ރެއާލުން ކްރޫސް އަށް އެއް އަހަރު ދުވަހުގެ އެއްބަސްވުމެއް ހުށަހަޅަނީ

ރެއާލް މެޑްރިޑަށް ކުޅެމުން އަންނަ ޖަރުމަނުގެ މިޑްފީލްޑަރު ޓޯނީ ކްރޫސް އަށް އެއް އަހަރު ދުވަހުގެ އެެއްބަސްވުމެއް ހުށަހަޅަން އެ ކުލަބުން ތައްޔާރުވެއްޖެ ކަމަށް މީޑިއާ ރިޕޯޓުތައް ބުނެފިއެވެ.

ރެއާލާ އެކު ކްރޫސް ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުއެވެ. އެންމެ ފަހުން ކްރޫސް އޭނާގެ އެއްބަސްވުން އައު ކުރީ 2019 ވަނަ އަހަރުއެވެ. ދާދި ފަހުން ކްރޫސް ބުނީ އޭނާ ފުޓުބޯޅައިން ރިޓަޔާވާން ބޭނުންވަނީ ރެއާލްގައި ހުރެ ކަމަށެވެ.

ރިޕޯޓުތައް ބުނާ ގޮތުން ކުޅުން ހުއްޓާލުމުގެ ވިސްނުން ކްރޫސް ނުގެންގުޅޭ ނަމަ، އެއްބަސްވުން އައު ކުރުމަށް ރެއާލުން ބޭނުންވެއެވެ. އަދި ކްރޫސް އަށް އިތުރު އެއް އަހަރު ދުވަހު ކުލަބުގައި މަޑުކުރުމަށް އެއްބަސްވުމެއް ދިނުމަށް ރެއާލުން މިހާރު އޮތީ ތައްޔާރަށް ކަމަށް ވެސް ރިޕޯޓުތައް ބުނެއެވެ. ނަމަވެސް އެކަމުގައި ކްރޫސް ގޮތެއް ނިންމާނީ އަންނަ އަހަރުގެ ކުރީކޮޅު ކަމަށް ބެލެވޭ ކަމަށް ރިޕޯޓުތައް ބުނެއެވެ. ކްރޫސް އާ ގުޅޭ ގޮތުން ރެއާލްގެ ކޯޗު ކާލޯ އަންޗެލޮޓީ ދާދި ފަހުން ބުނީ އޭނާ ކުލަބުގައި މަޑުކުރަން އެދޭ ކަމަށެވެ.

ޖަރުމަނުގެ ބަޔާން މިއުނިކް ދޫކޮށް ކްރޫސް ރެއާލަށް ބަދަލުވީ 2014 ވަނަ އަހަރުއެވެ. އުމުރުން މިހާރު 32 އަހަރުވެފައިވާ ކްރޫސް ވަނީ މިހާތަނަށް ރެއާލަށް 381 މެޗު ކުޅެދީ 25 ލަނޑު ޖަހާފައެވެ. ރެއާލާ އެކު އޭނާ ވަނީ ގިނަ ކާމިޔާބީތަކެއް ވެސް ހޯދާފައެވެ. ޔޫރަޕުގެ ބޮޑެތި މުބާރާތްތައް ހިމެނޭ ގޮތުން އޭނާ ވަނީ ޖުމުލަ 17 ތައްޓެއް ކާމިޔާބުކޮށްފައެވެ. އޭގެ ތެރޭގައި ޔުއެފާ ޗެމްޕިއަންސް ލީގު ހަތަރު ފަހަރު ކާމިޔާބުކުރުން ހިމެނެއެވެ.