.
އެ މަސައްކަތްތައް ނިމުމުން އެ ސިޓީ އަށް ޓުއަރިޒަމްގެ ފުރުސަތުތައް ފަހިވެގެންދާނެ ކަމަށް ރައީސް ވަނީ ފާހަގަކުރައްވާފައެވެ. އައްޑޫގެ ކަންކަން ކުރީ ޕްލޭނެއް ނެތި ކުއްލި ކުއްލި އަށް ކަމަށް ވެސް އެމަނިކުފާނު ވިދާޅުވިއެވެ. އަދި ތަރައްްޤީގެ މަޝްރޫޢުތައް ކުރިއަށް ގެންދަން ސަރުކާރަށް ގިނަ ގޮންޖެހުންތަކާއި ދިމާވި ކަމަށް ރައީސް ވިދާޅުވިއެވެ.
ކޮވިޑްގެ ހާލަތުގައި ރާއްޖޭގެ އިގްތިސާދު ހިފަހައްޓަން ސަރުކާރުން ކުރި މަސައްކަތްތަކުގެ ތަފްސީލަށް ރައީސް ވަނީ އަލިއަޅުވާލައްވާފައެވެ. 2008ގައި ވެސް ރާއްޖެ އަށް އިގްތިސާދީ ގޮންޖެހުންތަކައި ދިމާވި އިރު އޭރު އަމަލު ކުރި ގޮތުން އާއްމުންނަށް އެތައް ތަކުލީފުތަކަކާއި ކުރިމަތިލާން ޖެހުނު ކަމަށް ރައީސް ވަނީ ފާހަގަކުރައްވާފައެވެ. އަދި އޭރު ކަން ކުރި ގޮތާއި މިހާރު ކަންކުރި ގޮތާއި ހުރި ތަފާތުތައް ފާހަގަކުރެވޭނެ ކަަމަށް ރައިސް ވަނީ ވިދާޅުވެފައެވެ. އަދިވެސް ދުނިޔޭގެ އިގްތިސާދު ރަނގަޅު ނުވާ ކަމަށާއި ސަރުކާރުން ކުރިއަށް އޮތްތަނުގައި ވެސް އަމަލުކުރާނީ ރައްޔިތުންގެ މަސްލަހަތަށް ބަލައިގެން ކަަމަށް އެމަނިކުފާނު ވިދާޅުވިއެވެ.
