32 ޓީމު ބައިވެރިވާ ވޯލްޑްކަޕް ފުޓުބޯޅަ މުބާރާތް، ސޫރިޔާގެ ރެފިއުޖީ ކޭމްޕުގައި!
22 ނޮވެމްބަރު 2022 | އަންގާރަ 13:44ސޫރިޔާގެ ރެފިއުޖީންނަށް، ހިތްގައިމު މާހައުލެއްގައި ފީފާ ވޯލްޑްކަޕް 2022 ގެ މެޗުތައް ބަލާލެވޭނެ އިންތިޒާމުވެސް ވަނީ ހަމަޖައްސާފައި
ސޫރިޔާގެ "ވޯލްޑްކަޕް" ފުޓުބޯޅަ މުބާރާތް އިންތިޒާމް ކުރީ، އިންސާނީ ޙައްޤުތަކަށް ވަކާލާތު ކުރާ 'ވައޮލެޓް' ޖަމިއްޔާއިން
ނޮވެމްބަރު 20 ވަނަ ދުވަހުގެ ރޭ ޤަޠަރުގައި ފެށި ފީފާ ވޯލްޑްކަޕް ފުޓުބޯޅަ މުބާރާތުގެ ފޯރި ނުފެތުރޭ ހަމަ އެންމެ މަންޒިލެއްވެސް ނެތޭ ދެންނެވިދާނެއެވެ. އެފަދަ އެއް ތަނަކީ ސޫރިޔާގެ އިދްލީބުގައި ޤައިމު ކޮށްފައިވާ ރެފިއުޖީ ކޭމްޕުތަކެވެ. ކޭމްޕުތަކުގައި ދިރިއުޅޭ ގިނަ ކުޑަކުދިން މިހާރު އެންމެ ފޯރިއާއެކު ކުޅެމުންދަނީ، އެ ކުދިންގެ އަމިއްލަ "ވޯލްޑްކަޕް"އެކެވެ.
ސޫރިޔާގެ ރެފިއުޖީންގެ މެދުގައި ކުރިއަށް ގެންދާ "ވޯލްޑްކަޕް" މުބާރާތްވެސް ފެށީ ކުލަގަދަ އިހުތިފާލަކުންނެވެ. ފުރަތަމަ ކުޅުނީ "އެކުއެޑޯ"އާއި "ޤަތަރު"ގެ މެޗެވެ. ޓީމުތަކަށް ކުޅެމުން ދިޔައީ މުޅިންވެސް ސޫރިޔާގެ ކުދިންނެވެ. އެ މެޗު ނިމިގެން ދިޔައީ އަސްލު މެޗާއި ޚިލާފަށް، 1 ސުމަކުން ޤަތަރަކަށް ކުރި ލިބިގެންނެވެ.
ސޫރިޔާގެ "ވޯލްޑްކަޕް" ފުޓުބޯޅަ މުބާރާތް އިންތިޒާމް ކުރީ، އިންސާނީ ޙައްޤުތަކަށް ވަކާލާތު ކުރާ 'ވައޮލެޓް' ޖަމިއްޔާއިންނެވެ. ސޫރިޔާގެ އެކި ހިސާބުތަކުގައި ޤާއިމުކޮށްފައިވާ ރެފިއުޖީ ކޭމްޕުތަކުން ކުދިން އެއްކޮށްގެން، 6 މަސްދުވަހުގެ ތަމްރީން ޕްރޮގްރާމެއްވެސް އެ ޖަމިއްޔާއިން ވަނީ ހިންގާދީފައެވެ.
ޙަޤީޤީ ވޯލްޑްކަޕްގައި ކުޅެމުންދާ ޤައުމުތައް ރަމްޒުވާ ގޮތަށް 32 ޓީމު ވަނީ އެކުލަވާލާފައެވެ. ސޫރިޔާގެ "ވޯލްޑްކަޕް"ގައި ތޫނިސް ތަމްސީލު ކުރާ ހީޝް ރެފިއުޖީ ކޭމްޕްގައި ކުދިން ތަމްރީނު ކުރުމުގެ މަސައްކަތުގައި އުޅޭ މުޙައްނަދު ހަމެއިދީ ވަނީ އެ މުބާރާތުގެ މަޤްޞަދު ކިޔައިދީފައެވެ.
ޖިސްމާނީ ގޮތުން ހެލިފެލިވެ އުޅޭނެ ފުރުޞަތުގެ ތެރެއިން، އުފާވެރި ވަގުތުކޮޅެއް ހޭދަކޮށްލާނެ ފުރުޞަތު ހޯދާ ދިނުމުގެ އިތުރުން، ސޫރިޔާގެ ރެފިއުޖީންނަށް، ހިތްގައިމު މާހައުލެއްގައި ފީފާ ވޯލްޑްކަޕް 2022 ގެ މެޗުތައް ބަލާލެވޭނެ އިންތިޒާމުވެސް ވަނީ ހަމަޖައްސާފައެވެ. ޓެންޓުތަކުގެ މެދުގައި ޖަހާފައި ވާ ބޮޑު ސްކްރީނުން އެންމެންގެ މޫނުތަކަށް އުޖާލާކަން ވަނީ ގެނެސްދީފައެވެ.
މި ދުވަސްވަރަކީ ސޫރިޔާއަށް އިންތިހާއަށް ފިނިގަދަ ދުވަސްވަރަކަށް ވީ ނަމަވެސް، ފީފާ ވޯލްޑްކަޕްގެ މެޗުތައް ނިމެންދެން، ބޮޑު ސްކްރީންގައި މެޗުތައް އަޅުވަމުން ދާނެ ކަމަށް މައުލޫމާތު ލިބެއެވެ.
