ދަތިހާލުގައިވާ މުއުމިނަކަށް އެހީތެރިކަން ފޯރުކޮށްދީފި މީހާއަށް އިންތިހާ ދަރުމަވޭ: ޚުތުބާ

މުއުމިނަކަށް ދަތިހާލެއް ޖެހިފައިވަނިކޮށް އެކަމަކުން އެމީހަކު ދުރުކޮށް ސަލާމަތްކުރުމަށް މަސައްކަތްކޮށްދީ، އެހީތެރިވެއްޖެ މީހަކަށް ހުރި ދަރުމަ ބޮޑުކަމަށް ކީރިތި ރަސޫލާ ހަދީސްކުރައްވާފައިވާކަމަށް ހުކުރު ޚުތުބާގައި ބުނެފިއެވެ.

"އިސްލާމްދީނަކީ އެކުވެރިކަމުގެ ދީން" މި މައުޟޫއަށް އިއްވި ހުކުރު ޚުތުބާގައި މި ދީނަކީ އެއްބައިވަންތަކަށް ގޮވާލާދީންކަން ވަނީ ފާހަގަކޮށްފައެވެ. އެއްބަޔަކު އަނެއް ބަޔަކަށް އޯގާވެ، ދަތި އުނދަގޫ ކަމެއް ނުވަތަ ހިތާމައެއް ކުރިމަތިވެއްޖެނަމަ އެކަކު އަނެކަކަށް އެހީތެރިވުމަށް މި ދީނުގައި ގޮވާލާ ކަމަށެވެ. މި ދީނުގައި އެކަކު އަނެކެއްގެ ހައްގުތަކަށް ރައްކާތެރިވުމަށް އަމުރުކުރާކަމަށާއި، އެކަކު އަނެކެއްގެ މުދަލާއި، އަބުރަށް ރައްކާތެރިވުމަށް އަމުރުކުރާ ކަމަށް ޚުތުބާގައި ބުނެފައިވެއެވެ.

ދޭދޭ ގުޅުންތައް ބަދަހިކުރަން މި ދީނުގައި އަމުކުރާކަން ފާހަގަކޮށް ޚުތުބާގައި ބުނީ މުއުމިނަކަށް ދަތިހާލެއް ޖެހިފައި ވަނިކޮށް އެކަމަކުން އެމީހަކު ދުރުކޮށް ސަލާމަތްކޮށްދީ އެހީތެރިވެއްޖެ މީހަކަށް ހުރި ދަރުމައިގެ ބޮޑުކަން ކީރިތި ރަސޫލާ ބަޔާންކޮށްދެއްވާފައިވާކަމަށެވެ.

އިސްލާމީ އަހުވަންތަކަމަކީ ވަރަށް މަތިވެރި މާތް ލަނޑުދަނޑިތަކެއް ހިމެނޭ ކަމެއް ކަމަށް ޚުތުބާގައި ބުނެފައިވެއެވެ. މީގެ ތެރެއިން އެންމެ މުހިންމު ކަމަކީ އެއް މުސްލިމަކު އަނެއް މުސްލިމަކަށް ހެޔޮ ކަންކަމުގައި ވާގިވެރިވުން ކަމަށް ޚުތުބާގައި ބުނެފައިވެއެވެ. އަދި ފާފަކުރުމާއި، ނުބައި ކަންކަމުން އެއްކިބާވެ އިސްލާހުކުރުމަށް ބާރުއެޅުން ކަމުގައި ޚުތުބާގައި ފާހަގަކޮށްފައިވެއެވެ.

އިސްލާމީ އުޚުއްވަތްތެރިކަމާއި، އެކުވެރިކަމަކީ އޭގެ ސަބަބުން ތިމާ ބޭނުންޖެހިފައިވާ ހާލުގައިވެސް ތިމާގެ އަޚުންނާއި، އެކުވެރިންނަށް އިސްކަންދޭން ދަސްކޮށްދޭ ކަމެއް ކަމަށް ޚުތުބާގައި ބުނެފައިވެއެވެ. ތިމާގެ އެކުވެރި މުސްލިމު އަޚުންނަށްޓަކައި ހެޔޮ ދުއާކުރުމަކީ ނުހަނު މުހިއްމު ކަމެއް ކަމަށާއި، އޭގެ ފައިދާ ޚުދު ތިމާއަށްވެސް ލިބޭނެ ކަމަށް ލޮބުވެރި ނަބިއްޔާ ވަނީ އަންގަވާފައި ކަމަށް ޚުތުބާގައި ބުނެފައިވެއެވެ.