ކައުންސިލްތަކުން ދިވެހި ފުލުހުންގެ އެހީތެރިކަން ހޯދުމާބެހޭ ގަވާއިދަށް އަމަލުކުރަން ފަށައިފި

ކައުންސިލްތަކުން ދިވެހި ފުލުހުންގެ އެހީތެރިކަން ހޯދުމާބެހޭ ޤަވާއިދު ގެޒެޓުކޮށް، އެ ޤަވާއިދަށް އަމަލުކުރަން ފަށައިފިއެވެ.

މިއީ، ލޯކަލް ކައުންސިލްތަކުން އެކުލަވައިލައި ގެޒެޓް ކޮށްފައިވާ މުނިސިޕަލް ގަވާއިދުތައް ތަންފީޛު ކުރުމުގެ ބޭނުމަށް، ކައުންސިލްތަކުން ދިވެހި ފުލުހުންގެ އެހީތެރިކަން ހޯދުމާ ގުޅޭ އުސޫލުތައް ބަޔާންކުރުމަށް ޓަކައި، އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ ދަށުން ބާރު ލިބިގެން އެކުލަވައިލައިފައިވާ ގަވާއިދެކެވެ.

މި ގަވާއިދުގެ މަގުސަދަކީ، ކައުންސިލްތަކުން އެކުލަވައިލާ މުނިސިޕަލް ގަވާއިދުތައް ތަންފީޛު ކުރުމުގައި، އެ ގަވާއިދުތަކާ އެއްގޮތަށް ޢަމަލު ކުރަންޖެހޭ ފަރާތްތަކުން އެ ގަވާއިދުތަކަށް ޢަމަލުކުރަން އިޢުތިރާޟުކުރާ ހާލަތުގައި ކައުންސިލުތަކުން ފުލުހުންގެ އެހީތެރިކަމަށް އެދުމާއި، އެފަދައިން އެދޭ ހާލަތްތަކުގައި ފުލުހުން އެހީތެރިކަން ކައުންސިލްތަކަށް ފޯރުކޮށްދިނުމާ ގުޅޭ އުސޫލުތައް ކަނޑައެޅުމެވެ.

އެގޮތުގެ މަތިން މި ގަވާއިދުގެ ދަށުން ކައުންސިލަކުން ފުލުހުންގެ އެހީތެރިކަމަށް އެދިއްޖެ ހިނދެއްގައި، ވީ އެންމެ އަވަސް ފުރުޞަތެއްގައި ފުލުހުން އެކަމަށް އިޖާބަދީ، އެހީތެރިކަން ފޯރުކޮށްދިނުމަށް މަސައްކަތް ކުރަންވާނެކަމަށް ވަނީ ބަޔާންކޮށްފައެވެ.

އަދި އެ މުއްދަތުގައި އެހީތެރިކަން ފޯރުކޮށްދެވެން ނެތްނަމަ، ސަބަބު ބަޔާންކޮށް، އެހީތެރިކަމަށް އެދުނު ކައުންސިލަކަށް އެކަން އަންގަން ޖެހެއެވެ.

ޤަވާއިދުގައި ބުނެފައިވާ ގޮތުގައި މި ޤަވާއިދުގެ ދަށުން ކައުންސިލުން އެހީއަށް އެދޭ ކަންކަމުގައި ކޯޓުއަމުރެއް ހޯދަން ޖެހިއްޖެނަމަ، އެ އަމުރެއް ހޯދުމުގެ އެންމެހައި ކަމެއް ކުރަންވާނީ ،އެ ކައުންސިލަކުންނެވެ.

މީގެ އިތުރުން، ކައުންސިލްތަކަށް ފުލުހުންގެ އެހީތެރިކަމަށް އެދެވިދާނެ ޙާލަތްތައްވެސް މި ޤަވާއިދުގައި ވަނީ ބަޔާންކޮށްފައެވެ. އެގޮތުން ކައުންސިލަކުން އެކުލަވައިލައިފައިވާ ރަށްވެހިކަމުގެ ގަވާއިދަކާ ޚިލާފުވެގެން ކައުންސިލު އިދާރާއަށް ހާޒިރުވުމަށް އަންގާ އެންގުމަށް އިޖާބަނުދޭ ފަރާތްތައް ކައުންސިލު އިދާރާއަށް ހާޒިރުކުރުވުމަށް ފުލުހުން އެހީތެރިވާން ޖެހެއެވެ.

އަދި ޖިނާއީ ކުށެއް އެކުލެވިގެން ނުވާ، އާންމު އިޖުތިމާޢީ މިންގަނޑުތަކާ ޚިލާފުކަމެއް، ނުވަތަ ތިމާވެށްޓާ ގުޅޭ ކަމެއް، ނުވަތަ މަސްވެރިކަމާއި، ދަނޑުވެރިކަމާ ނުވަތަ ފަތުރުވެރިކަން ފަދަ ކަމަކާ ގުޅޭ ކަމެއް ކައުންސިލުގެ ފަރާތުން ތަންފީޛު ކުރަން މަސައްކަތްކޮށް، ފުލުހުންގެ އެހީތެރިކަމާއެކު ނޫނީ ތަންފީޛު ނުކުރެވޭ ކަމެއް ނަމަ، ފުލުހުންގެ ޚިދުމަތް ބޭނުންކޮށްގެން މައްސަލަ ޙައްލުކުރަން އެދެވިދާނެއެވެ.

ހަމައެއާއެކު، ކައުންސިލުން ތަންފީޛު ކުރަން ކުރާ ކަމަކަށް އެއްވެސް ފަރާތަކުން ހުރަސްއަޅާ ނަމަ، އެ ކަމަކަށް އެ ހުރަސްއަޅާ ފަރާތަކާ ނުވަތަ ފަރާތްތަކާ ދޭތެރޭގައި ޤާނޫނީ ފިޔަވަޅު އެޅުމަށްވެސް ފުލުހުންގެ ކިބައިން އެދެވިދާނެއެވެ.

އޭގެ އިތުރުން، ކައުންސިލުން އެކުލަވައިލާ މުނިސިޕަލް ގަވާދުތަކާ ގުޅިގެން ކައުންސިލުގެ ނިންމުމެއް ނުވަތަ ޤަރާރެއް ނުވަތަ ކޯޓު އަމުރެއް ނުވަތަ ޙުކުމެއް ތަންފީޛު ކުރުމަށް ފުލުހުންގެ ޚިދުމަތަށް އެދެވިދާނެކަމަށް ޤަވާއިދުގައި ބުނެއެވެ.

ކައުންސިލްތަކުން ފުލުހުންގެ އެހީތެރިކަމަށް އެދެންވާނީ، ރަށު ފެންވަރުގައި ޙައްލުކުރަން މަސައްކަތްކޮށް، ފުލުހުންގެ އެހީތެރިކަން ކޮންމެހެން ބޭނުންވާ ކަންކަމުގައި ކަމަށްވެސް ބަޔާންކޮށްފައިވެއެވެ.