އެމްއެމްޕީއާރުސީގެ ކޮރަޕްޝަނާއި ގުޅުން ހުރި މައްސަލައެއްގައި ދުންޔާ އޭސީސީއަށް ހާޒިރުކޮށްފި
އެމްއެމްޕީއާރުސީގެ ޚިޔާނާތުގައި ގިނަ އަދަދެއްގެ ފަޅުރަށްތަކަކާއި ފަޅުތަކެއް ވިއްކައިގެން ދައުލަތަށް ލިބެންޖެހޭ 1.23 ބިލިއަން ރުފިޔާއަށް ޚިޔާނާތްތެރިވެފައިވޭ
ދުންޔާ މައުމޫން
ރާއްޖޭގައި މިހާތަނަށް ހިންގާފައިވާ އެންމެ ބޮޑު ކޮރަޕްޝަންގެ މައްސަލަ ކަމަށްވާ އެމްއެމްޕީއާރުސީގެ ކޮރަޕްޝަނާއި ގުޅުން ހުރި މައްސަލައެއްގައި، ކުރީގެ ފޮރިން މިނިސްޓަރު ދުންޔާ މައުމޫން އެންޓި ކޮރަޕްޝަން ކޮމިޝަން، އޭސީސީއަށް ހާޒިރުކޮށްފިއެވެ.
އޭސީސީ އަށް ދުންޔާ ހާޒިރުކޮށްފައިވަނީ މިއަދު ހެނދުނު 11 ޖެހިއިރެވެ. އޭނާ އޭސީސީ އަށް ހާޒިރުކުރުމަކީ ފުރައްސާރަކުރުން ކަމަށް ސިފަކުރައްވާ އޭނާ ވަނީ އޭނާ އަށް ކުރާ ތުހުމަތުތައް ދޮގުކުރައްވާފައެވެ. ޓްވިޓަރގައި ހިއްސާކުރެއްވި މެސެޖެއްގައި ދުންޔާ ވަނީ އޭނާ އޭސީސީ އަށް ހާޒިރުކުރަނީ ސިޔާސީ ނުފޫޒު ބޭނުންކޮށްގެން ކަމަށް ވެސް ވިދާޅުވެފައެވެ. ދުންޔާ ވިދާޅުވީ އޭނާ ދައުލަތުގެ އެންމެ ރުފިޔާއެއްގައި ވެސް ޖެހިފައި ނުވާނެ ކަމަށެވެ.
ދުންޔާ އޭސީސީ އަށް ހާޒިރުކޮށްފައިވާއިރު މީގެ ކުރިންވެސް އެމްއެމްޕީއާރުސީއާ ގުޅުން ހުރި މައްސަލައެއްގެ ތަހުގީގަށް ދުންޔާ އޭސީސީ އަށް ހާޒިރުކުރަން އެންގިއެވެ. އޭރު ދުންޔާގެ ފަރާތުން އޭސީސީ އަށް ހާޒިރުވީ އޭނާގެ ޤާނޫނީ ވަކީލެވެ. ދުންޔާ އޭސީސީ އަށް ހާޒިރުކުރުމާ މެދު މައުލޫމާތު ސާފުކުރުމަށް ގުޅުމުން އޭސީސީ އިން ވަނީ މައްސަލަތަކުގައި މައުލޫމާތު ސާފުކުރަން ހާޒިރުކުރާ ފަރާތްތަކުގެ ތަފްސީލު އާއްމުނުކުރަން މިހާރު އެ ކޮމިޝަނުން ނިންމާފައިވާ ކަަމަށް ބުނެފައެވެ. އެހެންކަމުން މި މައްސަލައާ ގުޅޭ އިތުރު ތަފްސީލު އޭސީސީ މެދުވެރިކޮށް ވަނީ ލިބޭގޮތް ނުވެފައެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އެމްއެމްޕީއާރުސީގެ ޚިޔާނާތުގައި ގިނަ އަދަދެއްގެ ފަޅުރަށްތަކަކާއި ފަޅުތަކެއް ވިއްކައިގެން ދައުލަތަށް ލިބެންޖެހޭ 1.23 ބިލިއަން ރުފިޔާއަށް ޚިޔާނާތްތެރިވެފައިވާކަން މިހާތަނަށް އިދާރާތަކުން ހާމަކުރި ރިޕޯޓްތަކާއި ތަހުގީގުތަކުން އެނގެއެވެ. އެގޮތުން އެމްއެމްޕީއާރުސީގެ ޚިޔާނާތަކީ 1.23 ބިލިއަން ރުފިޔާގެ ޚިޔާނާތެއްކަމަށް އޮޑިޓް އޮފީހުން ނެރުނު ޚާއްސަ އޮޑިޓް ރިޕޯޓްގައި ވަނީ ބުނެފައެވެ. އެހެންނަމަވެސް އެމްއެމްޕީއާރުސީން ފަޅު ރަށްތަކާއި ފަޅުތައް ވިއްކާފައިވަނީ ނުއަގުގައިކަމަށް ވުމުން އެމްއެމްޕީއާރުސީގެ ޚިޔާނާތަކީ ހަތަރު ބިލިއަން ރުފިޔާގެ ބޮޑު ޚިޔާނާތެއްކަމަށް ރާއްޖޭގެ އިޤްތިޞާދު ދިރާސާކުރާ ފަރާތްތަކުން ބުނެއެވެ.
އެމްއެމްޕީއާރްސީ ޚިޔާނާތާ ގުޅިގެން މަޖިލީހުގެ ކޮމިޓީން އާންމު ކޮށްފައިވާ ލިސްޓުގައި 19 ވަނަ ރައްޔިތުންގެ މަޖިލީހުގައި ހިމެނިވަޑައިގަންނަވާ ޕީޕީއެމްގެ 6 މެންބަރުންގެ ނަން ވަނީ ހިމެނިފައެވެ. އޭގެ އިތުރުން، 19 ވަނަ ރައްޔިތުންގެ މަޖިލީހުން އެމްޑީޕީގެ 4 މެންބަރުންގެ ނަން ހިމެނިފައިވެއެވެ. އަދި ޕީއެންސީއާއި އެމްޑީއޭގެ އެއް މެންބަރުގެ ނަމާއި ޖޭޕީއާއި މިނިވަން ދެ މެންބަރުގެ ނަން ލިސްޓުގައި ހިމެނެއެވެ.
