ރިޝްވަތު އާންމުވެ އިންސާފު ގެއްލި، ހައްގުތަކުން މަހުރޫމުވެއްޖެ: ޚުތުބާ

ރިޝަވަތާއި ކޮރަޕްޝަން އާންމުވެ، އަދުލު އިންސާފު ގެއްލި، އެތައް ބަޔަކު ހައްގުތަކުން މަހުރޫމުވެ އެތައް ބަޔަކަށް ނުލިބެންވާ އެއްޗެހި ލިބެމުންދާކަމަށް ހުކުރު ޚުތުބާގައި ބުނެފިއެވެ.

"ރިޝަވަތަކީ ބޮޑުވެގެންވާ ފާފައެއް" މި މައުޟޫއަށް އިއްވި ހުކުރު ޚުތުބާގައި ވަނީ ރިޝްވަތުގެ ނުބައިކަމުގެ މައްޗަށް އަލިއަޅުވާލާފައެވެ. މިގޮތުން މުޅި ދުނިޔެއަށް ފެތުރިފައިވާ ނުރައްކާތެރި ބޮޑެތި ވަބާތަކުގެ ތެރެއިން ފިލުވައިލަން އެންމެ އުނދަގޫ އެއް ވަބާއަކީ ރިޝްވަތުގެ ވަބާ ކަމަށް ޚުތުބާގައި ބުނެފައިވެއެވެ.

އެތައް ގޮތަކުން ރިޝަވަތުގެ އަމަލުތައް ހިންގޭއިރު، ބައެއް މީހުން މި އަމަލުތައް ހިންގަނީ ސިއްރިއްޔާތުގައި ކަމަށް ޚުތުބާގައި ބުނެފައިވެއެވެ. އަނެއް ބަޔަކު ފުޅާ ދާއިރާއެއްގައި ފާޅުކަން ބޮޑުގޮތެއްގައި މިކަން ކުރަމުންދާކަމަށާއި، ފަހުގެ ދިރާސާތަކުން ދައްކާގޮތުގައި މިހާރު ރިޝްވަތާއި ކޮރަޕްޝަނަކީ މުޅި ދުނިޔޭގައިވެސް އާންމުވެފައިވާ ދެކަންތައް ކަމަށް ޚުތުބާގައި ބުނެފައިވެއެވެ.

އަހަރުމެންގެ މި ކުޑަކުޑަ މުޖުތަމައުވެސް މި ނުރައްކާތެރި ވަބާގައި ޖެހިފައިވާކަމަށާއި، މިއަދު މިފަދަ އަމަލުތައް ގިނަވެ މިއީ ވަރަށް އާދައިގެ ކަންކަމުގެ ގޮތުގައި މުޖުތަމައުގެ ބައެއް މީހުން ދެކެން ފަށާފައިވާކަމަށް ޚުތުބާގައި ބުނެފައިވެއެވެ. ގާނޫނުތަކާ ގަވާއިދުތަކާ ދިމާ އިދިކޮޅަށް ތިމާ ބޭނުންވާ ކަންކަން ހާސިލުކުރުމަށްޓަކައި ރިޝްވަތާއި ކޮރަޕްޝަން ހިންގާ ކަމުގެ ވާހަކަ ދެއްކުމަކީ މިހާރު ބޮޑު ކަމެއް ނޫން ކަމަށެވެ. މިފަދަ އަމަލުތަކަކީ ގައުމުގެ މުސްތަގުބަލާ އަންނަން އޮތް ޖީލުތަކުގެ ކުރިއެރުމާއި ތަރައްގީ ފުން ވަޅުގަނޑަކަށް ވެއްޓިދާނެ ކަމެއްކަމަށް ޚުތުބާގައި ވަނީ ބުނެފައެވެ.

ރިޝްވަތުގެ ތެރެއިން ލިިބޭ މަންފާއެއްގެ ސަބަބުން ވަގުތީ އުފަލެއް ލިބުނު ނަމަވެސް ރިޝްވަތު ދޭ މީހުންނާއި، ރިޝްވަތު ހިފާ މީހުންނާއި، ރިޝްވަތު ދިނުމުގައި މެދުވެރިއަކަށްވާ މީހުންނަށް ފަހުން ލިބޭ ގެއްލުމާއި، ހަލާކު މާ ބޮޑުކަން ވިސްނާލަންޖެހޭކަމަށް ޚުތުބާގައި ބުނެފައިވެއެވެ. ހަރާމް ގޮތްގޮތުން ފައިސާ ހޯދައިގެން އެތަކެތި އަނބިދަރިންނަށް ކާންދިނުމަކީ ދަރިން ބޮޑެތި ޖަރީމާތައް ހިންގުމަށް މަގުފަހިވާ ކަމެއް ކަމަށް ޚުތުބާގައި ބުނެފައިވެއެވެ. އެހެންކަމުން މިކަމުން ރައްކާތެރިވެ ތިބުމަށް ވަނީ ނަސޭހަތްތެރިވެފައެވެ.