900 ހިޔާ ފްލެޓު ބޮޑު އަގުގައި ކުއްޔަށް!

ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ ހިޔާ ފްލެޓުތަކުގެ 900 ފްލެޓު، ސަރުކާރުން ދޫކޮށްފައިވާ އަގަށްވުރެ ބޮޑު އަގުގައި ކުއްޔަށް ދީފައިވާ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ، އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

މިނިސްޓަރު އަސްލަމް މިފަދައިން ވިދާޅުވީ ރައްޔިތުންގެ މަޖިލީހުގެ ޤައުމީ ތަރައްގީއާއި ތަރިކައިގެ ކޮމިޓީގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. އެގޮތުން، ފްލެޓުތައް ދިނުމުގައި މައްސަލަތައް އެބަހުރި ކަމަށާއި ލިބެން ނުޖެހޭ މީހުންނަށް ވެސް ފްލެޓް ލިބިފައިވާކަމަށް އަސްލަމް ވިދާޅުވިއެވެ. އެގޮތުން، ފްލެޓުތަކަށް އެދި ހުށަހެޅުމުގެ އުސޫލުގައި ހުރި މައްސަލަތަކެއްގެ ސަބަބުން މާލޭގައި ދިރިނޫޅޭ މީހުންނަށް ވެސް އެކި ކެޓަގަރީތަކުން ފްލެޓުތައް ލިބިފައިވާ ކަން އޭނާ ފާހަގަކުރެއްވިއެވެ.

އަސްލަމް ވިދާޅުވި ގޮތުގައި ފްލެޓު ދިނުމުގެ އުސޫލު ކަނޑައަޅާފައި އޮތް ގޮތުން، 18 އަހަރާ 40 އަހަރާ ދެމެދުގެ އުމުރުފުރާގެ މީހުންނާއި ސިވިލް ސާވިސް މުވައްޒަފުންނާއި ނަރުހުންނާއި ޑޮކްޓަރުންގެ ކެޓަގަރީތަކުން ފްލެޓު ދިނުމުގައި އެ ފަރާތްތަކަކީ މާލޭގައި އުޅޭ ބައެއްތޯ ބެލުމެއް ނެތް ކަމަށެވެ. މިގޮތުން ބެލި ބެލުމުން ހިޔާ ފްލެޓުތަކުގައި މާލެއަށް ނިސްބަތްނުވާ 25 އިންސައްތަ މީހުން ދިރިއުޅެމުން އަންނަކަމަށް އޭނާ ވިދާޅުވިއެވެ.

ބޯހިމެނުމުގެ ޕްރިލިމިނަރީ ޑޭޓާއިން ދައްކާ ގޮތުގައި ސަރުކާރުން ފްލެޓުތައް ދޫކުރާ އަގަށްވުރެ ބޮޑުކޮށް 900 ފެލްޓު މިހާރުވެސް ދޫކޮށްފައިވާ ކަމަށް އެނގޭކަމަށް ވެސް އަސްލަމް ވިދާޅުވިއެވެ. އަދި 40 އިންސައްތަ މީހުން ކުލި ނުދައްކާއިރު ދެމެހެއްޓެނިވި ގޮތެއްގައި ހިޔާ ފްލެޓުގެ ކަންކަން ކުރިއަށްނުގެންދެވޭނެ ކަމަށް ވެސް އޭނާ ވިދާޅުވިއެވެ.

މިއީ ސިސްޓަމުގެ ތެރެއިން ސިސްޓަމާ ކުޅެން އެނގޭ މީހުން ކޮށްފައިވާކަންކަން ފާހަގަކުރައްވައި މިނިސްޓަރު ވިދާޅުވީ މި މައްސަލަތައް ހުރި ނަމަވެސް މިހާރު ނިޒާމު އޮތް ގޮތުން މިއިން އެއްވެސް ފަރާތަކާމެދު ފިޔަވަޅު އެޅެން ނެތްކަމަށެވެ.

ހިޔާ ފްލެޓްތަކަކީ ރާއްޖެއާ ނުގުޅޭ ގޮތަށް މާ އަގު ބޮޑުކޮށް ހިންގާފައިވާ މަޝްރޫއެއް ކަމަށް ވާރލްޑް ބޭންކުން ވެސް ވަނީ ބުނެފައެވެ. އެ ބޭންކުގެ ރިޕޯޓުތައް ދައްކާ ގޮތުގައި މި އަހަރުގެ އޭޕްރިލް މަހާ ހަމައަށް ހިޔާ ފްލެޓުގައި 6،338 އާއިލާ ދިރިއުޅެން ފަށާފައިވާއިރު އޭގެ ތެރެއިން 2،345 ތަނުން ކުލި ނުދައްކައެވެ. އެ ފްލެޓްތަކުގައި ދިރިއުޅޭ މީހުންނަށް ކުލި ދައްކަން އިތުރު ފުރުސަތު ދިނަސް އެކަމުގައި އެއްވެސް ކުރިއެރުމެއް ނުލިބޭކަން ފާހަގަކޮށް ވާރލްޑް ބޭންކުން ބުނީ އެ މީހުން އަތުން ފްލެޓް އަތުލުމުގެ ބާރު އެޗްޑީސީއަށް އޮންނަ ކަމަށެވެ. ނަމަވެސް އެއްވެސް ބައެއްގެ އަތުން ފްލެޓެއް އަތުލަން މަސައްކަތް ކޮށްފައިނުވާ ކަމަށެވެ.

ހިޔާގެ ގިނަ ބަޔަކު ކުލި ނުދައްކަނީ ކުލީގެ ގޮތުގައި ސަރުކާރުން ކަނޑައަޅާފައިވާ އަގު މާބޮޑު ކަމަށް ބުނެއެވެ. ކުލި ކުޑަކުރުމަށް އެދި ބައެއް ފަރާތްތަކުން މުޒާހަރާ ވެސް ކުރިއެވެ. ސަރުކާރުން ހިޔާ ފްލެޓުތަކުން ކުލީގެ ގޮތުގައި މެއިންޓަނަންސް ހަރަދާއެކު ނަގަނީ މަހަކު 8500 ރުފިޔާއެވެ.

ކުލީގެ ގޮތުގައި 8500 ރުފިޔާ އަގުބޮޑުކަމަށް ބުނަމުން އަންނައިރު، އެކި ޕްލެޓްފޯމުތަކުގައި ހިޔާ ޓަވަރުތަކުން ފްލެޓާއި ކޮޓަރި ކުއްޔަށް ދޫކުރަން ދަނީ އިޝްތިހާރު ކުރަމުންނެވެ. މި އިޝްތިހާރުތަކުގައި ހުންނަ އަގުތަކަށް ބަލާއިރު ދެ ކޮޓަރީގެ ތެރެއިން އެންމެ ކޮޓަރިއެއް ވެސް ކުއްޔަށް ދޫކުރަނީ 8000 ރުފިޔާއަށްވުރެ ބޮޑު އަގުގައެވެ.