ނޮވެމްބަރު މަހުވެސް އެންމެ ގިނައީ ކުޑަކުދިންނަށް ކުރާ އެކި ބާވަތުގެ އަނިޔާއާގުޅޭ މައްސަލަތައް
ނޮވެމްބަރު މަހު އެ މިނިސްޓްރީއަށް ޖުމްލަ 252 މައްސަލަ ހުށަހަޅާފައިވޭ
މާލޭގެ މަގުމަތި
2022 ވަނަ އަހަރުގެ ނޮވެމްބަރު މަސް ނިމުނުއިރުވެސް އެންމެ ގިނައިން ހުށަހަޅާފައިވަނީ ކުޑަކުދިންނަށް ކުރާ އެކި ބާވަތުގެ އަނިޔާއާގުޅޭ މައްސަލަތައް ކަމަށް ޖެންޑަރ މިނިސްޓްރީން ބުނެފިއެވެ.
ޖެންޑަރ މިނިސްޓްރީން އާންމުކޮށްފައިވާ ރިޕޯޓުގައިވާގޮތުން, ނޮވެމްބަރު މަހު އެ މިނިސްޓްރީއަށް ޖުމްލަ 252 މައްސަލަ ރިޕޯޓުކޮށް އެޓެންޑުކޮށްފައިވެއެވެ. މީގެ ތެރެއިން 107 މައްސަލައަކީ ކުޑަކުދިންނަށް ކުރާ އެކި ބާވަތުގެ އަނިޔާއާގުޅޭ މައްސަލަތައް ކަމަށް މިނިސްޓްރީން ހާމަކޮށްފައިވެއެވެ.
ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ މައްސަލަތަކުގެ ތެރޭގައި; އިހުމާލުވުމުގެ 28 މައްސަލައާއި، ޖިންސީ ހާނީއްކައިގެ 25 މައްސަލައާއި، ޖިސްމާނީ ހާނީއްކައިގެ 18 މައްސަލައާއި، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 17 މައްސަލައާއި، ނަފްސާނީ ހާނީއްކައިގެ 9 މައްސަލައާއި، އެހެން ކުދިންގެ ފަރާތުން ގަނާ ލިބުމުގެ 3 މައްސަލައާއި، ބްލެކްމެއިލް ކުރުމުގެ 2 މައްސަލައާއި، ކުޑަކުދިންނަށް ޖިންސީގޮތުން ގްރޫމްކުރުމުގެ 2 މައްސަލައާއި، އިންޓަރނެޓް މެދުވެރިކޮށް ކުޑަކުދިންނަށް ޖިންސީ ގްރޫމިންގ ކުރުމުގެ 1 މައްސަލައާއި، ނަހަމަ ގޮތުގައި ބޭނުންކުރުމުގެ 1 މައްސަލަ، އަދި ނަހަމަ ގޮތުގައި ވިޔަފާރީގެ ފައިދާއަށް ބޭނުންކުރުމުގެ 1 މައްސަލަ ވަނީ ހުށަހަޅާފައެވެ.
މީގެ އިތުރުން ވަކި ޖިންސަކަށް ވީތީ ކުރާ އަނިޔާއާއި ގެވެށި އަނިޔާގެ 50 މައްސަލަ ނޮވެންބަރ މަހު މިނިސްޓްރީއަށް ވަނީ ހުށަހަޅާފައެވެ. މިފަދަ މައްސަލަތަކުގެ ތެރޭގައި އެންމެ ގިނައިން ހިމެނެނީ ޖިސްމާނީ އަނިޔާ ކުރުމުގެ މައްސަލަތަކެވެ. އެގޮތުން މިބާވަތުގެ 21 މައްސަލައެއް ވަނީ ހުށަހަޅާފައެވެ. އަދި ނަފްސާނީ އަނިޔާކުރުން ނުވަތަ އަނގަބަހުން ކުރެވޭ އަނިޔާގެ 14 މައްސަލައަކާއި، ބިރުދެއްކުމުގެ ގޮތުން ކުރެވޭ ކަންކަމާގުޅޭ 10 މައްސަލައާއި، ޖިންސީ ހާނީއްކަ ކުރުމުގެ 2 މައްސަލައާއި، މާލީ ފުދުންތެރިކަން ފޯރުކޮށްދިނުމުގައި ހުރަސްއެޅުމުގެ 2 މައްސަލަ، އަދި ޖިންސީ ފުރައްސާރަކުރުމުގެ 1 މައްސަލަ ވަނީ ހުށަހަޅާފައެވެ.
މިނިސްޓްރީން ބުނީ، އާއިލީ މައްސަލަތަކާ ގުޅުންހުރި 18 މައްސަލައެއް ނޮވެންބަރ މަހު މިނިސްޓްރީއަށް ހުށަހަޅާފައިވާކަމަށެވެ. މިފަދަ މައްސަލަތަކުގެ ތެރޭގައި; ކުދިން ބެލުމުގައި ޖެހޭ 8 މައްސަލަ، ކުދިންނާ ބައްދަލުކުރުމުގައި ޖެހޭ 5 މައްސަލަ، އަދި ހަލާނާތުގެ 5 މައްސަލަ ވަނީ ހުށަަހަޅާފައެވެ.
އަމިއްލަ ނަފުސަށް ގެއްލުން ދިނުމާއި އަމިއްލައަށް މަރުވާން އުޅުމާގުޅޭ 25 މައްސަލަ ނޮވެންބަރ މަހު މިނިސްޓްރީއަށް ރިޕޯޓުކޮށް އެޓެންޑްކޮށްފައިވެއެވެ.
މީގެ އިތުރުން ނުކުޅެދުންތެރިކަން ހުންނަ މީހުންނާއި އުމުރުން ދުވަސްވީ މީހުންނަށް އަޅާލުމާއި އެހީތެރިކަން ބޭނުންވެގެން 22 މައްސަލަ ނޮވެންބަރ މަހު މިނިސްޓްރީއަށް ވަނީ ހުށަހަޅައިފައެވެ. އެއީ ނުކުޅެދުންތެރިކަން ހުންނަ މީހުންނަށް އަޅާލުމާއި އެހީތެރިކަން ބޭނުންވެގެން ހުށަހަޅާފައިވާ 18 މައްސަލައާއި އުމުރުން ދުވަސްވީ މީހުންނަށް އަޅާލުމާއި އެހީތެރިކަން ބޭނުންވެގެން ހުށަހަޅާފައިވާ 4 މައްސަލައެކެވެ. ސިއްހީ ފަރުވާ ފޯރުކޮށްދިނުމުގެ ކުޅަދާނަކަން ނެތުމާގުޅޭ 2 މައްސަލަ ނޮވެންބަރ މަހު ވަނީ މިނިސްޓްރީއަށް ހުށަހަޅާފައެވެ.
މިނިސްޓްރީން ބުނީ، ކުޑަކުދިންގެ އަޚުލާގާއި ގުޅުންހުރި 20 މައްސަލަ ނޮވެންބަރ މަހު ހުށަހަޅާފައިވާކަމަށެވެ. އެގޮތުން ސްކޫލަށް ދާން ބޭނުންނުވުމުގެ 6 މައްސަލައާއި، ސުލޫކީ 4 މައްސަލައާއި، ރުޅި އިސްކުރުމާއި ރުޅިގަދަވެގެން އުޅުމުގެ 3 މައްސަލައާއި، ކުށުގެ ވެއްޓަށް ހުށަހެޅިދާނެފަދަ އަމަލުތަކުގެ 2 މައްސަލައާއި، އެހެން ކުދިންނަށް ގަނާކުރުމުގެ 2 މައްސަލައާއި، ގެއިން ނިކުމެގެން ދިއުމުގެ 2 މައްސަލަ އަދި އެހެން ކުދިންނަށް އިންޓަރނެޓް މެދުވެރިކޮށް ގަނާކުރުރުމުގެ 1 މައްސަލަ ހިމެނެއެވެ.
ކުޑަކުދިންގެ ހައްގުތަކާ ގުޅުންހުރި 5 މައްސަލަ ނޮވެންބަރ ރިޕޯޓުކޮށްފައިވާކަމަށް މިނިސްޓްރީން ބުނެފައިވެއެވެ. މިބާވަތުގެ މައްސަލަތަކުގެ ގޮތުގައި ކުދިން ސްކޫލަށް ނުފޮނުވުމުގެ 2 މައްސަލަ، އުފަންވުން ރަޖިސްޓްރީ ކުރުމާބެހޭ 1 މައްސަލަ، އައިޑީ ކާޑު ޕާސްޕޯޓް ފޯރުކޮށްނުދިނުމުގެ 1 މައްސަލަ، އަދި ސިއްހީ ފަރުވާ ފޯރުކޮށް ނުދިނުމުގެ 1 މައްސަލަ ވަނީ ހުށަހަޅާފައެވެ.
މީގެ އިތުރުން ކުށުގެ ވެއްޓަށް ހުށަހެޅިދާނެފަދަ އަމަލުގެ ގޮތުގައި ނޮވެންބަރ މަހު 3 މައްސަލައެއް ހުށަހަޅާފައިވެއެވެ.
ޖެންޑަރ މިނިސްޓްރީން އިތުރަށް ބުނީ، ނޮވެމްބަރ މަހުގެ ނިޔަލަށް ދައުލަތުގެ ބެލުމުގެ ދަށުގައި ތިބީ 189 ކުދިން ކަމަށެވެ. ނޮވެމްބަރ މަހު ދައުލަތަށް އަލަށް 7 ކުއްޖަކު ނަގާފައިވާއިރު، 1 ކުއްޖަކު އާއިލާއަށް ރީއިންޓަރގްރޭޓް ކުރެވި، އަދި 18 އަހަރު ފުރުމާ ގުޅިގެން 1 ކުއްޖަކަށް ވަޒީފާ ހޯދައިދީފައިވާކަމަށެވެ.
