ކަށިތަކަކީ ގެއްލުނު މީހާގެ ކަށިތަކެއްކަން ކަށަވަރުކުރެވޭނީ ޑީއެންއޭ ހައްދައިގެން: އެފްކޮންސް

މިދިޔަ ބުރާސްފަތި ދުވަހުގެރޭ ގުޅިފަޅުގައި ހިނގި އަލިފާނުގެ ހާދިސާއަށްފަހު އެފްކޮންސްގެ އެކޮމޮޑޭޝަން ބްލޮކުން ފެނުނު ކަށިތަކަކީ، އެތަނުން ގެއްލުނު މީހާގެ ކަށިތަކެއްކަން ކަށަވަރު ކުރެވޭނީ ޑީއެންއޭ ޓެސްޓުތަކަށްފަހުކަމަށް އެ ކުންފުނިން ބުނެފިއެވެ.

މިދިޔަ ބުރާސްފަތި ދުވަހުގެ ރޭ ގުޅިފަޅުގައި ނުރައްކާތެރި އަލިފާނުގެ ޙާދިސާއެއް ހިނގީ، ތިލަމާލެ ބްރިޖްގެ މަސައްކަތްކުރާ މުވައްޒަފުން ބައިތިއްބާ އެކޮމަޑޭޝަން ބްލޮކެއްގައެވެ. މި އެކޮމޮޑޭޝަން ބްލޮކްގައި 457 މީހުން ދިރިއުޅެމުން އައި ކަމަށް އެފްކޮންސް އިން ބުނެއެވެ.

އަލިފާނުގެ ޙާދިސާގައި އެކޮމަޑޭޝަން ބްލޮކްގައި ދިރިއުޅުނު ގިނަ ބަޔަކަށް އެކި ކަހަލަ އަނިޔާތައް ލިބިގެން ފަރުވާ ދީފައިވެއެވެ. އެގޮތުން ހޮސްޕިޓަލަށް ގެންދިޔަ 78 މީހުންގެ ތެރެއިން، 32 މީހުން އެޑްމިޓްކޮށް ފަރުވާ ދީފައިވެއެވެ. އަދި 4 މީހެއް އޮޕަރޭޝަން ކޮށްފައިވެއެވެ.

މި ހާދިސާގައި މީހަކު ގެއްލިގެން އުޅޭކަން އެނގިފައިވަނީ، ހެޑް ކައުންޓާއި ސައިޓްގައި މަސައްކަތް ކުރާ އެހެން މީހުން ދިން މައުލޫމާތުންނެވެ. އެހެންކަމުން އެ ސައިޓް އިތުރަށް ބަލާ ފާސްކުރުމުގެ ތެރޭގައި އިންސާނެއްގެ ހަށިގަނޑުގެ ބައިތަކެއްކަމަށް ބެލެވޭ ބައިތަކެއް ވަނީ ފެނިފައެވެ.

އެފްކޮންސްއިން ބުނީ ފެނުނު ހަށިގަނޑުގެ ބައިތަކަކީ ގެއްލުނު މީހާގެ ހަށިގަނޑުގެ ބައިތަކެއްކަން ކަށަވަރުވާނީ ޑީއެންއޭ ޓެސްޓަށް ފަހުގައިކަަމަށެވެ. އަދި އެ ޓެސްޓްތައް ހަދަމުންދާ ކަމަށްވެސް އެ ކުންފުނިން ބުންޏެވެ.

އެފްކޮންސްއިން ބުނީ، ގެއްލުނު މީހާގެ އާއިލާއަށް މިކަމާއި ގުޅޭ މަޢުލޫމާތު ފޯރުކޮށްދެމުންދާކަމަށެވެ. އަދި މިކަމާއި ގުޅިގެން ދޭންޖެހޭ އެހީތެރިކަމާއި އެއްބާރުލުން ވެސް އާއިލާއަށް ދެމުންދާކަމަށެވެ.