ފަރެސްމާތޮޑާގެ ބާޚިރާ ދޯނިން ދޮށީގެ މަސްވެެރިކަމުގެ އައު ރިކޯޑެއް

ގދ ފަރެސްމަތޮޑާ ބާޚިރާ ދޯނިން ގިނަ އަދަދެއްގެ މަސް ބާނައި ދޮށީގެ މަސްވެެރިކަމުގެ އައު ރިކޯޑެއް ޤާއިމުކޮށްފިއެވެ.

އެކަމާ ގުޅޭގޮތުން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ބުނީ، ގދ. ފަރެސްމާތޮޑާ އިން މަހަށް ނުކުތް ބާޚިރާ ދޯނިން 58.6 ޓަނުގެ މަސް ކޫއްޑޫއަށް ކިރުވައި، އެއްދުވަހެއްގެ ދޮށީގެ މަސްވެެރިކަމުގެ އައު ރިކޯޑެއް ހަދާފައިވާ ކަމަށެވެ.

އޭގެ އިތުރުން، މަސްކިރުވައި ބާޚިރާ ދޯނިން 996,034ރ ގެ އާމްދަނީއެއް ހޯދާފައިވާކަން ފާހަގަކޮށް މިފްކޯއިން ވަނީ ދޯނީގެ ފަޅުވެރިންނާއި ކެޔޮޅަށް މަރުހަބާ ކިޔާފައެވެ.

ބާޚިރާ ދޯންޏަކީ މަސްވެރިކަމުގައި ފާހަގަކޮށްލެވޭ ދޯންޏެކެވެ. އެގޮތުން މީގެ ކުރިންވެސް އެ ދޯނިން 47 ޓަނުގެ މަސް ކިރާފައިވާ ފަހަރެއްގައި ދޯނީގެ ކެޔޮޅު ވަނީ ރާއްޖެއެމްވީއަށް އިންޓަވިއު ދެއްވާފައެވެ. އެގޮތުން ރާއްޖެއެމްވީއަށް ދިން އިންޓަވިއުގައި ކެޔޮޅު ބުނީ، ދޯނިން މަސްވެރިކަން ކުރާތާ 2 އަހަރަށްވުރެ ގިނަ ދުވަސް ވެފައިވާ ކަމަށެވެ.

ފަރެސްމާތޮޑާގައި މަސްވެރިކަމުގެ ސިނާއަތުގައި އުޅޭ މީހުންގެ ތެރެއިން ޒުވާނުންގެ ނިސްބަތް ގިނަކަން ފާހަގަކޮށް ކެޔޮޅު ބުނީ، ބައެއް ކަހަލަ ގޮންޖެހުންތައް އަދިވެސް އެބަހުރި ކަމަށެވެ. އެގޮތުން މަސްވެރިންނަށް އައިސް ލިބުމުގައި ހުރި ދަތިތައް އޭނާ ވަނީ ފާހަގަކޮށްފައެވެ.