މަޖިލީހުގެ ރިޔާސަތާމެދު މެމްބަރުންގެ ހުރި ކަންބޮޑުުވުންތަކާ ގުޅިގެން، ރައީސުލްޖުމްހޫރިއްޔާއެކު އިތުރު ބައްދަލުވުމެއް މިރޭ

ރައްޔިތުންގެ މަޖިލީހުގެ ރިޔާސަތާމެދު މެމްބަރުންގެ ހުރި ކަންބޮޑުުވުންތަކާއި ގުޅިގެން ރައީސް އިބްރާހީމް މުހައްމަދު ސާލިހާއެކު އިތުރު ބައްދަލުވުމެއް މިރޭ ބާއްވަން ހަމަޖެހިފައިވާ ކަމަށް މެމްބަރުން ވިދާޅުވެއްޖެއެވެ.

މަޖިލީހުގެ ރިޔާސަތާމެދު މެމްބަރުންގެ ހުރި ކަންބޮޑުުވުންތަކާ ގުޅިގެން އަންގާރަ ދުވަހު މަޖިލީހުގެ 40 މެމްބަރުން ވަނީ ރައީސް ސާލިހާ ބައްދަލުކުރައްވަން މުލިއާގެއަށް ވަޑައިގަންނަވާފައެވެ. އޭގެ ތެރޭގައި ހިމެނިވަޑައިގަންނަވަނީ އެމްޑީޕީގެ 39 މެމްބަރުންނާއި ޖުމްހޫރީ ޕާޓީގެ މެމްބަރެކެވެ.

އެ ބައްދަލުކުރެއްވުމަށްފަހު ނޫސްވެރިންނަށް މައުލޫމާތުދެއްވަމުން އައްޑޫ މަރަދޫ ދާއިރާގެ މެމްބަރު އިބްރާހީމް ޝަރީފް ވިދާޅުވީ، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތް ކަމަށް ވޯޓު ނަގާ ވަރަށް މެމްބަރުންގެ ތާއީދު އެބައޮތް ކަމަށެވެ. އެކަން އެގޮތަށް ކުރުމަށް މެމްބަރުން ހުށަހެޅުމުން ރައީސް ސާލިހު އެ ނިންމެވުމަށް ތާއީދު ނުކުރައްވާކަން ހާމަކުރައްވާފައިވާކަމަށް ޝަރީފް ވިދާޅުވިއެވެ. މެމްބަރުންނަށް މަލާމާތްކުރައްވައި، ޖެއްސުންކުރެއްވުމުގެ އަމަލުތައް ރައީސް ނަޝީދު ކުރައްވަމުން ގެންދަވާކަމަށާއި އެ ކަންބޮޑުވުން ރައީސުލްޖުމްހޫރިއްޔާއާ ހިއްސާކުރައްވާފައިވާކަމަށް ޝަރީފް ވިދާޅުވިއެވެ.

އަންގާރަ ދުވަހުގެ ޖަލްސާގައިވެސް މެންބަރުން ވަނީ ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލަށް ވޯޓަށް ނާހައިގެން ނުރުހުން ފާޅުކުރައްވައި އަޑު އުފުއްލަވާފައެވެ. ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި، މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލު މުޅި މަޖިލީހުގެ ކޮމިޓީން ދިރާސާކޮށް ނިންމިގޮތުގެ ރިޕޯޓު މަޖިލީހުގެ ތަޅުމަށް ހުށަހަޅާފައިވެއެވެ. އަދި ރިޕޯޓަށް ބަހުސް ކުރަން މެންބަރަކު އެދިފައި ނެތުމުން، ރިޔާސަތުން ވަނީ، ބިލަށް ވޯޓަށް އަހާވަރަށް މެންބަރުން ތަޅުމުގައި ނެތްކަމަށް ވިދާޅުވެ ކުއްލި ގޮތަކަށް ޖަލްސާ މެދުކަނޑާލައްވާފައެވެ.

އަންގާރަ ދުވަހު މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވަނީ ހޯމަ ދުވަހުގެ ޖަލްސާ ނިންމަވާލެއްވި ގޮތް ދިފާއުކުރައްވާފައެވެ. މެމްބަރުން ދަނީ އެގޮތަށް އަމަލުކުރައްވަމުން ގެންދަވަނީ އިދިކޮޅު ޕީޕީއެމްއާ ގުޅިވަޑައިގެން ކަމަށް ތުހުމަތުކުރަމުންނެވެ.