ގުޅީފަޅުގެ އަލިފާނުގެ ހާދިސާ ހިނގި ތަނުން އިތުރު ކަށިތަކެއް ފެނިއްޖެ
މީގެ ކުރިން ވެސް ކަށިތަކެއް ވަނީ ފެނިފައި
ގުޅީފަޅު އަލިފާން
މި މަހުގެ 15 ވަނަ ދުވަހުގެ ރޭ ގުޅީފަޅުގައި ހިނގި އަލިފާނުގެ ހާދިސާއަށްފަހު އެފްކޮންސްގެ އެކޮމޮޑޭޝަން ބްލޮކުން އަނެއްކާވެސް އިތުރު ކަށިތަކެއް ފެނިއްޖެއެވެ.
ފުލުުހުން މައުލޫމާތު ދީފައިވާ ގޮތުގައި މި ކަށިތައް ފެނިފައިވަނީ ހޯމަ ދުވަހު އެތަން ސާފުކުރުމުގެ ތެރޭގައެވެ. ފެނުނު ކަށިތަކަކީ، އެތަނުން ގެއްލުނު މީހާގެ ކަށިތަކެއްކަން އަދި ކަށަވަރެއް ނުކުރެވެއެވެ.
މިދިޔަ ބުރާސްފަތި ދުވަހުގެ ރޭ ގުޅިފަޅުގައި ނުރައްކާތެރި އަލިފާނުގެ ޙާދިސާއެއް ހިނގީ، ތިލަމާލެ ބްރިޖްގެ މަސައްކަތްކުރާ މުވައްޒަފުން ބައިތިއްބާ އެކޮމޮޑޭޝަން ބްލޮކެއްގައެވެ. މި އެކޮމޮޑޭޝަން ބްލޮކްގައި 457 މީހުން ދިރިއުޅެމުން އައި ކަމަށް އެފްކޮންސް އިން ބުނެފައިވެއެވެ.
އަލިފާނުގެ ޙާދިސާގައި އެކޮމޮޑޭޝަން ބްލޮކްގައި ދިރިއުޅުނު ގިނަ ބަޔަކަށް އެކި ކަހަލަ އަނިޔާތައް ލިބިގެން ފަރުވާ ދީފައިވެއެވެ. އެގޮތުން ހޮސްޕިޓަލަށް ގެންދިޔަ 78 މީހުންގެ ތެރެއިން، 32 މީހުން އެޑްމިޓްކޮށް ފަރުވާ ދީފައިވެއެވެ. އަދި 4 މީހެއް އޮޕަރޭޝަން ކޮށްފައިވެއެވެ.
މި ހާދިސާގައި މީހަކު ގެއްލިގެން އުޅޭކަން އެނގިފައިވަނީ، ހެޑް ކައުންޓާއި ސައިޓުގައި މަސައްކަތް ކުރާ އެހެން މީހުން ދިން މައުލޫމާތުންނެވެ. އެހެންކަމުން އެ ސައިޓު އިތުރަށް ބަލާ ފާސްކުރުމުގެ ތެރޭގައި އިންސާނެއްގެ ހަށިގަނޑުގެ ބައިތަކެއްކަމަށް ބެލެވޭ ބައިތަކެއް ފުރަތަމަ ފެނިފައިވަނީ އާދިއްތަ ދުވަހުއެވެ.
އެފްކޮންސްއިން ބުނީ ފެނުނު ހަށިގަނޑުގެ ބައިތަކަކީ ގެއްލުނު މީހާގެ ހަށިގަނޑުގެ ބައިތަކެއްކަން ކަށަވަރުވާނީ ޑީއެންއޭ ޓެސްޓަށް ފަހުގައިކަަމަށެވެ. އަދި އެ ޓެސްޓްތައް ހަދަމުންދާ ކަމަށްވެސް އެ ކުންފުނިން ބުނެފައިވެއެވެ.
އެފްކޮންސްއިން ބުނީ، ގެއްލުނު މީހާގެ އާއިލާއަށް މިކަމާއި ގުޅޭ މަޢުލޫމާތު ފޯރުކޮށްދެމުންދާކަމަށެވެ. އަދި މިކަމާއި ގުޅިގެން ދޭންޖެހޭ އެހީތެރިކަމާއި އެއްބާރުލުން ވެސް އާއިލާއަށް ދެމުންދާކަމަށެވެ.
