ކުރިއެރުންތަކާއެކު ޖަޕާން ޓީމުގެ އުންމީދުތައް ހުރީ އުހުގައި

ޤަތަރު ވޯލްޑްކަޕަށް ޖަޕާން ނުކުންނައިރު ޖަޕާނުން ވަނީ ގިނަ ކުރިއެރުންތަކެއް ހޯދާފައެވެ. 1993 ވަނަ އަހަރު ޖޭ ލީގު އުފަންކޮށް އެ ގައުމުން ހޯދި ކުރިއެރުންތަކާއެކު، ބައެއް މީހުންގެ ނަޒަރުގައި ޖަޕާނަކީ ވޯލްޑް ކަޕް އުފުލާލެވޭނެ ފަދަ ގައުމަކަށްވެއްޖެއެވެ.

ފާއިތުވެދިޔަ 19 އަހަރުގެ ތެރޭގައި ޖަޕާނުން ވަނީ ޖޭލީގު ވަރުގަދަކޮށް މޮޅު ކުޅުންތެރިންތަކެއް އުފައްދާފައެވެ. މި ގޮތުން އެންމެ ފާހަގަ ކުރެވެނީ މި ފަހަރުގެ 26 ކުޅުންތެރިންގެ ސްކޮޑުގައި ޖަޕާނުން ބޭރުގެ ލީގުތަކުގައި ކުޅޭ ކުޅުންތެރިން އަދަދު ގިނަކަމެވެ. 2002 ވަނަ އަހަރު އަމިއްލަ ގައުމުގައި ޖަޕާން ވޯލްޑް ކަޕުގައި ކުޅުނުއިރު ގައުމުން ބޭރުގައި ކުޅެނީ އެންމެ ހަ ކުޅުންތެރިންނެވެ. ނަމަވެސް މިއަދު އެ އަދަދު ވަނީ 19 އަށް އިތުރުވެފައެވެ. މިކަން މި މަގުން ކުރެވުމުގައި ޖަޕާނުގެ ލީގަށް ކޯޗުންގެ ގޮތުގައި ގެނައި ކުރީގެ މަޝްހޫރު ކުޅުންތެރިންގެ ދައުރު ވަރަށް ބޮޑެވެ. މި ގޮތުން އިޓަލީގެ ކޯޗު އަލްބާޓޯ ޒަކަރޯނީ ޖަޕާނަށް ގޮސް ކުޅުންތެރިންނަށް ދިން އިރުޝާދަކީ މޮޅު ބަޔަކަށްވާން ބޭނުންނަމަ ޔޫރަޕަށް ދިއުމަށެވެ.

މި އިރުޝާދު ގަބޫލުކޮށް ޖަޕާނުގެ ކުޅުންތެރިން ކުރި މަސައްކަތުން މިއަދު މަޝްހޫރު ލީގުތަކުގައި ލީޑުކުރާ ޖަޕާނުގެ ކުޅުންތެރިން މަދެއް ނޫނެވެ. އަދި ބިދޭސީންގެ އެހީގައި ޖޭ ލީގު ވަރުގަދަކޮށް، އެލީގު ބަލަން އެވްރެޖެކޮށް 20،000 މީހުން މެޗަކަށް ވަންނައިރު ގައުމުގައި ވަނީ ނުހަނު ރަނގަޅަށް ފުޓްބޯޅަ ފޯރި ހިއްޕާލެވިފައެވެ. ޓީވީ ރައިޓްސްގެ ގޮތުގައި ޖޭލީގަށް ދެ ބިލިއަން ޑޮލަރު ލިބެއެވެ. މިހުރިހާ ސަބަބުތަކާހުރެ ޖަޕާން ޓީމަކީ މިހާރު ސަމާސާ ޓީމެއް ނޫނެވެ.

ނަމަވެސް، ޖަރުމަނާ ދެކޮޅަށް ޖަޕާނުން ނުކުންނައިރު ކެޕްޓަން މާޔާ ޔޮޝީދާ ޓީމުގެ ކުޅުންތެރިންނަށް ވިސްނައިދެނީ ޖަރުމަނުގެ ފުޓްބޯޅައިގެ މާޒީއާއި، އެމީހުންގެ ނުގުޑާ ފަދަ އަޒުމާ ދެކޮޅަށް ހަނގުރާމަކުރުމަށެވެ. ޔޮޝީދާ އާއި ޖަރުމަނުގެ ކޯޗު މޮރިޔާސޫ ގަބޫލުކުރާ ގޮތުގައި ޖަރުމަނުގެ ގޯލު ފޫއަޅުވަން މާގިނަ ފުރުސަތުތަކެއް ނުލިބޭނެއެވެ. މިހެންވެ މެޗުގެ ކޮންމެ ވަގުތެއްގައި ލިބިދާނެ ފުރުސަތަކަށް އެދިގެން ކެތްތެރިކަމާއެކު ތިބުމަކީ މި މެޗުގައި ޖަޕާނުން ކުރަންޖެހޭ އެންމެ މުހިންމު މަސައްކަތެވެ. ޚާއްސަކޮށް ޖަޕާން ޓީމުގައި މޮޅު ފޯވަޑެއް ނެތުމުން މެޗުގައި ވަރަށް ފަރުވާތެރިވެގެން 11 ކުޅުންތެރިން ތިބެގެން ނޫނީ، މޮޅު ނުވެވޭނެކަން ކޯޗު ހުރީ ގަބޫލުކޮށްގެންނެވެ.

މި ފަހަރުގެ ވޯލްޑް ކަޕަކީ ޖަޕާނުގެ ހަތް ވަނަ ވޯލްޑް ކަޕެވެ. މީގެ ތެރެއިން ތިން ފަހަރު ކުއާޓާ ފައިނަލަށް ދެވިފައިވާތީވެ މޮރިޔާސޫ އާއި އޭނާގެ ކުޅުންތެރިންގެ ވިސްނުމަކީ ކުއާޓާ ފައިނަލަށް ގޮސްފައި ނޫނީ އެނބުރި ރަށަށް ނުދިއުމެވެ. މިކަމަށް ޓަކައި ޖަޕާނުން މައިގަނޑު ގޮތެއްގައި ބޭނުންކުރާނެ ފޯމޭޝަނަކީ 4-2-3-1 އެވެ. ދެ ހޯލްޑިން މިޑްފީލްޑަރުންނާއި ކުރީގައި އެންމެ ފޯވަޑަކު ހުރެގެން ކުޅެން އެމީހުން ބޭނުންވާއިރު، ދެ ވިންގުން ކުޅޭ ހަލުވި ކުޅުންތެރިންގެ ބޭނުންހިފާނެއެވެ. ފަހަތް ޕެކްކޮށް ބާއްވާއިރު ބައެއް ފަހަރު އެޓޭކްގައި ޑިފެންޑަރުން ބައިވެރިވާނެއެވެ. މިހެންވެ ޖަޕާނަކީ ކައުންޓައެޓޭކްގައި ވަރަށް ނުރައްކާތެރި ޓީމެއްކަން އިދިކޮޅު ޓީމުތަކުން ވެސް ދަނީ ފާހަގަކުރަމުންނެވެ.

އަނެއްކޮޅުން މިއެތުރުމަކީ ޖަޕާނުން ގަބޫލުކުރާ ގޮތުގައި ސްޕޭނާއި ޖަރުމަނު އޮބަހައްޓަން އެންމެ މޮޅު ގޮތްވެސްމެއެވެ.