އެމްބަޕޭ އަށް ރެއާލް އިން ޝައުގުވެރިވާ ކަމަށް އެ ކްލަބްގެ ރައީސް ވިދާޅުވެއްޖެ

އެމްބަޕޭ އަށް ރެއާލް މެޑްރިޑުން ޝައުގުވެރިވާ ކަމަށް އެ ކްލަބުގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެ އެވެ.

ނޫސްވެރިންނަށް މައުލޫމާތު ދެއްވަމުން ޕެރޭޒް ވިދާޅުވީ އެބަޕޭއަކީ ވަރަށް ރަނގަޅު ކުޅުންތެރިއެއް ކަމަށާއި، ކޯޗު ޒައިނުއްދީން ޒިދާނަށްވެސް އޭނާ ކަމުދާ ކަމަށެވެ. އެހެން ނަމަވެސް ޕެރޭޒް ވިދާޅުވީ އުމުރުން 18 އަހަރުގެ އެމްބަޕޭ ރެއާލް އަށް އައިސް ފުރަތަމަ އެގާރައިން ޖާގަ ހޯދަން އުނދަގޫވާނެ ކަމަށް ދެކޭ ކަމަށާއި، ބެންޗުގައި ބަހައްޓަން ކްލަބަށް ގެންނަން ބޭނުންނުވާ ކަމަށެވެ.

އެގޮތުން އޭނާ ބުނީ އެމްބަޕޭއާ މެދު ވިސްނަމުން އަންނަ ކަމަށާއި، ކްލަބުން ޖާގައެއް ދިނުމާ މެދު އަދި ގޮތެއް ނުނިންމާ ކަމަށެވެ. އެހެންނަމަވެސް ރިޕޯޓްތައް ބުނާ ގޮތުން ރެއާލް އިން އަންނަނީ އެމްބަޕޭ ހޯދުމަށް 135 މިލިއަން ޔޫރޯއަށް ވުރެ އަގުހުރި ބިޑެއް ހުށަހެޅުމަށް ތައްޔާރުވަމުންނެވެ.

އެމްބަޕޭ ހޯދުމަށް ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި މެންޗެސްޓާ ޔުނައިޓެޑް، އާސެނަލް އަދި ޕެރިސް ސެއިންޓް ޖާމަން (ޕީއެސްޖީ) ހިމެނެއެވެ.

މިދިޔަ އަހަރު މޮނާކޯއާއެކު ތިން އަހަރު ދުވަހުގެ އެއްބަސްވުމެއް ހަދާފައިވާ އެމްބަޕޭ ޓްރާންސްފާ ބާޒާރުގައި ކްލަބް ބަދަލުކުރާނެ ކަމަށް ވަނީ ބެލެވިފައެވެ. އެހެންނަމަވެސް އޭނާ ބަދަލުވާނީ ކޮން ކްލަބަކަށް ކަން އަދި ކަށަވަރެއް ނުވެއެވެ.

އުމުރުން 18 އަހަރުގެ އެމްބަޕޭ މޮނާކޯއާ އެކު އޭނާގެ ސީނިއާ ކެރިޔަރު ފަށާފައިވާއިރު، މިހާތަނަށް އޭނާ ވަނީ އެޓީމާ އެކު ހޭދަކުރި ދެ ސީޒަނުގައި ކުޅުނު 58 މެޗުގައި 27 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ އެޓީމާއެކު މި ސީޒަނުގައި ލީގުވެސް ކާމިޔާބުކޮށްފައެވެ.

ފްރާންސްގެ ސީނިއާ ޓީމަށް ހަތަރު މެޗު ކުޅެފައިވާ އެމްބަޕޭ ވަނީ ފްރާންސްގެ 19 އަހަރުން ދަށުގެ ޓީމާއެކު މިދިޔަ އަހަރު 19 އަހަރުން ދަށުގެ ޔޫރޯ ފުޓުބޯޅަ މުބާރާތް ވެސް ކާމިޔާބުކޮށްފައެވެ. އޭނާ ވަނީ މިދިޔަ ސީޒަނުގެ ފްރާންސްގެ އެންމެ ޒުވާން ކުޅުންތެރިޔާގެ މަގާމު ވެސް ހޯދާފައެވެ.