ޖޫރިމަނާ ކުރުމުގައި ވަކި ގައުމެއްގެ އުޅަނދެއްތޯއެއް ނުބަލާނެ: ނައީމް
މަރުހަލާތަކާއި އިޖުރާއަތްތައް ފުރިހަމަ ކުރުމަށްފަހު އަޅަންޖެހޭ ފިޔަވަޅުތައް އަޅާނެ
އީޕީއޭގެ ޑިރެކްޓަރ ޖެނެރަލް އިބްރާހީމް ނައީމް
ޖޫރިމަނާ ކުރުމުގައި ވަކި ގައުމެއްގެ އުޅަނދެއްތޯ ނުބަލާނެކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހީމް ނައީމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ދެއްކެވި ވާހަކަފުޅުގައި ނައީމް ވިދާޅުވީ، ތިލަމާލެ ބްރިޖް އެޅުމަށް ބޭނުންކުރި ޕްލެޓްފޯމެއް ވިލިމާލޭ ފަރަށް އަރައި ލިބުނު ގެއްލުންތަކާ ގުޅިގެން އޭރު އެކި ގޮތްގޮތަށް މީހުން ވާހަކަދައްކާފައި ވާކަމަށެވެ. އެފްކޮންސްއަށް ވުމުން ޖޫރިމަނާކުރަން ނުކެރޭނެކަމަށް ބުނެ ބައެއް ފަރާތްތަކުން ވާހަކަދެއްކި ކަމަށާއި، އެއީ ސިޔާސީ ވާހަކަތަކެއް ކަމަށް ވިދާޅުވިއެވެ.
މަރުހަލާތަކާއި އިޖުރާއަތްތައް ފުރިހަމަ ކުރުމަށްފަހު އަޅަން ޖެހޭ ފިޔަވަޅުތައް އަޅާކަމަށާއި އަދި ވަކި ގައުމެއްގެ އުޅަނދެއްތޯ ބެލުމެއް ނެތި ފިޔަވަޅު އަޅާކަމަށްވެސް ނައީމް ވިދާޅުވިއެވެ.
ޖޫރިމަނާ ކުރުމުން ކޮންމެ ފަރާތަކަށްވެސް އަމިއްލައަށް ދިރާސާ ކުރުމުގެ ފުރުސަތު އޮންނަކަމަށާއި، އެހެންނަމަވެސް އީޕީއޭއިން ބަލާނީ އީޕީއޭއިން ކުރާ ދިރާސާއަށްކަން ނައީމް ފާހަގަކުރެއްވިއެވެ.
ތިލަމާލެ ބްރިޖް އެޅުމަށް ބޭނުންކުރި ޕްލެޓްފޯމެއް ވިލިމާލޭ ފަރަށް އަރައި ލިބުނު ގެއްލުންތަކާ ގުޅިގެން އެފްކޮންސް ޖޫރިމަނާކުރަން ނިންމި ނިންމުން އިސްތިއުނާފުކޮށްފައިވާއިރު، އިސްތިއުފާނަށް މިނިސްޓަރަށް ހުށަހެޅިޔަސް ވަކި މުއްދަތެއް ނޯންނަ ކަމަށާއި، އާންމުކޮށް 30 ދުވަހުގެ ތެރޭގައި މިނިސްޓަރު އެ މައްސަލަ ރިވިއުކުރައްވާނެ ކަމަށް ނައީމް އިތުރަށް ވިދާޅުވިއެވެ.
ނައީމް މިފަދައިން ވިދާޅުވެފައިވާއިރު، އެފްކޮންސް ކުންފުނިން އެންވަޔަރަމަންޓް މިނިސްޓްރީއަށް މި ނިންމުން އިސްތިއުނާފު ކުރުމަށް ހުށަހަޅާފައިވަނީ މިދިޔަ އަހަރުގެ ޑިސެމްބަރު 11 ވަނަ ދުވަހުއެވެ.
ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ "ސެލްފް އެލެވޭޓިންގ ޕްލެޓްފޯމް" (އެސްއީޕީ)، ވިލިމާލެ ފަރަށް އެރުމުގެ ސަބަބުން ލިބުނު ގެއްލުންތަކާ ގުޅިގެން، ބްރިޖުގެ މަސައްކަތްކުރަމުންދާ އެފްކޮންސް ޖޫރިމަނާކުރަން އީޕީއޭއިން ނިންމީ 69,411,800.00 (ފަސްދޮޅަސް ނުވަ މިލިއަން ހަތަރުލައްކަ އެގާރަހާސް އަށްސަތޭކަ) ރުފިޔާއިންނެވެ. އީޕީއޭއިން ވަނީ ސަރުކާރު ބަންދު ދުވަސްތައް ހިމެނޭހެން 30 ދުވަހުގެ ތެރޭގައި މި ފައިސާ އީޕީއޭއަށް ދެއްކުމަށް އެފްކޮންސްއަށް އަންގާފައެވެ. އެގޮތަށް އަންގާފައިވަނީ ނޮވެމްބަރު މަހުގެ 13ގައެވެ.
އީޕިއޭއިން ނެރުނު ބަޔާނެއްގައި ބުނެފައިވަނީ، ޕްލެޓްފޯމުގެ ވެރިފަރާތާއި އެ އިދާރާ ގުޅިގެން ސަރވޭއެއް ކުރިކަމަށާއި، 14-22 އޮކްޓޯބަރަށް އެފްކޮންސްއިން ކުރި ދިރާސާގައި އެ އެޖެންސީގެ އޮބްޒަރވަރުން ބައިވެރިވެފައި ވާނެކަމަށެވެ. އެގޮތުން ބެލި ބެލުމުން، ޕްލެޓްފޯމްގެ ބައިތަކުންނާއި އެތަކެތި ނެގުމަށް ކުރި މަސައްކަތުން އެ ސަރަހައްދުގެ ފަރުގެ އެކި ދިމަދިމާއިން އެކިވަރުގެ ގެއްލުން ލިބިފައިވާކަން އެނގިފައިވާކަމަށް އީޕީއޭއިން ބުނެއެވެ. އީޕީއޭއިން ބުނީ 2755 އަކަމީޓަރުގެ ސަރަހައްދަކަށް ގެއްލުން ލިބިފައިވާކަމަށް ކަނޑައަޅާފައިވާނެ ކަމަށެވެ.
މި ހާދިސާއާ ގުޅިގެން ފަރުގައި 10 ފޫޓުގެ ފުންމިނުގެ ބޮޑެތި ވަޅުގަނޑުތައްވެސް ވަނީ ހެދިފައެވެ. އެ ޕްލެޓްފޯމް ފުންކޮށްފައިވަނީ ޕްލެޓްފޯމު ފަރަށް އެރިތާ 12 ދުވަސް ފަހުން، އޮގަސްޓް މަހުގެ 28 ވަނަ ދުވަހުއެވެ.
