ތަސައްވުރަކީ ޕެންޝަން ފަންޑަށް ބޮޑު އަދަދަކުން އެމީހަކު އަމިއްލައަށް ބޭނުންވެގެން ފައިސާ ޖަމާކުރުން ކަމަށް, ޕެންޝަން އޮފީހުގެ ޗީފް އެގްޒެކެޓިވް އޮފިސަރ ސުޖާތާ ހަލީމް ވިދާޅުވެއްޖެއެވެ.
ސުޖާތާ މިފަދައިން ވިދާޅުވީ ޕެންޝަން އޮފީހުގެ ސީއީއޯގެ މަގާމާ ހަވާލުވެވަޑައިގެން ރާއްޖެޓީވީއަށް ދެއްވި އެކްސްކްލޫސިވް އިންޓަރވިއުއެއްގައެވެ.
ސުޖާތާ ވިދާޅުވީ ޕެޝަން އޮފީހުގެ އަމާޒަކީ ދެމެހެއްޓެނިވި، މީހުން ބަލައިގަންނަ ކަހަލަ ސްކީމަކަށް ޕެޝަން ސްކީމް ހެދުން ކަމަށެވެ.
ޕެންޝަން ފަންޑަށް ޖަމާކުރާ ފައިސާއަކީ މުސާރައިން ކެނޑޭ އެއްޗެއް ނޫންކަން ފާހަގަކުރައްވައި ސުޖާތާ ވިދާޅުވީ، އެމީހަކު އަމިއްލައަށް ޖަމާކުރާ 7 އިންސައްތައަށް، ވަޒީފާ ދޭ ފަރާތުން އެ މިންވަރު ޖަމާކުރާކަމަށެވެ.
ސުޖާތާ ވިދާޅުވީ، ޕެޝަން އޮފީހުން ރަނގަޅަށް މަސައްކަތްކުރަމުންދާކަމަށެވެ. ޕެންޝަން ފައިސާގެގޮތުގައި މިހާރު ކޮންމެ މަހަކު 122 މިލިއަން ރުފިޔާ ޖަމާކުރާކަމަށްވެސް ވިދާޅުވިއެވެ.
ސުޖާތާ ވިދާޅުވީ ޕެންޝަން ފަންޑަށް ޖަމާކުރާ ފައިސާ، އަހަރަކަށްވުރެ އަހަރެއް އިތުރުވަމުންދާކަމަށެވެ، އެގޮތުން މިހާރު ކޮންމެ މަހަކު 122 މިލިއަން ރުފިޔާ ޕެންޝަން ފަންޑަށް ޖަމާވާކަމަށާއި، 2021 ވަނަ އަހަރަށް ބަލާނަމަ، މަހެއްގެ މައްޗަށް ޕެންޝަން ފަންޑަށް ޖަމާކޮށްފައިވަނީ 105 މިލިއަން ރުފިޔާކަމަށް ސުޖާތާ ވިދާޅުވިއެވެ. މިއީ ކުރިއެރުމެއްގެ ގޮތުގައި އޭނާ ފާހަގަކުރެއްވިއެވެ.
ސުޖާތާ ވިދާޅުވީ ޕެންޝަން ފަންޑަށް ޖަމާކުރާ ފައިސާއަކީ ރައްކާތެރިކަމާއެކު ރައްކާކުރެވިފައި ހުންނާނެ ފައިސާކަމަށާއި، މިއީ ކިހާ މުހިންމު ކަމެއްކަން ރައްޔިތުންނަށް އެނގުން މުހިންމުކަމަށެވެ.
ޕެންޝަން ޚިދުމަތް އިތުރަށް ހަރުދަނާކުރުމަށް ކުރަމުންދާ މަސައްކަތުގެ ތެރެއިން ކުރިއަށްއޮތް 3 އަހަރަށް ގިނަ ކަންތައްތަކެއް ކުރަން އެކުލަވާލާފައިވާކަމަށް ސުޖާތާ ވިދާޅުވިއެވެ. މިގޮތުން އެންމެންނަށް ބޭނުންވާ ކަންތައްތަކަށް އެޓެންޑުކުރެވޭފަދަ ސްކީމްތަކެއް އެކުލަވާލުމަށް މަސައްކަތްތަކެއް ކުރަން ހިމަނާފައިވާކަމަށް ސުޖާތާ ވިދާޅުވިއެވެ. އެއީ ދިގު މުއްދަތަކަށް ކުރާ އިންވެސްޓްމެންޓުތަކަކަށް ވުން މުހިންމު ކަމަށާއި، އެހެންކަމުން މިކަމަށް ވަރަށް ބޮޑަށް ފޯކަސް ކުރައްވާނެ ކަމަށް އޭނާ ވިދާޅުވިއެވެ.
