119 ކިލޯ ޑްރަގް: ސެކްޝަންގެ ގާޒީއެއް ނެތި 4 މަސް، 3 މީހުން ޝަރުތުތަކާއެކު ބަންދުން ދޫކޮށްލައިފި

މާލެއާއި ހުޅުމާލޭގައި ފުލުހުން ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގައި ހިމެނޭ މީހުން ޝަރުތުތަކާއެކު ބަންދުން ދޫކޮށްލައިފިއެވެ.

މިއީ މިހާރުވެސް ތަޙުޤީޤު ކުރިއަށްދާ ބޮޑު މައްސަލައެކެވެ.

Advertisement

ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.

ކްރިމިނަލް ކޯޓުގައި މި މައްސަލަ ބައްލަވަމުން ގެންދެވީ ގާޒީ ދީބާނާޒް ފަހުމީއެވެ. އެހެންނަމަވެސް، އޮގަސްޓު މަހުގެ 9 ވަނަ ދުވަހުން ފެށިގެން ގާޒީ ދީބާނާޒް ހައިކޯޓަށް ބަދަލު ކުރެއްވުމާއެކު އެ ސެކްޝަނުގެ މައްސަލަަތައް ބަލަމުން ގެންދަނީ އެކިއެކި ސެކްޝަންތަކުގެ ގާޒީންނަށް ބަހާލައިގެންނެވެ. އެގޮތުގެ މަތިން މައްސަލަތައް ކުރިއަށް ގެންދާއިރު އަޑުއެހުންތައް ތާވަލު ނުކުރެވިވެސް ގިނަ ދުވަސް ވޭތުވެގެންދާން ޖެހެއެވެ.

މި މައްސަލަވެސް ގިނަ ދުވަސްތަކަކަށްފަހު ތާވަލުކޮށްފައިވާއިރު، މައްސަލަ ކުރިއަށް ގެންދިޔައީ ދައުވާލިބޭ ފަރާތްތަކުގެ ބަންދު މުރާޖައާކުރަން ދައުލަތުން އެދިފައިވާތީއެވެ. ބަންދު މުރާޖައާ ކުރިއަށް ގެންދެވީ އެހެން ސެކްޝަނެއްގެ ގާޒީއެކެވެ.

ބަންދު މުރާޖައާ އަޑުއެހުމުގައި އެ ކޯޓުގެ ގާޒީ މުޙައްމަދު މިސްބާހު ވިދާޅުވީ، މި މައްސަލަ އެކަށީގެންވާ އަވަސް މިނެއްގައި ކުރިއަށް ގެންދިއުމުގައި ގޮންޖެހުންތައް ހުރި ކަމަށާއި، މައްސަލަ ބެލުމަށް ދާއިމީ ގާޒީއެއް ނެތް ކަމަށެވެ. ހަމައެއާއެކު، މައްސަލައިގެ ހެއްކާއި، ހެކިތަކުން ދައުވާ ސާބިތު ކުރުމަށް ހުރި ފުރުސަތުތައް ފަދަ ކަންކަމަށް ރިއާޔަތްކުރާއިރު، އެމީހުން ބަންދުން ދޫކޮށްލަން ފެނިވަޑައިގަންނަވާކަމަށް ގާޒީ ވިދާޅުވިއެވެ.

ވުމާއެކު، ގާޒީ މިސްބާހު ވަނީ އެ 3 މީހުންވެސް ޝަރުތުތަކާއެކު ބަންދުން ދޫކޮށްލާފައެވެ.

ކްރިމިނަލް ކޯޓުގެ ގާޒީކަމުގެ މަޤާމު ހުސްވެފައިވާތާ 4 މަހަށްވުރެ ގިނަދުވަސްވެފައިވާއިރު، އަދިވެސް ޖޭއެސްސީން އެ މަޤާމަށް ގާޒީއަކު ހޮވާފައެއް ނުވެއެވެ.