އެއްވެސް މުވައްޒަފަކަށް މުސާރަ ނުދީ ނޯންނާނެ: އެފްކޮންސް

ތިލަމާލެ ބްރިޖުގެ މަސައްކަތްކުރަމުންދާ އެފްކޮންސްގެ މުވައްޒަފުންނަށް މުސާރަ ނުދޭ ކަމަށް ބައެއް ފަރާތްތަކުން ދައްކަމުންދާ ވާހަކަތަކަށް އެކުންފުނިން ރައްދު ދީފިއެވެ.

ތިލަމާލެ ބްރިޖުގެ މަސައްކަތްކުރަމުންދާ އެފްކޮންސް ކުންފުނީގެ މުވައްޒަފުން ގުޅިފަޅުގައި ތިބި އެކޮމޮޑޭޝަން ބްލޮކެއްގައި މިމަހުގެ 15 ވަނަ ދުވަހު އަލިފާނުގެ ހާދިސާއެއް ހިނގުމުން އެކި ފަރާތްތަކުން އެކި ގޮތްގޮތަށް ވާހަކަތައް ދައްކަމުންދިޔައެވެ. މިގޮތުން އެ މުވައްޒަފުންނަށް މުސާރަ ނުދޭތީ އެމީހުން އަލިފާން ރޯކޮށްލީކަމަށް ވެސް ބައެއް ފަރާތްތަކުން ތުހުމަތުކުރަމުންދިޔައެވެ.

މިކަމާއި ގުޅިގެން އެފްކޮންސްއިން ބުނީ އެއްވެސް މުވައްޒަފަކަށް މުސާރަ ދޭން ޖެހިފައި ނޯންނާނެ ކަމަށެވެ. އަދި ހުރިހާ މުވައްޒަފުންނަށް ވެސް ބަރާބަރަށް، ދޭންވާ ތާރީޚުގައި މުސާރަ ދެމުންދާކަމަށް އެ ކުންފުނިން ބުނެފައިވެއެވެ.

މުވައްޒަފުންގެ ސަލާމަތާއި ރައްކާތެރިކަން ކަށަވަރުކުރުމަކީ އެންމެ އިސްކަންދޭ އެއް ކަންތައް ކަމަށާއި، މިފަދަ ކަންކަމަކީ ސީރިއަސް ކަމާއެކު ބަލާނެ ކަންކަން ކަމަށް އެފްކޮންސްއިން ބުނެފައިވެއެވެ.

އަލިފާނުގެ ހާދިސާގެ ތަހުގީގު މިހާރު ކުރިއަށްދާއިރު، މި ހާދިސާއަށްފަހު އެކުންފުނީގެ މުވައްޒަފަކު ގެއްލިގެން މިހާރު ދަނީ ހޯދަމުންނެވެ. އެމީހާ ގެއްލިގެން ރިޕޯޓުކުރުމުން ފުލުހުން ގެންދަނީ ހާދިސާ ހިނގި އިމާރާތާއި އެ އިމާރާތުގެ ވަށައިގެންވާ ސަރަހައްދު އިތުރަށް ބަލައި ފާސްކުރަމުންނެވެ.  

މި ހާދިސާގައި ހާލުގައި ޖެހުނު މީހުންނަށް ވަގުތީ ބޯހިޔާވަހިކަން މިހާރު ވަނީ ހަމަޖައްސައިދީފައެވެ. މި ހާދިސާގައި އެކޮމޮޑޭޝަން ބްލޮކް އެއްކޮށް އަނދައި ހުލިވެފައިވާއިރު އެފްކޮންސްގެ 60 މުވައްޒަފަކަށް އަނިޔާވެގެން ހޮސްޕިޓަލަށް ގެންގޮސް ފަރުވާދީފައިވާކަމަށް އެކުންފުނިން ބުނެފައިވެއެވެ.